Ҭырқәтәыла иҟоу аԥсуа культуратә центрқәа рфедерациа иаанартит ахеилак ҿыц Туфанбеили ақыҭаҟны.
Саид Барганџьиа
Ҭырқәтәылатәи ақыҭа Туфанбеили иаатит аԥсуа культуратә хеилак ҿыц – мамзаргьы адернеқь, ара ишашьҭоу ала. Абри атәы АААК аинформациатә портал иазеиҭеиҳәеит Ҭырқәтәыла иҟоу Аԥсуа культуратә центрқәа рфедерациа аиҳабы Аҭанур Аҟәысба.
Иара иациҵеит ахеилак аартра шалыршахаз Ҭырқәтәылатәи арегион Адана иқәынхо аԥсуа-абаза диаспора раԥшьгарала, насгьы Афедерациа ацхырааралеи.
Аҟәысба иажәақәа рыла, хара имгакәа акультуратә хеилак алахәцәа рзеиԥш еизараҟны ирыӡбараны иҟоуп ари ахеилак Аԥсуа культуратә центрқәа рфедерациа алалара азҵаара, ус анакәха Туфанбеили иҟоу аԥсуа культуратә хеилак жәиԥшьтәихоит Аԥсуафед иалоу ахеилакқәа рхыԥхьаӡараҿ.
«Ари акультуратә хеилак аԥҵоуп иеизааигәаны ишьҭоу ақыҭақәа хԥа Игдебель Болаҭпынар, Ақпынар ирыланхо аԥсуа-абаза диаспора реидкыларазы. Арҭ ақыҭақәа рҟны инхоит 3500-ҩык рҟынӡа ҳдиаспора рхаҭарнакцәа», – ҳәа азгәеиҭеит Аҟәысба.
Иара иажәақәа рыла, адернеқь аусура азкызаауеит амилаҭтә-культуратә хаҿра аиқәырхара, аҭоурыхтә ԥсадгьыл азааигәатәра, аԥсуа-абаза культуратә мҽхакы арҭбаара. Ахеилак аусура адҳәалазаауеит иара убас аԥсуа бызшәа аларҵәара, Аԥсны Аҳәынҭқарра абзиаӡбахә Ҭырқәтәыла аларҵәара, аԥсуа ҵасқәеи ақьабзқәеи реиқәырхара, иеиҵагыло абиԥара рҭоурыхтә ԥсадгьыл аԥсҭазаара иадҳәаланы рааӡара.
Аԥсуафед аиҳабы адырра ҟаиҵеит Туфанбеили аԥсуа культуратә хеилак аиҳабыс дшалху Давуҭ Ҳапат.
Аԥсуа культуратә центрқәа рфедерациа уажәазы еиднакылоит 13 центр Ҭырқәтәыла ахьынӡанаӡа-ааӡо иаарту, инықәырԥшны Ҭырқәтәыла иахьа инхоит миллионки бжаки рҟынӡа аԥсуа-абаза милаҭ рхаҭарнакцәа.
Аконгресс Аԥҟаԥҵәа инақәыршәаны, Ҭырқәтәыла иҟоу Аԥсуа культуратә центрқәа рфедерациа аиҿкаара ихымԥадатәиу апартниорс иқәгылоит.
шәҭалароуп, ма шәыҽҭажәыҩроуп.