АААК ахантәаҩы цәыббра 30 рзы Аԥсны жәлар иазгәарҭо Аиаааиреи Ахьыԥшымреи рымш 25 шықәсатәи аиубилеи рыдиныҳәалеит.
Адунеизегьтәи аԥсуа-абаза конгресс Иреиҳаӡоу Ахеилак ахантәаҩы Мусса Егзакь Аԥсны жәлар Аиааира 25 шықәса ахыҵра рыдиныҳәалеит. Ҳтоурых аҿы ихадароу ари аныҳәа есышықәса иазгәарҭоит цәыббра 30 рзы.
Ажәлар рахь ирхаз адныҳәаларатә шәҟәаҿы Егзакь иазгәеиҭеит 1992-1993 шықәсқәа рзтәи Аԥсны Аџьынџьтәылатә еибашьра аԥсуаа риааирала иахьеилгаз – ажәлар ракзаара ишабзоуроу.
Иара иҳәеит аибашьра ҳҭоурых ишанхалаз атрагедиеи афырхаҵареи аазырԥшуа даҟьаны: иреиӷьӡаз Аԥсны аҵеицәа ршьала иааган ахақәиҭра, урҭ аӷа гәышԥыла иҿагылеит, хьаҵрак ҟамҵакәа рыжәлар, рыԥсадгьыл еиқәдырхеит. Хатәгәаԥхарала еибашьра иааз ҳашьцәа рыцхыраарала, аԥсуаа адунеи зегь иадырҳаит ахҳәаақәҵазы азин шрымоу, рхатәы ҳәынҭқарра аргылара ишаԥсоу, еиҵагыло абиԥара ҿыцқәа рԥеиԥш лашазарц азы ҳәагьы ациҵеит Егзакь.
«Арҭ 25 шықәса ирылагӡаны агәра ҳгеит аԥсуа жәлар амҩа иаша шалырхыз. Иахьа Аԥсны Аҳәынҭқарра –зхы иақәиҭу, ихьыԥшым ҳәынҭқарроуп, Урыстәыла аганахьала ҩашьара зқәым адгылара змоу, ихьчоу. Урыстәыла алшара дуқәа ҳанаҭоит аԥсуа-абаза жәлар ҳаизакра ҟаларц азы. Иахьа ҳҭоурых ҿыц ҳаҩратәы ҳаҟоуп хра злоу аус бзиақәа рынагӡарала», – ҳәа азгәеиҭеит АААК Иреиҳаӡоу ахеилак ахантәаҩы.
1993 шықәса цәыббра 30 рзы Аԥсны жәлар аиааира ргеит 1992 шықәса, нанҳәа 14 рзы иалагаз Аџьынџьтәылатә еибашьраҿы. Аибашьра цон 413 мшы. Шықәсык инахыҳәҳәо Аԥсны аҵакырадгьыл аҿы имҩаԥысуаз ишьаарҵәыраз аидысларақәа раамышьҭахь ақырҭуа қәылаҩцәа хьаҵыр акәхеит. 2018 шықәсазы Аԥсны Аиааиреи Ахьыԥшымреи рымшныҳәа 25 шықәса ахыҵуеит.
шәҭалароуп, ма шәыҽҭажәыҩроуп.