Аԥсны ахада Аслан Бжьаниеи Адунеизегьтәи аԥсуа-абаза конгресс Иреиҳаӡоу ахеилак ахантәаҩы Мусса Егзакьи еиԥылеит Аҟәа, Егзакь Аԥсныҟа иусуратә аҭаара иалагӡаны. Иара уи аҽны Бжьаниа Аконгресс аофис даҭааит.
Адунеизегьтәи аԥсуа-абаза конгресс Иреиҳаӡоу ахеилак ахантәаҩы Мусса Егзакь Аԥсны дааны атәыла ахада диԥылеит ахаша, хәжәкыра 24 рзы. Аиԥылара мҩаԥысит Аԥсны ахада иусбарҭаҟны, аҩыџьагьы хатәы бызшәала аԥсшәақәа еибырҳәеит. Аԥсны ахада ҩызартә ҟазшьала диԥылеит амеценат, аԥсуа-абаза жәлар иналукааша рҵеи.
«Бзиала уаабеит, Мусса Ҳабал-иԥа! Аԥсны – уара уԥсадгьыл ауп, Аԥсназы иҟауҵахьоу рацәоуп, ҳара ҳзы игәахәароуп лассы-лассы арахь уахьаауа», – иҳәеит Бжьаниа.
Мусса Егзакь иакәзаргьы, абаза бызшәала аҭак ажәа иҳәеит, аиԥылара иалхәыз зегьы еиҭагаҩ дырҭахымкәа еилыркааит ииҳәаз аҵакы.
«Сара ишәзеиҭасҳәарц сҭахуп Аконгресс усқәас имҩаԥнаго. Ҳамчқәеи ҳалшареи зегьы ззынархоу ауаа рыргәырӷьареи рыԥсҭазаара аиӷьтәреи ауп», – ҳәа ицәажәара хациркит Егзакь.
Уи нахыс аиԥылара мҩаԥысуан ажурналистцәа аламырхәӡакәа. Ианхыркәшаха ашьҭахь, ажурналистцәа рахь ицәырҵыз Егзакь иҳәеит ахадеи иареи шалацәажәоз хыԥхьаӡара рацәала иазгәаҭоу апроектқәа рынагӡаразы Аконгресс лшарақәас иамоу.
«Ҳара ҳрылацәажәон Аконгресс Аԥсны инанагӡо аусқәа, убасгьы ҳамчи-ҳалшеи еиҳа ишеизырҳатәу ҳазааҭгылеит. Ахада иганахьала аилкаареи адгылареи ыҟоуп зегь рыла, азҿлымҳара ду ааирԥшит ауаажәлар рыбзазара аиӷьтәра иазку апроектқәа рганахь. Иҟоу алшарақәа ҭиҵаауан, дазҵаауан», – иҳәеит Егзакь.
Иара уи аҽны, хәажәкыра 24 рзы Аслан Бжьаниа АААК аофис даҭааны Аконгресс акоманда дырԥылеит.
Атәыла ахадеи Аконгресс аусзуҩцәеи реицәажәараан Мусса Егзакь иазгәеиҭеит шаҟа ирласны иазааиз абархь иааира.
«Иахьа ахада иусбарҭаҿы ҳаиқәшәараан, Аслан Гьаргь-иԥа сиазҵааит ауп, сасра даҳзааир анбаилшо ҳәа? Иара, лакҩакрак ҟамҵакәа, иахьагьы сыхиоуп иҳәеит. Сгәыӷуеит, абас еиԥш аиԥыларақәа традициахап ҳәа, Аконгресс есышықәсатәи аусура аихшьаалақәа шыҟаҳҵо еиԥш. Ҳара ҳаизыӡырҩуеит, ҳазхәыцуеит иҵегь иҟаҳҵаша, ма иҳагу акрыҟазар», – иҳәеит АААК ахантәаҩы. Насгьы иазгәеиҭеит атәыла ахадеи, аилатәара иалахәыз зегьи рзы: «Аконгресс апроектқәа рынагӡара ахьӡала акәӡам ишаҿу. Проектцыԥхьаӡа ауаа рзы ахәарҭа ацзароуп, хаҭала аӡәы, ма иалкаау ҭаацәарак инадыркны ауаажәлар зегьы рзгьы иааидкыланы. Аҵыхәтәан иҳауа алҵшәоуп аус злоу» ҳәа.
