АААК аделегациа рхы аладырхәит Москва имҩаԥысыз аҩбатәи аԥсуа культура афестиваль «Аԥсны».
Саид Барганџьиа
Адунеизегьтәи аԥсуа-абаза Конгресс аҩынтә раан ахы аланархәит Москва имҩаԥысыз иаарту аԥсуа культура афестиваль «Аԥсны», амҽыша рашәарамза 30 рзы.
Аҳҭнықалақьтә парк «Краснаиа пресниа» аҟны имҩаԥгаз афестиваль аҟны иаартын Аконгресс апавильонгьы, уаҟа изҭаху зегьы Аконгресс иалалар рылшон. Уи аҽны ҿыц иалалаз рхыԥхьаӡара 50-ҩык инареиҳауп.
АААК Иреиҳаӡоу ахеилак ахантәаҩы иаппарат анапхгаҩы Кан Ҭаниа афестиваль ахәшьара аиҭеит «аԥсуа-абаза диаспораҿы ихадароу акультуратә-рккаратә хҭысқәа ируакуп» ҳәа, иагьациҵеит Аконгресс ахадара ас еиԥш иҟоу аусмҩаԥгатәқәа аҵак ду рыманы иахәаԥшуеит ҳәа.
«Абас еиԥш иҟоу аусмҩаԥгатәқәа рыбзоурала уабадыруеит аԥсуа-абаза жәлар ижәытәӡоу рҭоурых, ибеиоу ркультура, иԥшӡоу рқьабзқәа. Убри азоуп Аконгрессгьы ари афестиваль ахы заланархәыз», – иҳәеит Ҭаниа.
Иара иҭабуп ҳәа реиҳәеит афестиваль аиҿкааҩцәа зегьы, – раԥхьаӡа иргыланы, Москватәи аԥсуа диаспора аиҳабы, АААК Иреиҳаӡоу Ахеилак алахәҩы Беслан Агрба.
АААК Аҳәсацәа Рхеилак анапхгаҩы Гета Арӡынԥҳа, апавильон аусура иахылаԥшуаз, иазгәалҭеит, ҵыԥхтәи афестиваль иаҿырԥшны иуҳәозар, ари ашықәс азы афестиваль иаҭааз ауааԥсыра рхыԥхьаӡара еиҳа ишырацәаз атәы (заанаҵтәи адыррақәа рыла, ари ашықәс азы афестиваль иаҭааит 10-нызқьҩык инареиҳаны ауааԥсыра, ҵыԥх – 8-нызқьҩык раҟара – аред.).
«Ихадоу акы акәны ҳара (АААК аделегациа – аред.) иаҳаԥхьаӡоит, ҳара ҳастенд ааигәара иахьыргылаз «Ашәуа гәараҭа» астенд. Иаку композициак ала аҩ-павильонк аарԥшын, уи алагьы зегьы идҳарбеит, аԥсуааи абазақәеи жәларык шҳакәу. Иахьа уи лымкаала иубаратәы иҟан. Насгьы, ари ашықәс азы, ҳазҭысыз ашықәс иаҿҳарԥшуазар, Аконгресс иалалаз абазақәа рхыԥхьаӡара еиҳа ирацәоуп», – еиҭалҳәеит Арӡынԥҳа.
Аконгресс Аҳәсацәа Рхеилак анапхгаҩы лгәаанагарала, АААК астенд иалнаршеит «афестиваль асасцәа Аԥсны ачеиџьыка, имаҷу ахәҭак акәзаргьы, рызнагара».
«Ҳара иҳалшеит иуникалтәу аҭагылазаашьа аԥҵара. Апавильон асасцәа зегьы ирзеиҭаҳҳәон АААК ахықәкқәеи, адҵақәеи ртәы. Насгьы, аԥсуаа рҭоурыхи рынхашьеи-рынҵышьеи ирызкыз авикторина мҩаԥаҳгеит, иара убасгьы иаҳҳәон аԥсуа шәақәа, урҭ ҳацызҳәозгьы рацәаҩын», – лҳәеит Гета Арӡынԥҳа.
АААК аекспозициа шьагәыҭс иаман Аконгресс аԥҵара аҭоурыхи, уи 25 шықәса рыла имҩаԥнагаз ауси знылаз апрезентациатә шәҟәы. Аконгресс астенд аҟны раԥхьаӡа акәны ицәырган аԥсуа-абаза жәлар адунеи аҟны тәылақәас иахьынхо знылаз ахсаала, уи, ҳәарада, азҿлымҳара ду рызцәырнагеит астенд асасцәа. Иара убасгьы, АААК апавильон иаҭааз зегьы ирзыԥшын Аԥснынтәи иаагаз ахаа-мыхаақәа.
«Апавильон агәҭаны игылан, аԥсуеи абаза чысқәеи рыла иҩычаз, амилаҭтә елементқәа рыла ирԥшӡаз аишәа. Аусмҩаԥгатә иалахәыз зегьы, хәыда-ԥсада аишәа иқәыз ачысхкқәа зегьы ргьамақәа рбар рылшон», – инацҵаны иазгәалҭеит АААК Аҳәсацәа Рхеилак анапхгаҩы.
Аԥсуа павильон аусура аҳәаақәа ирҭагӡаны имҩаԥган авикторина, уи аихшьалақәа рыла – аиааира згаз Ирина Шитинеи Екатерина Кротовеи ҳамҭас ирыҭан аԥсуа чысла иҭәыз акаҵкәыр.
Гета Арӡынԥҳа иазгәалҭеит аныҳәа иацыз лымкаалатәи аԥхарреи, аҭаацәаратә ҟазшьеи.
«Зынӡа еибазымдыруаз ауаа аԥсшәа еибырҳәон, игәыдибакылон. Иҟалон аамҭақәак, ҳазегьы ҭаацәа дук ҳакәызшәа ҳхы анаҳбоз», – иазгәалҭеит Арӡынԥҳа.
Лара ҷыдала, АААК ахьӡала, иҭабуп ҳәа ралҳәоит астенд аиҿкаараҿы ацхыраара ду ҟазҵаз аволонтиорцәа, «урҭ ахәылԥаз еилгаанӡа ҳавара игылан».
Аԥсуа культура афестиваль Москва аҩынтә раан имҩаԥысит. 2018 шықәсазы иара мҩаԥган цәыббра 30 рзы, Аԥсны Аиааиреи Ахьаԥшымреи рымш 25 шықәса ахыҵра иазкны. Усҟан, АААК афестиваль алахәра аихшьалақәа рыла, Аконгресс иалалеит 20-ҩык инареиҳаны алахәцәа ҿыцқәа.
шәҭалароуп, ма шәыҽҭажәыҩроуп.