Адунеизегьтәи аԥсуа-абаза конгресс АААК Аҭыԥантәи аҟәшақәеи аҿар рактивреи ҳәаақәызҵо имаҵураҭыԥ аанкыларазы аконкурс рыланаҳәоит.

АААК аппарат анапхгаҩы Кан Ҭаниа еиҭеиҳәеит, иахьазы еидкылоу Аконгресс акоманда – хҭак еицҭазыршәуа, зҳәоу еиқәшәо коллективуп ҳәа, уи аҿаԥхьа иқәгылоу адҵақәагьы даара рҵакы дууп: аԥсуа-абаза жәлар ретнокультуратә акзаара арӷәӷәара, ахатәы бызшәа аиқәырхареи арҿиареи, иара убас амилаҭтә традициақәеи акультуреи реиқәырхара, Аԥсны аҩнуҵҟеиԥш адиаспора жәпаҩны иахьықәынхо атәылақәа рҟынгьы.

Иара иазгәеиҭеит Аконгресс апрограмма иалахәхо рхыԥхьаӡара есышықәса ишацло, иара аусура амҽхакгьы еиҳа-еиҳа аҽахьарҭбаауа иаҿыбааны. Убри аҟнытә аусзуҩцәа ҿыцқәа аҭаххо иалагоит, Аконгресс ишьҭнахыз атемп мырӡкәа ԥхьаҟа еиҳангьы аус аулартә еиԥш.

«Ҳара иаҳҭахуп активра злоу, иҵауланы ихәыцуа, зыԥсадгьыли зыжәлари гәыкала ирзыҟоу, змилаҭтә ҵас-қьабзқәа ҳаҭыр рықәызҵо ауаа. Ҿыц иҳадаҳкыло аусзуҩ ихадароу иуалԥшьақәас иаҳбо, раԥхьаӡа инаргыланы – аҭыԥнтәи аҟәшақәа аус рыцура, апроектқәа рынагӡара, Аԥсны иахьаҵанакуа аҟәша ҿыцқәа раартра аганахьала аусура уҳәа абарҭ роуп», – иҳәеит Ҭаниа.

Иара иациҵеит, Аконгресс, Иреиҳаӡоу ахеилак ахантәаҩы Мусса Егзакь имодель ала аус зуа аиҿкаара аҳасабала, ишазыԥхьагәанаҭо уи аусзуҩцәа зегьы иҟоу рбо-ираҳауа, ирдыруа аҟазаара. Убри аҟнытә аусзуҩ ҿыц аконкурстә шьаҭала дыԥшаазарц ӡбан.

«Ҳара агәра ганы ҳаҟоуп, абри амҩала дшаҳаԥшаауа зеиӷьыҟам ала Аконгресс аԥҟаԥҵәатә хықәкқәа рынагӡара ианаалаша ауаҩы», – иҳәеит Кан Ҭаниа.

АААК ауснагӡаратә маӡаныҟәгаҩ Инар Гыцба иакәзаргьы, иҳәеит Аконгресс акоманда ҿыц ирыднагало аусзуҩ акырӡа иқәгәыӷуеит ҳәа, ламысцқьала, ихы азышьҭны иуалԥшьақәа наигӡалап ҳәагьы агәыӷра шрымоу азгәеиҭеит.

«Ҳгәы иаанагоит, аконкурс аҳәаақәа ирҭагӡаны имҩаԥаҳго аԥышәарақәа ирылҵшәаны зегь реиҳа ари аусура ианаало, згәы азыҳәо акандидат дҳаԥшаауеит ҳәа. Ҳара баша аусзуҩ иакәӡам ҳзышьҭоу, ҳкоманда иахәҭакхо, аӡәы ҳәа ҳзықәгәыӷуа иоуп. Ари аҭыԥ аҟны сара избо ҳколлега – активра злоу, зегьы ззеиԥшым, ақәҿиара аиура иашьҭоу, зыхшыҩ ҵару иакәны дыҟоуп», – иҳәеит Гыцба.

Иара иазгәеиҭеит аусзуҩ ҿыц уадаҩрада АААК аколлектив дахәҭакхоит ҳәа, нсгьы уи амчхара ишазирҳауа ала агәра ганы дшыҟоу. Аконгресс акоманда аус ацура аинтерес ду ацуп ҳәагьы ациҵеит ауснагӡаратә маӡаныҟәгаҩ.