АААК ауснагӡаратә маӡаныҟәгаҩ Инар Гыцбеи Аконгресс аппарат анапхгаҩы Кан Ҭаниеи еиҭарҳәеит Аконгресс аусура ахырхарҭа хадақәа ртәы, уи аилазаашьас иамоу, системас изықәныҟәо, арегионалтәи аҭыԥантәи аҟәшақәеи ртәы уҳәа.
Дара иазгәарҭеит иахьазы еиҿкаау АААК акоманда – зҳәоу еиқәшәоу коллективуп ҳәа, уи аҿаԥхьа иқәгылоу ахыдҵақәагьы даара акыр рҵакы дууп: аԥсуа-абаза жәлар ретнокультуратә акзаара арӷәӷәара, ахатәы бызшәа, аҵас-қьабзқәеи акультуреи реиқәырхареи рырҿиареи Аԥсны аҩнуҵҟеиԥш, адиаспора жәпаҩны иахьынхо атәылақәа рҟынгьы.
Аслан Бжьаниа агәахәара инаҭеит АААК акоманда русушьа, алафгьы ахиҳәааит, ас еиԥш иҟоу аофис аҟынтә ацара уҭаххарым ҳәа. Аусзуҩцәа ҿарацәа ирабжьигеит аҳәынҭқарратә маҵзура иазхәыцырц, избанзар аҵареи азыҟаҵара бзиеи змоу апрофессионалцәа шракәу ибеит. Анаҩс Мусса Егзакь иахь ихы нарханы иҳәеит:
«Шәара ишәыӡбо аусқәа мариаӡам. Иџьасшьоит, абизнес знапы алаку аӡәы иаҳасабала, абарҭ апроблемақәа рыӡбара аамҭеи амчи ахьазышәыԥшаауа, уи шәахьазҿлымҳау, – иҳәеит Бжьаниа. – Ҭаацәак иадымхаргьы узрыцхаар – уи ус дууп ҳәа иахәҭаны ишьоуп иахьа. Шьоукы ргәы иаанагар ҟалоит, Аконгресс имҩԥнаго аусқәа аҳәынҭқарра иаӡбозароуп ҳәа. Сара сгәы ишаанаго шәасҳәоит. Зегь ҳамчқәа еибыҭазароуп ҳаԥсадгьыл аԥеиԥш лаша аиурц ҳҭахызар».
Бжьаниа дигәалаиршәеит Аԥсны раԥхьатәи ахада Владислав Арӡынба, нас уи аҳәынҭқарра аргылара аус дшазнеиуаз.
«Ҳәара аҭахума, иҟаҵатәу еиҳауп иҟаҳҵахьоу аасҭа. Владислав убас иҳәон: ихлымӡааху ҳашьҭахьҟа инҳажьит, иуадаҩӡоу ҳаԥхьаҟа ишьҭоуп ҳәа. Аҳәынҭқарра аргылара, уи аҿиара, амаҵ аура – абарҭқәа зегь реиҳа ихадароу зҵаарақәоуп. Ихырҳаганы аус зуа аусбарҭақәа маҷуп. Шәара шәеиԥш зхы-згәы азышьҭны аус зуа аныҟоу – аҳәынҭқарразы ҵыргәа бзиаӡоуп. Шәара шәҿы аусура шеиҿкаау, ишымҩаԥысуа еиԥш партиак аҿгьы еиҿкаамзар ҟалап, аӡәгьы игәы иалымсааит. Иҭабуп ҳәа шәсҳәоит шәџьабаазы», – ҳәа иажәа хиркәшеит Аслан Бжьаниа.
Мусса Егзакь иазгәеиҭеит Аконгресс аҿы аилаҵа-еилых шыҟарымҵо, ари аҳәынҭқарра иадуп, ари ҳара иҳадуп ҳәа, избанзар зегьы ззааԥсо акоуп.
«Ҳара хықәкыс иҳамоу – аӡәыцыԥхьаӡа зегьы ацхыраара рыҭароуп, ажәлар ҳашрызхәыцуа рнырырц, ианаарҭаххо ҳажәҩахыр аибыҭара ҳшазыхиоу агәра ганы иҟазарц», – иҳәеит АААК Иреиҳаӡоу ахеилак ахантәаҩы.
Мусса Егзакь Аԥсны дыҟазаауеит хәажәкыра 27 рҟынӡа, иҵегь акыр аиԥыларақәа рымҩаԥгра игәы иҭоуп Аконгресс Иреиҳаӡоу ахеилак алахәцәеи, Аԥсны араионқәа рҿы еиҿкаау АААК Аҭыԥантәи аҟәшақәа рхаҭарнакцәеи алархәны.
шәҭалароуп, ма шәыҽҭажәыҩроуп.