Ҳазҭало лаҵарамза реиҳа иуадаҩу аамҭахоит акоронавирустә ҿкы аҿагылара аҭараан ҳәа аҳәамҭа ҟаиҵеит Аԥсны агәабзиарахьчара аминистр Ҭамаз Ҵахнакьиа ипресс-конференциаҿы.
Аԥсны акоронавирустә чымазара ҿкы ианаҭо аҿагылараан реиҳа иуадаҩхо аамҭахоит ҳазҭало лаҵарамза ҳәа иԥхьаӡоит Аԥсны агәабзиарахьчареи асоциалтә еиқәыршәареи рминистр, Акоронавирустә ҿкы аҿагыларазы аоперативтә штаб аиҳабы Ҭамаз Ҵахнакьиа. Абри атәы иҳәеит мшаԥы 22 рзы имҩаԥысыз ипресс-конференциаҿы.
Убри аан аминистр иазгәеиҭеит, аҭагылазаашьа хылаԥшра бзиа аманы, аҽыԥхьакра арежим ааԥын аанҵәаанӡа еилагарада ҳақәныҟәар, «ауадаҩра дуқәа ҳарнымиар ауеит» ҳәа.
«Макьана Аԥсназы аҭагылазаашьа маншәаланы ишьақәгылеит», – ҳәа ациҵеит Ҭамаз Ҵахнакьиа.
Иара иазгәеиҭеит атәылаҿы аԥкрақәа раӷьырак макьанагьы иаԥыхӡамкәа ишыҟоу.
«Сара ҷыдала иалыскаауеит аҽыԥхьакра шхадароу. Иахьа уажәраанӡа хҩык апациентцәа мацара ахьҳамоу, руаӡәк лгәы бзиаханы аҩныҟа дахьаҳашьҭхьоугьы иаанагаӡом шьҭарнахыс ашәарҭара ыҟаӡам, ҳгәы ҳарҭынчыр ҟалоит ҳәа. Ҳара даара икылкааны ҳацклаԥшуеит адунеи аҿы, убас ҳгәыларатә тәылақәа рҿгьы ашьақәгылара иаҿу аепидемиатә ҭагылазаашьа. Уи мариоуп ҳәа узазҳәагәышьом», – иҳәеит Ҵахнакьиа.
Аԥкрақәа ралагалара аамҭа
Хәажәкырамза анҵәамҭазы Аԥсны иалагалаз аҭагылазаашьа ҷыда арежим мшаԥы 20 рзы иазыԥҵәаз аамҭа хыркәшан. Атәыла аиҳабыра ишырыӡбаз ала, уи аҿҳәара иацҵамызт. Аха ауааԥсыра рахь аҳәара ду ҟаҵоуп аҽыԥхьакра аԥҟарақәа ирықәныҟәаларц.
Иара убас иӡбан Гагреи Гали араионқәа рҿы акоменданттә сааҭ аԥыхзарц. Аԥсны ақалақьқәа зегьы рҿы аџьармыкьақәа русура азин ҟаҵоуп, амала макьаназы мчыбжьык ахьтә хымш роуп аус ахьыруа. Уаанӡеиԥш иаркуп ашколқәеи, ахәыҷбаҳчақәеи, ауниверситети. Ауаажәларратә транспортгьы макьана аус ауам.
Урыстәыла иҟанаҵаз ацхыраара
Мшаԥы 18 рзы Аԥсныҟа иааит Урыстәыла Амшынеиқәатә флот иатәу арадиациатә, ахимиатә, абиологиатә хьчара архәҭақәа акоронавирус аҽацәыхьчараҿы ацхыраара ҟарҵарц. Абри ахҭыс иазкны Аԥсны ахада ин. н. Валери Бганба Аԥсны иҟоу Урыстәылатәи Афедерациа Ацҳаражәҳәарҭа ахаҭарнакцәеи Гәдоуҭа иҟоу Урыстәылатәи арратә база ахаҭарнакцәеи дырԥылеит.
«Аԥсны акоронавирус иадҳәалоу аҭагылазаашьа ахылаԥшра ӷәӷәа шаҳто жәдыруеит ҳәа агәра ганы сыҟоуп. Уажәы аԥкрақәа маҷк иҳарԥсыҽит, Гагреи Гали акоменданттә сааҭ аԥыхуп. Ачымазара зыдбалоу ирныруаз зегьы шьақәыргылан, иԥхьакын. Иааидкыланы иугозар, аҭагылазаашьа ҭышәынтәалоуп. Аџьармыкьақәа русура хәҭакахьала ихацҳаркит», – иҳәеит аиԥылараҿы ахада инапнҵақәа назыгӡо.
Иара иазгәеиҭеит убасгьы афатә аалыҵқәа ахьырҭиуа аџьармыкьақәеи наплакқәаки аусура иахьалаго инадҳәаланы арзҩыдаратә усқәа рымҩаԥгараҿы уажәы иааз урыстәылатәи ацхыраара даара иаҭахны ишыҟалаз.
Аоперативтә штаб адыррақәа
Ауааԥсыра акоронавирустә ҿкы рацәыхьчаразы аоперативтә штаб адырра ҟанаҵеит ачымазара зцәа иалоу 1925 шықәса рзы ииз аԥҳәыс бырг Гәдоуҭатәи ахәышәтәырҭаҿы дышьҭоуп ҳәа, лҭагылазаашьа уадаҩуп, еиҭашәоит. Егьырҭ ҩыџьа ргәы бзиахеит. Раԥхьатәи апациент макьана ахәышәтәырҭаҿы дыҟоуп, аҳақьымцәа ихылаԥшуеит. Аҩбатәи дылрыҩааит, аҩны дыҟоуп.
Аԥсны аҭагылазаашьа ҷыда аналагалаз аахыс акоронавирус аарԥшразы агәаҭара зынӡа иахысит ҩышәҩык инареиҳаны ауаа.
Аԥсуа наплакцәа иаԥырҵаз агәыҳалалратә хеилак «Ҳара ҳаидгылоуп» алахәцәеи Москватәи аԥсуа диаспора ахаҭарнакцәеи алаҳәара ҟарҵеит Аԥсны ауааԥсыра акоронавирус раҿагылараҿы ацхыраара рыҭаразы аԥара шеизырго. Иахьазы еидкылоуп 55 миллион мааҭ инарзынаԥшуа аԥара.
Аԥсны акоронавирустә чымазара ҿкы COVID-19 аҿагылараҿы ацхыраара азҭарц зҭаху зегьы рзы алшара ыҟоуп рыхәҭалагала ҟарҵарц – Москватәи Аԥсуа Диаспореи «Ҳара ҳаидгылоуп» ахеилаки ирымоу реквизитқәа рахь доусы илшо алаҵарала Аԥсныи Урыстәылатәи Афедерациеи рҟынтә, иара убас Адунеизегьтәи аԥсуа-абаза конгресс ареквизитқәа рахь – Ҭырқәтәылантә, ма Аконгресс асаит аҟны онлаин-ԥарашәара амҩаԥгара. Еизгахо аԥара зегьы Аԥсны ауааԥсыра аҿкы чымазара рацәыхьчареи ргәабзиара ашьақәыргылареи иазкхоит.
шәҭалароуп, ма шәыҽҭажәыҩроуп.