Аԥсны атуризм аминистрра ҳтәыла атуристтә бренд аԥҵаразы аконкурс рыланаҳәеит. Иреиӷьу алоготип (адырга) иазку аицлабра рхы аладырхәыр рылшоит изҭаху зегьы. Абри атәы АААК аинфопортал иазеиҭеиҳәеит Аԥсны атуризм аминистрра аинформациатә еиқәыршәазаара аҟәша аиҳабы Саида Аршба.

Иара иажәақәа рыла, алоготип аҟны «иарбазароуп сахьаркыратә бызшәала иаарԥшу Аԥсны акультуратә, аҭоурыхтә беиара, уи адырга брендк аҳасабалагьы ахықәкы нанагӡо иҟазароуп» ҳәа.

Иара иациҵеит убасгьы, атуристтә бренд алоготип аидеиа иаанарԥшуазароуп ҳәа ҳтәыла аԥсшьара аганахьала иамоу аԥыжәарақәеи аҷыдарақәеи зегьы, еиуеиԥшым атуристтә хырхарҭақәеи еиуеиԥшым аудиториеи ирзынархоу.

«Адгаламҭақәа електронтә ԥошьҭала иаашьҭызароуп, иагьрыцзароуп: аидеиа иаазыркьаҿны ҵакыс иаҵоу зҳәо ахҳәаа, уи ашьақәырӷәӷәамҭа – абренд ауникалреи, аудиториа ззыԥшуи, аконкурентцәа рҿаԥхьа ԥыжәарас иамоуи ҳасаб рзуны, нас аидеиа аазырԥшуа асахьақәа», – иҳәеит Саид Аршба.

Иара иациҵеит убасгьы, алоготип аҟны аԥшшәырацәа реилаԥсара ишазыразым, уи улаҿы иааиртә, иаразнакала игәнукылартә иҟазароуп.

Аконкурс ԥшь-етапк рыла имҩаԥысуеит.

«Агәаҳәара змоу зегьы русумҭақәа аарышьҭыр рылшоит ԥхынҷкәын 26 рҟынӡа. Анаҩс ԥхынҷкәын 27 рҟынӡа аекспертцәа рхеилак иалыркаауеит иреиӷьу жәа-усумҭак. Уи ашьҭахь хынҷкәын 28 инаркны иааиуа ашықәс ажьырныҳәа 20 рҟынӡа ауаажәлар рыбжьыҭарала иалкаахоит иреиӷьу х-конкурстә усумҭак. Абжьыҭара мҩаԥыслоит Атуризм аминистра аофициалтә саит аҟны», – ҳәа еиҭеиҳәеит Саид Аршба.

Атуризм аминистрра ахаҭарнак иазгәеиҭеит, аконкурс аҟны аиааира зго 50 нызқь мааҭ аԥаратә ҳамҭа шианашьахо, аха зегь реиҳа ихадароу – Аԥсны атуризм аҭоурых аҟны ихатәы хәаԥшышьа шалагалахо.

Аконкурс зхы алазырхәыр зҭаху зегьы русумҭақәа абри аелектонтә ԥошьҭахь инарышьҭыр рылшоит:

ABKHAZIA-TRAVEL@YANDEX.RU.