Аԥсны акоронавирустә ҿкы аламырҵәаразы аԥкрақәа шалагалац иҟоуп.
Мшаԥы 6 рзтәи адыррақәа рыла Аԥсны акоронавирустә ҿкы аӡәгьы идбалаӡам, атәылаҿы активла аҿкы аҿагылара иазынархоу аусхкқәа мҩаԥысуеит. Абыржәтәи аамҭазы COVID-19 иадҳәалоу аҭагылазаашьа зеиԥшроу иалацәажәон Ауааԥсыра акоронавирустә ҿкы рацәыхьчаразы акоординациатә штаб аилатәараҿы, Аԥсны ахада инапынҵақәа назыгӡо Валери Бганба далархәны.
«Иҳагу ахьыҟоу ҳусура ҳарӷәӷәароуп»
Валери Бганба Ахада иусбарҭа аусзуҩцәа рнапы ианиҵеит Аԥсны аҳәаа иахысуа зегьы аамҭала рыԥхьакразы аусдҵа аздырхиарц. Иара иазгәеиҭеит атәылаҿы аҭагылазаашьа ҷыда алагалоуижьҭеи мчыбжьык шҵыз.
«Ари аамҭа иалагӡаны изыхәҭоу аҳәынҭқарратә маҵзурақәеи аусбарҭақәеи ҳауаажәлар ачымазара ҿкы рацәыхьчаразы иаҭахны иҟаз аусқәа нарыгӡеит. Хырхарҭақәак рыла аусура еиқәшәаны имҩаԥысуеит, аха иҟоуп џьара-џьара аиԥҟьарақәа ахьыҟоугьы, убра аусқәа еиҳагьы ирӷәӷәатәуп», – иҳәеит ахада инапынҵақәа назыгӡо.
Аилатәара иалахәыз рҿаԥхьа дықәгылеит Акоронавирустә ҿкы аламырҵәаразы аоперативтә штаб аиҳабы, агәабзиарахьчара аминистр Ҭамаз Ҵахнакьиа. Иара адырра ҟаиҵеит, зынӡа акоронавирус аарԥшразы ишымҩаӷаз 86 гәаҭара, урҭ рахьтә ԥшьҩык рылҵшәа агәҩара унаҭон азы ҩынтә агәаҭара иахысит. Иара иациҵеит агәаҭарақәа зегьы акоронавирус шаадмырԥшыз.
«Арҭ амшқәа рзы Агәабзиарахьчара аминистрра иаиураны иҟоуп даҽа 600 тест», – иҳәеит Ҵахнакьиа.
Аилатәараҿы дықәгылеит Ауааԥсыра акоронавирустә ҿкы рацәыхьчаразы акоординациатә штаб алахәҩы, Аԥсны адәныҟатәи аусқәа рминистр Даур Ақаҩба. Иара иазгәеиҭеит еиуеиԥшым жәларбжьаратәи аиҿкаарақәа Аԥсны ацхыраара аҭара ишазыхиоу акоронавирустә ҿкы аҿагылараҿы.
«Иаҳҳәап, ПРООН (Еидҵоу Амилаҭқәа Реилазаара Аҿиара Программа – аред.) азыхиоуп Аԥсны иҟоу рыҟәша аԥара ԥыҭк аҭара ауааԥсыра ачымазара ҿкы рацәыхьчара иазынархоу апрограммақәа рынагӡаразы», – иҳәеит иара.
COVID-19 аарԥшра акәамаҵамақәеи амедикцәа рзы атренинги
Аоперативтә штаб иалахәу Аԥсны Аҭҵаарадыррақәа ракадемиа иатәу Аексперименталтә патологиеи атерапиеи ринститут адиректор аҭҵаарадырратә усуразы ихаҭыԥуаҩ, аиммунологиеи авирусологиеи рлабораториа аиҳабы Алиса Матуаԥҳа еиҭалҳәеит атәылаҿы акоронавирус аарԥшразы аҭҵаарақәа шымҩаԥысуа. Лара иазгәалҭеит ари апроцесс х-етапкны ишеихшоу.
Раԥхьатәи аетап аан амедицинатә усзуҩцәа абиологиатә материал ргоит ауаҩы ибронхқәеи, ирыԥҳақәеи, нас урҭ ирҭоу ацәаакыреи рҟынтә, ишьеи ирымӡи ҭырҵаауеит, иара убас иԥынҵеи ихәдеи рҟынтә ахьшьқәа ргоит. Анаҩс еизгоу абиоматериал рышьҭуеит Асанепидемстанциа алабораториахь, уаҟа аспециалистцәа иахәҭоу аҭҵаарақәа мҩаԥыргоит. Анализ алҵшәақәа рыгәра умго иҟазар, апациент иматериал иҵегь иҭҵаахоит, анаҩс аҵыхәтәантәи алҵшәа шьақәыргылахоит.
