Адунеизегьтәи аԥсуа-абаза конгресс абҵарамзазы иацнаҵеит уаанӡа ихацнаркьаз акциа – Аҟәа Аҳабла ҿыц иалҵыз, Аԥсны жәлар рџьынџьтәылатә еибашьраҿы иҭахаз аҵеицәа рыхьӡала ачамҳаҵлқәа реиҭаҳара иазку.
Адунеизегьтәи аԥсуа-абаза Конгресс ааусзуҩцәа Аҟәа Аҳабла ҿыц ачамҳаҵлақәа аҽа ԥыҭк еиҭарҳаит. Ари акциа Аԥсны жәлар рџьынџьтәылатә еибашьраҿы иҭахаз, араион иалҵыз аҵеицәа ирызкуп. АААК еиқәнаршәаз асиа ала – уи Аԥсны Атәылахьчара аминистрра аҳәынҭқарратә архив аҟны ишьақәырӷәӷәан – аԥсуа-ақырҭуа еибашьраан иҭахеит 76-ҩык Аҳабла ҿыц иалҵыз аибашьцәа, иара убас аибашьраҿы иҭахеит быжьҩык аҭыԥантәи аҭынч уааԥсыра.
Агәалашәаратә баҳча аиҭаҳара аидеиа рызцәырҵит Аконгресс активистцәа. Аҵлақәа рыхәҭак ааԥынразы еиҭарҳаит Аконгресс аусзуҩцәеи аратәи анхацәеи.
АААК ауснагӡарартә маӡаныҟәгаҩ Инар Гыцба иҳәеит, ачамҳаҵлақәа Аҳабла ҿыц апарк хада ахы инаркны аҵыхәанӡа ишеиҭаҳау. Актәи аетап анхыркәшаха ашьҭахь аҭыԥантәи ауааԥсыра ажәа ҟәандақәа рацәаны ирҳәеит.
«Ҳара ҳзы акраанагоит ҳазҿу аус ауаа ргәы ианақәшәо, иҭабуп ҳәа анҳарҳәо. Абри акциагьы ауаа ргәы иахәеит: абаҳча еизҳар иԥшӡахоит – уи акы, иҩбахаз – ари акциа абзоурала иҭахаз аҵеицәа рыхьӡ кашәара ақәхом. Ҳара ҳаигәырӷьоит аҭыԥантәи анхацәа ахьҳавагылаз», – иҳәеит Инар Гыцба.
Аҵла ажәла алхраҿы Аконгресс аусзуҩцәа ацхыраара рырҭеит Аԥсны абнанхамҩатә ԥышәаратә станциа аспециалистцәа. Аҵлақәа реиҭаҳара иалахәын Аконгресс аусзуҩцәеи, иҭаҳаз рыуацәеи рыдагьы, Аҩнусбарҭа №5 аусзуҩцәагьы.
АААК ауснагӡарартә маӡаныҟәгаҩ Инар Гыцба иаазгәеиҭеит акциа макьана ихыркәшам ҳәа.
«Аҵлақәа еиҭаҳаны ҳалгеит, уажәшьҭа ҵлашьапыцыԥхьаӡа авара аӷәы ҳаргылоит иҭахаз ихьӡ, ижәла анҵаны, иоуз амедалгьы ҭаԥҟаны иарбахоит. Уажәы аҵеицәа рыуацәеи рҭынхацәеи ҳареи ҳаимадоуп, еиуеиԥшым акәама-ҵамақәа рҭыԥ иқәаҳҵоит», – иҳәеит Гыцба.
Акыршықәса Аҳабла ҿыц аҟны инхо Борис Ҳаџьымба Аконгресс акоманда алахәцәа иҭабуп ҳәа реиҳәеит.
«Уажәшьҭа сықәра иснаҭом акәымзар, уа сшәывагылон, аха усгьы гәыла сшәыцуп. Анцәа шәиныҳәааит. Даара иҭабуп ҳәа шәаҳҳоит абри аус азы», – иҳәеит Ҳаџьымба.
Аҳабла ҿыц аҟны инхо Рустам Занҭари иҳәеит ихәыҷқәа иманы лассы-лассы абри апарк аҟны дшынеиааило, АААК имҩаԥнаго акциагьы ахә ҳаракны ишьеит – ариаҵәара аус анахысгьы, арккаратә ҵакы амоуп ҳәа азгәаҭаны.
«Зегь рыла садгылоит имҩаԥыжәго акциа, егьа жәашықәса ҵыргьы иҭахаз ҳашьцәа ҳхашҭыр ҟалаӡом, урҭ ргәалашәара ҳацзароуп, абас еиԥш иҟоу аусқәа рыбзоурала иҳарҿыцлароуп иҳамоу адыррақәа. Уи анаҩсгьы, аҵла ԥшӡақәа еснагь уаҩы игәы шьҭызхуа, аҳауа зрыцқьо ԥсабаратә ҳамҭоуп», – иҳәеит иара.
Адунеизегьтәи аԥсуа-абаза конгресс хара имгакәа агәалашәаратә ӷәқәа ркыдҵара иалагоит. Ари аус рхы аладырхәыр рылшоит згәы иаҭаху зегьы.
шәҭалароуп, ма шәыҽҭажәыҩроуп.