Иара иажәақәа рыла, Аконгресс аусура хадаратәла аԥсуа-абаза милаҭ ретнокультуратә хаҿра аиқәырхара иахьазынархоу аҟынтә, ари аус иазааԥсо зегьы ажәлар ирымадазроуп, ирыҿцаалароуп.

«Убри азы, ҳара иҳавагыларц ҳаззыԥшу ауаҩы иуникалтәу ҳкультура иахӡыӡаауа, арҿиаратә хәыцшьа змоу иакәзароуп. Ҳара даара абаҩхатәра злоу аҿар ҳамоуп. Убри аҟнытә ҳгәы иаанагоит, аконкурстә шьаҭала акадрқәа ралхра иабзоураны иахьынӡауа ирацәаҩны амаҵураҭыԥ азыԥшааҩцәа еиҟароу алшарақәа ҳазрыҭап ҳәа, иара убасгьы ҳхаҭакәа алшара ҳауеит зхаҭалатә ҟазшьақәеи зыпрофессионалтә ԥышәеи зегь рыла АААК ахыдҵақәа рынагӡара иақәшәо акандидат далҳаԥшаарц. Насгьы, аконкурс аԥышәарақәа рыбзоурала акадртә резерв ҳзышьақәыргылар ауеит ҳәа агәыӷра ҳмоуп, наҟ-наҟ ҳаԥхьаҟа абарҭ ауаа Аконгресс аусура иазхьаҳарԥшлартә еиԥш», – иҳәеит Инар Гыцба.

Аконкурс аԥҟарақәа

Актәи аетап. Жәабран 10 инаркны амза 20 рҟынӡа аконкурс алахәхара згәы иҭоу ранкетақәа ҳадаҳкылоит. Урҭ 25 шықәса зхыҵхьоу Аԥсны атәылауаа ракәзароуп. Ихарҭәаау анкета хаҭала иаажәгар шәылшоит АААК аофис ахь, асааҭ 9:00 инаркны 18:00 рҟынӡа, мамзаргьы абри аелектронтә ԥошьҭахь иаашьҭызар ҟалоит info@abaza.org. 

Аҩбатәи аетап аҟны анкета алазҵаз онлаин-ԥышәара иахрыжьуеит. Акандидатцәа 25 зҵаара рҭак ҟарҵароуп 30 минуҭ ирылагӡаны. Аилыркааратә литература, амобилтә

хархәагақәа, мамзаргьы аинформациа ныҟәызго иарбанзаалак егьырҭ амыругақәа уцурхыраар ҟалаӡом.

Ахԥатәи аетап аҟны акандидатцәа хаҭала ирыҿцәажәоит. Аиҿцәаажәара мҩаԥыргоит АААК Аҟәатәи аофис аусзуҩцәа рыла ишьақәгылоу аконкурстә комиссиа алахәцәа.

Акандидат ипрофессионалтәи хаҭалатәи иҟазшьақәа рыхә ашьараан аконкурстә комиссиа зықәныҟәо аваканттә маҵураҭыԥ иақәшәо аквалификациатә ҭахрақәеи арегламент аҟны иарбоу егьырҭ аԥҟарақәеи ракәзаауеит. Аконкурстә комиссиа азин амоуп убасгьы аконкурс аҟны аиааира зымгаз, аха зыпрофессионалтәи зхаҭалатәи аҟазшьақәа ахәшьара ҳаракы зауз акандидат акадртә резерв иалаҵаразы абжьгара аҟаҵара.

Аԥшьбатәи аетап – АААК ИА ахантәаҩы Мусса Егзакь иҿцәажәра, онлаин. Аԥшьбатәи аетап алҵшәақәа рыла иалкаахоит мызкы ҿҳәарас измоу, зыхә ахшәаау аԥышәараамҭа иахысуа ҩыџьа акандидатцәа. Абри аԥышәараамҭа анхыркәшахалак зынӡа ҳәа аусура ирго аӡәы далкаахоит.

Анкетақәа рыдкылареи хаҭалатәи аиҿцәажәарақәеи мҩаԥысуеит абри аҭыӡҭыԥ ала: Аԥсны, Аҟәа ақалақь, Лакоба имҩа, 109, Адунеизегьтәи аԥсуа-абаза конгресс аофис. Азҵаарақәа шәымазар, шәҳадҵаалар ҟалоит абри аҭел ала шәасны: +7 840 226-25-26