Алиса Матуаԥҳа иазгәалҭеит, ахьшьы ҭызго амедицинатә усзуҩ апациент аҿкы изиркӡом ҳәа, избанзар аматериал злаҭырго амарҭхәқәа зегьы цқьоуп, доусы рыҭра иҭоуп, апациент ила ишабо ихдыртлоит.
Мшаԥы 6 рзы Аоперативтә штаб имҩаԥнагеит амедиаҳәшьцәеи алаборантцәеи рзы атренинг. Атренинг мҩаԥыргеит аоперативтә штаб алахәцәа: Аҟәа асанитартә ҳақьым хада Алла Белиаевеи, Аексперименталтә патологиеи атерапиеи ринститут аиммунологиеи авирусологиеи рлабораториа аиҳабы Алиса Матуаԥҳаи.
Атренинг алахәцәа ирзеиҭарҳәеит акоронавирустә ҿкы змоу апациентцәа аус рыдулараан ашәарҭадара аԥҟарақәа, апациентцәа рҟынтә абиологиатә материал ииашаны агашьа ддырбеит.
Аоперативтә штаб адыррақәа
Амедицинатә зҵаарақәа рзы Аоперативтә штаб аиҳабы ихаҭыԥуаҩ, Агәабзиарахьчара аминистр ихаҭыԥуаҩ Алхас Кәанџьариа Аԥсны акоронавирустә ҿкы аламырҵәаразы аԥкрақәа алагалоуижьҭеи есыҽны ауааԥсыра иҟоу-иану азы адырра риҭоит.
«Ииасыз уахыки-ҽнаки рыла акоронавирус аарԥшразы алабораториатә гәаҭара дахысит аӡәы. Иара акоронавирус идбаламызт. Гәдоуҭатәи араионтә хәышәтәырҭа хадаҿы ишьҭоуп акоронавирус агәҩара ззыҟоу ҩыџьа апациентцәа. Урҭ ргәаҭара алҵшәақәа шааҳаулак еиԥш адырра шәаҳҭоит. Аимадаратә центр иаднакылеит 200-ҩык рҭел асрақәа», – иҳәеит Кәанџьариа.
2020 шықәса хәажәкыра 24 инаркны Аԥсны аиҳабыра ауааԥсыра акоронавирустә ҿкы COVID-19 рацәыхьчаразы аԥкрақәа аланагалеит – иаанкылоуп ауаа рацәа еизызго аусмҩаԥгатәқәа, иаркуп аҵаратә усбарҭақәа, аҳәынҭқарратә усбарҭақәа русура ҳәааркуп, иаркуп аџьармыкьақәеи ахәаахәҭратә ҭыԥқәеи, афатә-ажәтәи ихымԥадатәу атауарқәеи ахьырҭиуа аҭыԥқәеи аԥҭекақәеи рыда, ауааԥсыра реиҭанеиааира ԥкуп, иара убас егьырҭ аԥҟарақәа алагалоуп.
Хәажәкыра 28 раахыс атәылаҿы иалагалоуп Аҭагылазаашьа ҷыда: аамҭала иаркуп аԥсуа-аурыс ҳәаа адипломатцәеи аруааи рыда атәымуаа зегьы рзы, зыԥсадгьыл ахь ихынҳәуа Аԥсны атәылауаагьы аҳәааҿы ргәаҭара акыр ирӷәӷәоуп.
Аԥсуа наплакцәа иаԥырҵаз агәыҳалалратә хеилак «Ҳара ҳаидгылоуп» алахәцәеи Москватәи аԥсуа диаспора ахаҭарнакцәеи алаҳәара ҟарҵеит Аԥсны ауааԥсыра акоронавирус раҿагылараҿы ацхыраара рыҭаразы аԥара шеизырго. Иахьазы еидкылоуп 50 миллион мааҭ инарзынаԥшуа аԥара.
Аԥсны акоронавирустә чымазара ҿкы COVID-19 аҿагылараҿы ацхыраара азҭарц зҭаху зегьы рзы алшара ыҟоуп рыхәҭалагала ҟарҵарц – Москватәи Аԥсуа Диаспореи «Ҳара ҳаидгылоуп» ахеилаки ирымоу реквизитқәа рахь доусы илшо алаҵарала Аԥсныи Урыстәылатәи Афедерациеи рҟынтә, иара убас Адунеизегьтәи аԥсуа-абаза конгресс ареквизитқәа рахь – Ҭырқәтәылантә, ма Аконгресс асаит аҟны онлаин-ԥарашәара амҩаԥгара. Еизгахо аԥара зегьы Аԥсны ауааԥсыра аҿкы чымазара рацәыхьчареи ргәабзиара ашьақәыргылареи иазкхоит.
шәҭалароуп, ма шәыҽҭажәыҩроуп.