Аԥснытәи аҩыҟаҵаратә наплакы «Аргәын Иашҭа» иаиуыз ааԥхьарала, иалахәын 2018 шықәсазтәи Урыстәылазегьтәи аҩыҟаҵаҩцәа рсаммит аҳәаақәа ирҭагӡаны имҩаԥысуаз адегустациатә еицлабра.
Саид Барганџьиа
Аԥснытәи аҩыҭаҭәаратә наплакы «Аргәын Иашҭа» араӡны иаԥсахеит жьҭаара 6-8 рзы аурыс ҩтәы ҩны «Абрау-Дюрсо» адгыларала имҩаԥысуаз Урыстәылазегьтәи аҩыҟаҵаҩцәа рсаммит аҟны имҩаԥгаз адегустациатә еицлабраҿы. Абри атәы АААК аинформациатә портал иазеиҭеиҳәеит аҩыҟаҵаратә наплакы «Аргәын Иашҭа» адиректор Алхас Аргәын.
Иара иазгәеиҭеит, аицлабрахь ишынашьҭыз «Аргәын Иашҭаҿы» иҭарҭәо аҩқәа пшь-ҳкык: 2017 шықәсазтәи «Рислинг», аҩы цәыҟаԥшьқәа «Лофт», «Пино Нуар», нас 2016 шықәсазтәи аҩеиқәаҵәа «Шираз». Ари аҵыхәтәантәи араӡны медал иаԥсахеит ихьыԥшым адегустациаҿы, аҩыҭаҭәаратә наплакқәа хыԥхьаӡара рацәала аицлабрахь иаарышьҭаз аалыҵқәа рыбжьара.
Аҩқәа зегьы ахәшьара рырҭон жәларбжьаратәи ажиури, уи иалахәын аҩыҭаҭәаразы аекспертцәа: аенологцәа – аҩы аҟаҵашьа атехниказы аспециалистцәа, сомелье – аҩы агьамеи ахаҭабзиареи еилызкаауа аспециалистцәа, жәларбжьаратәи аҩаӡара змоу аӡбаҩцәа, атитул Master of Wine (аҩы иазҟазоу – аред.) змоу аспециалистцәа.
«Ҳара ҳаҩқәа аицлабрахь иҳашьҭит, раԥхьаӡа иргыланы, ҳаҩаӡареи ҳалшарақәеи ахьынӡаҟоу гәаҳҭарц, акритика ҳаҳарц, нас ҳаиӷьхарц азы. Аԥсны аҩы цқьақәа шҭарҭәо ауаа идҳардырыр ҳҭахуп, абри аус аҿы ҳаргьы ҳлагала ихәыҷы-идуу иҟаҳҵарц», – ҳәа азгәеиҭеит Алхас Аргәын.
Иара иҳәеит, Урыстәыла аҩыҟаҵара аҩаӡара даара ирласны иҿиоит ҳәа, ус анакәха иазҳауеит аконкуренциагьы.
«Ҳара ҳхатәы уникалтә ҩқәа ҳарҿиалароуп, уи азы даара ирацәаны аус улатәуп. Ҳара еиҭаҳарҿиарц ҳҭахуп иаҳцәыӡхьоу ажь ахкқәа, аханатә аԥсуа дгьыл аҟны изызҳауаз. Ари ахырхарҭала иҟанаҵахьоу рацәоуп акомпаниа «Аԥсны аҩқәеи аӡқәеи». Иахьатәи аамҭазы аԥсуа ҩқәа реиҭаираҿы дара аԥхьагылара руыр алшоит», – ҳәа инаҵшьны иазгәеиҭеит «Аргәын Иашҭа» адиректор.
Иара иажәақәа рыла, «Аргәын Иашҭа» аусура азынархоуп аҩыҟаҵараҿы ахатә цәаҩа ааныжьра.
«Иахьа макьана аԥшаара ҳаҿуп. Уажәазы аҩқәа фы-хкык ҭаҳҭәоит, аха ари аилазаашьа аҽаԥсахыр ҟалап», – ҳәа еиҭеиҳәеит Аргәын.
Аҩыҭаҭәарҭа «Аргәын Иашҭа» аԥҵан 2014 шықәсазы. 2016 шықәса инаркны 15 нызқь ԥаҭлыка аҩы рҭихьеит. Иара гылоуп Гәдоуҭа араион Ҟәланырхәа ақыҭан, аус зуа зегьы ара инхо ауааԥсыра роуп, есышықәса аусзуҩцәа рхыԥхьаӡара иазҳауеит.
2018 шықәса Урыстәылазегьтәи аҩыҟаҵаҩцәа рсаммит мҩаԥысуеижьҭеи аантәуп. Сынтәа Асаммит аусура рхы аладырхәит зықьҩык инареиҳаны ажьааӡаратә, аҩыҟаҵаратә наплакқәа рнапхгаҩцәеи, ари аусхк иадҳәалоу егьырҭ аофициалтә хаҿқәеи. Иаарту аицәажәара аформат аҭаны аекспертцәеи ааглыхыҩцәеи алацәажәеит аусхк аҿы иахьазы иҟоу атренд хадақәеи, аҩыҭаҭәара иадҳәалоу хра злоу азҵаарақәеи.
шәҭалароуп, ма шәыҽҭажәыҩроуп.