Адунеизегьтәи аԥсуа-абаза конгресс Иреиҳаӡоу ахеилак ахантәаҩы Мусса Егзакь Аконгресс ИА алахәцәа адыԥхьаланы 2021 шықәса еихызшьаало аилатәара мҩаԥигеит.

Саид Барганџьиа

Адунеизегьтәи аԥсуа-абаза конгресс Иреиҳаӡоу ахеилак еизеит ԥхынҷкәын 22 рзы, ииасуа 2021 шықәса алҵшәақәа рылацәажәаразы, иара убас ҳазҭало ашықәс ҿыц азы апланқәа рышьақәырӷәӷәаразы. Аиԥылара лабҿаба имҩаԥысит Аҟәа иҟоу Аконгресс аофис аҟны, Иреиҳаӡоу ахеилак алахәцәақәаки уи ахантәаҩы Мусса Егзакь ихаҭеи аиԥылара иалахәын онлаин ҳасабала.

Уажәшьҭа традициала ишаԥу еиԥш, аиԥылара ааиртит Мусса Егзакь, иара еизаз зегьы аԥсшәа реиҳәан, аиԥылара аартуп ҳәа рылеиҳәеит. Егзакь адырра ҟаиҵеит аилатәара аусутә хәҭа Аконгресс амаӡаныҟәгаҩ Инар Гыцба ишымҩаԥиго.

«Инар ажәа исҭаанӡа, хаҭала идысныҳәаларц сҭахуп Мураҭ Махариа Аԥсуафед ахантәаҩыс дахьалху. Ҳусеицура хырҳагахап ҳәа ҳақәгәыӷуеит», – иҳәеит Аконгресс ахантәаҩы. АААК

Иреиҳаӡоу ахеилак алахәыла Мураҭ Махариа ҳазҭоу ашықәс абҵарамзазы Ҭырқәтәыла иҟоу аԥсуа культуратә хеидкылақәа рфедерациа ахантәаҩыс далхын. Абри ахҭыс еиҭаигәалаиршәеит Мусса Егзакь.

Иреиҳаӡоу ахеилак ахантәаҩы иааркьаҿны аилатәара амшхәаԥштә азҵаарақәа рылеиҳәеит. Урҭ хԥа ыҟан: раԥхьаӡа инаргыланы, аилатәара иалахәыз зегьы ирзеиҭарҳәеит Ауаажәларратә еиҿкаара «Адунеизегьтәи аԥсуа-абаза конгресс» 2021 шықәсазтәи аусура имҩаԥгази 2022 шықәсазы аусура аплани, иҩбахаз – Аконгресс Ацентртә ревизиатә комиссиа хада аҳасабырба иазыӡырҩит, аҵыхәтәан азеиԥш зҵаарақәа ирыхәаԥшит.

Иреиҳаӡоу ахеилак алахәылацәа амшхәаԥштә анышьақәдырӷәӷәа ашьҭахь, Инар Гыцба еиҭеиҳәеит АААК 2021 шықәсазы аусура алҵшәақәа ртәы. Уи иаамышьҭахь ажәа иман Аконгресс Аҭыԥантәи аҟәшақәа рҳәаақәҵаҩ Дмитрии Жьиба. Иара еиҭеиҳәеит Аԥсны иаарту Аконгресс аҭыԥантәи аҟәшақәа ииасуа ашықәс азы усқәас инарыгӡаз атәы.

Уи анаҩс Аконгресс Аппарат анапхгаҩы Кан Ҭаниа дазааҭгылеит аппарат аусуреи, Санкт-Петербурги Москвеи иҟоу Аконгресс аҟәшақәеи русуреи 2021 шықәсазы лҵшәақәас иаарышьҭыз. Абри ашьҭахь Аконгресс аусура иазку аинформациа аларҵәара аганахьала иҟаҵоу лҳәеит АААК Аинформациатә портал анапхгаҩы Амина Лазԥҳа. Аконгресс имҩаԥнагаз агәыҳалалратә акциақәа еиқәылԥхьаӡеит ауаажәларра рымадаразы аспециалист Изольда Ҳагԥҳа. Адунеизегьтәи аԥсуа-абаза конгресс ԥхьаҟатәи агәҭакқәас иамоу ртәы еиҭеиҳәеит АААК Аппарат аспециалист хада Ҭемыр Рекәаа. Ииасуа ашықәс азы Ацентртә ревизиатә комиссиа аҳасабырба даԥхьеит АААК Арегионалтә ҟәша анапхгаҩы Рамазан Мыхц.

Доусы ражәахәқәа зегьы аныҟарҵа ашьҭахь дықәгылеит Мураҭ Махариа. 2021 шықәсазыы имҩаԥгаз аусуразы АААК ИА ахантәаҩы Мусса Егзакьи Аконгресс аусзуҩцәеи иҭабуп ҳәа раҳәаны, иара иазгәеиҭеит Ҭырқәтәыла иҟоу аԥсуа-абаза диаспореи Аконгресси реимадарақәа еиҳа ишырӷәӷәалатәу. Аԥсуафед ахантәаҩ ҿыц имӡакәа иҳәеит ииасыз ашықәсқәа рзы аҩ-еиҿкаарак русеицура еиҳагьы игәылҭәаазар ауан ҳәа.

