Адунеизегьтәи аԥсуа-абаза конгресси Ауаажәларратә еиҿкаара «Алашареи» иаԥшьыргаз ақалақьтә граффити азы иреиӷьу асахьа алкаара аконкурс «Етноарт: иаӡәыку, иузеиҩымшо аԥсуа-абаза жәлар» аҽҳәара мчыбжьқәак ацҵоуп.
Саид Барганџьиа
Адунеизегьтәи аԥсуа-абаза конгресси Ауаажәларратә еиҿкаара «Алашареи» еиҿыркаауа аконкурс «Етноарт: иаӡәыку, иузеиҩымшо» алахәхара зҭаху рзы аҽҳәарақәа наскьагоуп ԥхынгәы 15-нӡа.
«Етноарт» – асахьақәа рконкурс ауп, уахь инашьҭхо иреиӷьу асахьа аескиз ала аҭыхымҭа рдуны аграффити атехникала ианҵахоит Аҟәа ақалақь ахыбрақәа руак аҭӡаҟны.
Асахьа атема – «Иаӡәыку, иузеиҩымшо аԥсуа-абаза жәлар».
Апроект кураторс дамоуп Санкт-Петербург иҟоу АААК арегионалтә ҟәша ахантәаҩы Ҭемыр Рекәаа. Уи иажәақәа рыла, аконкурс аҽҳәарақәа ирыцҵан, иреиӷьу ҳәа иалкаахо асахьа ахьанырҵо аҭыԥ аԥсахра иахҟьаны. Уажәшьҭазы иӡбоуп – аиааира згаз асахьа Аҟәа ақалақь, Воронов имҩа 11 аҭыӡҭыԥ ала игылоу ауаҭах рацәа змоу аҩнеихагыла аҭӡаҟны ишанҵахо.
Абри аҩнаҿы инхо Дамеи Џьонуа еиҭеиҳәеит, иареи игәалацәеи (аҩны зҭәқәоу Реилазаара «Ауниверситет» - аред.) аконкурс аӡбахә анраҳа Аконгресс ахь аҳәара ҟарҵеит ҳәа, аиааира зго асахьа рыҩны афасад аҟны ианҵахарц азы.
«Ҳара Аконгресс ахь аҳәара ҟаҳҵеит, анаҩс уи аус аӡбара ззинра аҿы иҟоу аусбарҭақәа рахь ҳамҩахыҵит, ҳаԥшьгарагьы ақалақь Администрациа ақәшаҳаҭхеит. Ҳаҩны арԥшӡаразы агәҭакы ҳазцәырҵит, насгьы уи аҭӡы акыр шықәса ҵуеит аремонт азырымуижьҭеи», – иҳәеит Џьонуа.
Аҭӡы асахьа анырҵаанӡа, Аконгресс аҭӡы аремонт азнауеит ҳәа инацҵаны иазгәеиҭеит Џьонуа.
«Ҳарҭ ҳхаҭақәагьы активла ҳхы алаҳархәоит иреиӷьу асахьа алхраҿы, убасгьы ҳгәыӷуеит, ҳтәыла ауааԥсырагьы активла аконкурс ахь рсахьақәа аарышьҭып ҳәа», – азгәеиҭеит Џьонуа.
Аиҿкааҩцәа еиҭашәгәаладыршәоит аконкурс хықәкы хадас иамоу: аԥсуа-абаза (абаза) жәлар ретнокультуратә акзаара арӷәӷәара, абаҩхатәра змоу ауаа ақалақь ахаҿра аиӷьтәра иадҳәалоу азҵаарақәа разхьарԥшра. Аконкурстә усумҭақәа хымԥада ирныԥшуазароуп амилаҭтә кульутра аелементқәа. Иара убасгьы иазгәеиҭеит аконкурс иацу аҷыдарақәак ртәы, урҭ инарҭбааны иарбоуп Аконкурс аԥҟарақәа рҿы.
«Лаҵарамза 15 инаркны аусумҭақәа раашьҭра ҟалоит. Аконкурс рхы аладырхәыр рылшоит изҭаху зегьы, адунеи ҭыԥс иахьынхозаалак, рықәра зеиԥшразаалак. Асахьақәа ԥшшәыла иҭыхзароуп, атехника зеиԥшразаалак ауеит. Асахьақәа зегьы ирыҵаҩызароуп абри аинформациа: автор ижәла, ихьӡ, иқәра, иҭел аномер, дахьынхо аҭыӡҭыԥ», – иҳәеит Ҭемыр Рекәаа.
Ԥхынгәымза 16-23 рыбжьара аконкурс аиҿкааратә еилакы иалнахуеит иреиӷьу асахьа-аескизқәа, анаҩс урҭ онлаин-абжьыҭаразы иқәыргылахоит. Уи амҩаԥгара азгәаҭоуп ԥхынгәымза 27, асааҭ 10:00 инаркны нанҳәамза 5, асааҭ 10:00 рҟынӡа Адунеизегьтәи аԥсуа-абаза конгресс асаит аҟны (www.abaza.org).
Абжьыҭара абжьаратәи алҵшәақәа убартә иҟалоит Аконгресс апортал аҟны, аамҭа ҵабырг инақәыршәаны. Зегь иреиҳаны абжьқәа зауз аусумҭа аиааира агеит ҳәа иԥхьаӡахоит. Аиааира згаз ихьӡ рылаҳәахоит нанҳәамза 8 рзы, иара ианаршьоит асертификат, иара убасгьы аҳамҭа хада – Урыстәыла иреиҳаӡоу асахьҭыхратә еилакқәа ируаку «Дари Добро» аиааира згаз аескиз аграффити аҳасабала ианнаҵоит Аҟәатәи аҩнеихагыла узлаҿаԥшуа аҭӡы, зхышәа-ҵышәара 270 м² ыҟоу.
Ихиоу аусумҭақәа аконкурс аиҿкааҩцәа ирықәуршәар ауеит АААК аофис ахь рынашьҭрала: Аҟәа ақалақь, Лакоба имҩа, 109, аҩбатәи аихагыла (Аԥсны Ашәахтәқәеи аизгақәеи рминистрра ахьыҟоу ахыбра – аред.), асааҭ 10:00 инаркны 18:00 сааҭ рҟынӡа, мамзаргьы абри аелекторнтә ԥошьҭахь инашьҭызар ауеит info.abk@abaza.org хаҭабзиара ҳаракыла. Аусумҭақәа рыдыркылоит ԥхынгәымза 15, ҵхагәҭанынӡа.
Аиҿкааҩцәа иазгәарҭеит, ари аконкурс қәҿиарала ихыркәшахар, уи ахырхарҭала аусура ԥхьаҟагьы хымԥада ишацҵахо.
Аконкурс иазку инарҭбаау аинформациеи, уи амҩаԥгара Аԥҟарақәеи рыԥхьара>>
шәҭалароуп, ма шәыҽҭажәыҩроуп.