Зыԥсадгьыл ахь ихынҳәыз Урыстәыла арратә ҵараиурҭақәа ирҭоу акурсантцәа даҽа ҩыџьа акоронавирустә чымазара ҿкы рыдбалоуп. Абасала, аҵыхәтәантәи ҩымш ирылагӡаны COVID-19 зыхьуа ауааԥсыра рхыԥхьаӡара фҩык рҟынӡа инаӡеит. Абри атәы рҳәеит Ауааԥсыра акоронавирустә ҿкы рацәыхьчаразы аоперативтә штаб есҽнытәи рааԥхьараҿы.

«Ачымазара зцәа иалоу акурсантцәа Гәдоуҭатәи ахәышәтәырҭаҿы ирхәышәтәуеит. Рҭагылазаашьа хар амам ҳәа иушьартә иҟоуп», – ҳәа адырра ҟанаҵеит аоперативтә штаб.

Хәажәкырамза анҵәамҭа инаркны мшаԥы 20 рҟынӡа Аԥсны Аҭагылазаашьа ҷыда алагалан. Атәыла аиҳабыра рыӡбарала уи аҿҳәара иацҵамызт. Убри аан аиҳабыра атәыла ауааԥсыра рахь ааԥхьара ҟарҵоит ачымазара ҿкы алаҵәара иаҿагылаша аԥкрақәа ирықәныҟәаларц.

Аԥсны ақалақьқәа зегьы рҿы иахьатәи аамҭазы аџьармыкьақәа аус руеит, дара аартуп мчыбжьык ахь хымш. Ашколқәеи, ахәыҷбаҳчақәеи, ауниверситети макьанагьы иаркуп.