Махариа дақәгәыӷуеит ҳазҭало ашықәс азы Ҭырқәтәыла имҩаԥысып ҳәа Аконгресс ахаҭарнакцәеи аԥсуа-абаза диаспореи реиԥылара.

Аҭоурыхтә ԥсадгьыл архынҳәразы аҳәынҭқарратә еилакы ахантәаҩы, АААК Иреиҳаӡоу ахеилак алахәыла Вадим Ҳаразиа аҩынтә раан Аконгресс ИА аилатәарақәа дрылахәуп (иара Аконгресс Апрезидиум далоуп, избан акәзар АААК Аԥҟаԥҵәа ишаҳәо ала, Арепатриациазы аҳәынҭқарратә еилакы ахантәаҩы Апрезидиум дахәҭакхоит).

«Сеигәырӷьеит сҩызцәа рбара. Иахьа сызхагылоу аилак ахьӡала акы-ҩба ажәалагала ҟасҵеит. Сгәанала, ҳара зегь иаҳҭаху акоуп, доусы ҳхырхарҭала ҳхатәы бызшәеи ҳкультуреи аиқәырхара ҳашьҭоуп. Сгәыӷуеит, сара исҳәазгьы Аконгресс аусзуҩцәа ргәаҟынӡа инеип ҳәа. Жәаҳәарада, ҳара аусеицура ҳазыхиоуп, даҽакалагьы ҳхаҿы иаҳзаагом Аконгресс ҳаваргыламкәа, ҳдиаспора ахаҭарнакцәа адымԥхьалакәа аусура», – иҳәеит Ҳаразиа.

Адунеизегьтәи аԥсуа-абаза конгресс аусура ахә ҳаракны ишьеит АААК Иреиҳаӡоу ахеилак алахәыла Виачеслав Чрыгба. Лымкаала иҭабуп ҳәагьы иеиҳәеит уи ахантәаҩы Мусса Егзакь.

«Иахьатәи ҳаилатәара зеиԥшла агәахәара ду сзыннажьит. Аконгресс аколлектив, уи аҟәшақәа зегьы ирыдысныҳәалоит рықәҿиарақәа! Сгәанала, шә-процентк рыла аус руит, русурагьы алҵшәа бзиаӡақәа аанашьҭит, избан акәзар ахаԥшьагара бзиақәа, аинтерес зҵоу апроектқәа даара ирацәан, АААК аҭыԥантәи аҟәшақәагьы хыԥхьаӡара рацәала иаатит Аԥсны ақыҭақәа рыҟнеиԥш, ҳтәыла анҭыҵгьы. Абри зегьы ахала иҟамлаӡеит, аџьабаа ижәбаз иалҵшәоуп, шәус гәыкала шәзаҿу ҩашьом. Уи еиҳау иҟоузеи, угәы шьҭнахуеит зегь рыла», - иҳәеит иара.

Ааилатәара аихшьаалақәа ҟаиҵеит Мусса Егзакь.

«Агәра ганы сҟоуп, ҳҿаԥхьа иқәҳаргыло ахыдҵақәа шынаҳагӡо. Зегьы иреиҳау ус дуны ҳазхәаԥшуа – ҳмилаҭ ахаҭарнакцәа зегьы-зегьы, иахьыҟазаалакгьы, зҳәоу еиқәшәоу ҭаацәара дукны реидкылароуп, жәларыкны ҳаиқәхарц, ҳбызшәеи, ҳкультуреи, ҳқьабзқәеи ҳцәымӡырц. Ҳкультуроуп ҳзырӷәӷәо, адоуҳамч ду ҳазҭо. Аӡәыкны ҳҟалар, ҳаизыӡырҩлар, ҳаилибакаалар, нас Анцәа имчала ҳусқәагьы зегь рҭыԥ иқәаҳҵоит. Лассы-лассы ҳаицәажәалароуп, ҳаибабалароуп, аус ҳаулароуп. Ҿыӷәӷәала исҳәар сылшоит: ҳагәҭакқәа зегь нагӡатәуп, иагьынаҳагӡоит», - ҳәа иажәа хиркәшеит иара.

Адунеизегьтәи аԥсуа-абаза конгресс Иреиҳаӡоу хеилак аилатәарақәа еиԥҟьарада имҩаԥысуеит ирзалху аамҭазы. Уаанӡатәи аиԥылара мҩаԥысит Мусса Егзакь Аԥсны дааны даныҟаз – хәажәкырамзазы. Уажәтәи аилатәара иалахәын: Мусса Егзакь, Инар Гыцба, Вадим Ҳаразиа, Виачеслав Чрыгба, Марина Барцыц, Инвер Алшәындба, Аҳмаҭ Ҳапат, Ерџьан Башныхә, Меҳмеҭ Али Дохма, Ведат Мекер, Мураҭ Махария, Анвар Чкәуа, Ерқан Ҳаџьымба, Натали Лазба, Беслан Кәабахьиа, Мураддин Урчыҟәа, Владимир Ԥшьеноҟәа, Руслан Ҟарма, Рамазан Мыхц, Заур Ӡыгәа, Армида Чагәа, Мухадин Шенкао, Мураҭ Мыкәа.

Адунеизегьтәи аԥсуа-абаза конгресс 2021 шықәсазы имҩаԥнагаз аусқәа ирызку инарҭбаау аинформациа шәоур шәылшоит ԥхьаҟатәи ҳанҵамҭақәа рҟны.