Урыстәылатәи ашьапылампылтә клуб «Зенит» академиа хара имгакәа Аԥсны ахатә филиал аанартуеит.
Еицырдыруа ахәыҷтәы-қәыԥшратә шьапылампылтә школ "Газпром" - Санкт-Петербургтәи Ашьапылампылтә клуб "Зенит" Академиа ахатә филиал аанартуеит Аԥсны. Уи аныҟало арыцхә хара имгакәа ирылаҳәахоит. Абри атәы еилкаахеит Адунезегьтәи аԥсуа-абаза конгресс Иреиҳаӡоу ахеилак ахантәаҩы Мусса Егзакьи ашкол анапхгареи реиқәшәараан жьҭаара 19 рзы.
АК «Зенит» академиа иатәу азыҟаҵаҩцәа рзанааҭдырра аизырҳара ацентр адиректор Сергеи Морозов иажәақәа рыла, Академиа аиҳабыра ари аидеиа иазааит Аԥснытәи ашьапыламплтә командақәак рыхәмаршьа анырба ашьҭахь.
«Даара узызҿлымҳахаша аҿарацәа ыҟоуп. Аԥсны еиҵарааӡахьеит иналукааша ашьапылампыласыҩцәа маҷҩымкәа», – ҳәа ахәшьара ҳаракы ҟаиҵеит Морозов, иагьациҵеит: «Иҟалап, ара еиқәшәазар аус ахьызуа ашьапылампылтә клуб аинтересқәеи хаҭала сара Аԥсны аганахьала исымоу агәыбылреи, гәыкала шәтәыла сацхраар сҭахуп».
Сергеи Морозов иазгәеиҭеит убасгьы, Аԥсны ишырацәоу «абаҩхатәра зшьа иаланы ииуа» аспортсменцәа, аладахьтәи аҷкәынцәа зегь реиԥш аԥсуа шьапылампыласцәагьы «ирласны иҩуеит, акыр рылаӡоит, агәамч ду рымоуп, агәаӷь рызҭоуп» ҳәа. Аха ус шакәугьы, иара излаиԥхьаӡо ала, иахьа Аԥсны ашьапылампыласцәа рыспорттә ҟазара 11-12 шықәса рхыҵаанӡа ауп ашьҭыхра анрылшо, уи нахыс аус рыдызулаша, ақәыԥшцәа рыҩаӡара ҳаразкша азыҟаҵаҩцәа ыҟам.
«Убра ианнеилак иаангылоит, нас ишнеи-шнеиуа ашьапылампыл аинтерес рцәыӡуеит, раԥхьаҟа ԥеиԥш дук рбаӡом азы ргәы ацәыԥсуеит», – иҳәеит Морозов.
Иара еиҭеиҳәеит «Зенит» академиа ишымҩаԥнагахьоу Аԥснытәи азыҟаҵаҩцәа рзанааҭдырра аизырҳара акурсқәа. Аԥсуа зыҟаҵаҩцәа даара иазхьаԥшит ари аус, иааидкланы 34-ҩык алахәын арҭ акурсқәа. Урҭ рахьтә аӡәырҩы ԥхьаҟагьы аус рыцура иацнаҵоит Академиа.
«Аттестациа зауз 34-ҩык азыҟаҵаҩцәа рахьтә ҳара иалаҳкааит 14-ҩык. Ари даара илҵшәа бзиоуп», – иҳәеит Сергеи Морозов.
Ашьапылампылтә клуб «Зенит» академиа адиректор Анатоли Давыдов иакәзаргьы иҳәеит Академиа аҽазыҟаҵарақәа шымҩаԥысуа ҳаамҭазтәи аметодика инақәыршәаны, иахьатәи ашьапылампыл иаднакылахьоу аҿыцрақәа зегь ахархәара рыҭаны. Иара иазгәеиҭеит «Зенит» академиа анапхгара ргәы ишҭоу Аԥсны иахьаҵанакуагьы аҽазыҟаҵаратә хәмаррақәа рымҩаԥгара.
«Уа иҟоу аинфраструктурагьы аҳауагьы ҳнаалоит ҳара зегь рыла. Аԥсныҟа ҳцалоит агәабзиаразы, уа ҳазцыхәмаршагьы ҳауеит, хымԥада. Аԥснытәи азыҟаҵаҩцәа рзанааҭдырра арҳаракра иацаҳҵалоит ацентр аҟны. Аҭыԥантәи ақәыԥшцәа реихьӡарақәа гәахәарыла ҳрыцклаԥшлоит, атурнирқәа рахь ааԥхьара раҳҭалоит», - ҳәа игәҭакқәа ҳацеиҩишеит АК «Зенит» академиа адиректор.
Аԥсны «Зенит» ашьапылампылтә школ аартра ахҳәаа азуа Адунеизегьтәи аԥсуа-абаза конгресс Иреиҳаӡоу ахеилак ахантәаҩы Мусса Егзакь иҳәеит ари апроект анагӡареи иара «Зенит» академиа анапхгара рԥылара ахаҭеи алыршахеит ҳәа аԥсуа наплакҩы Борис Џьергьениа ибзоурала.
«Борис Џьота-иԥа Џьергьениеи ашьапылампыласцәа хьӡырҳәагақәеи, азыҟаҵаҩцәеи, «Зенит» академиа анапхгареи ибзианы еибадыруеит. Убарҭ реиҩызаратә еизыҟазаашьа иахылҿиаауеит Аԥсны ахәыҷтәы-қәԥшратә шьапылампыласратә школ аартра иазку апроект бзиахә. Уи абзоурала зыҩаӡара ҳараку аспортсменцәеи азыҟаҵаҩцәеи реиҵааӡара алыршахоит. Ус анакәха, ҳҿар алшара шьахә роуеит бзиа ирбо аспорт аҿы еизҳаларц, раԥхьаҟагьы аԥеиԥш шырзыԥшу дырны» - иҳәеит Егзакь.
АААК ИА ахантәаҩы иазгәеиҭеит убасгьы Аԥсны ашьапылампыл бзиа избо шырацәаҩу. Иара агәра ганы дыҟоуп «зегьы рҽазыршәалоит ҳәа «Зенит» ашьапылампылтә академиа аанахәара».
«Аԥсны жәлар ари алшара рхы иадырхәоит абаҩхатәра злоу аҿарацәа раарԥшразы, аспорт аусқәа ирҿу аҳәынҭқарратә мчра аусбарҭақәа «Зенит» академиа алархәны иаԥырҵалоит ҳшьапылампыласцәа инагӡаны рхы аадырԥшларц азы аҭагылазаашьақәа ҳтәыла аҩнуҵҟеиԥш уи анҭыҵгьы», – ҳәа иажәа хиркәшеит Мусса Егзакь.
АК «Зенит» Академиа – ахәыҷқәеи ақәыԥшцәеи ршьапылампыласратә школуп, еицырдыруа Санкт-Петербургтәи ашьапылампыласратә аклуб «Зенит» иатәуп. Академиа хықәкыс иамоуп – аклуб акоманда хада ахьӡала иқәгылаша аспортсменцәа ӷәӷәақәа реиҵааӡара. Ари ашкол ахатә философиа злаҟоу ала, уи аушьҭымҭацәа ашьапылампыл асраҿы иахьҟазацәоу адагьы егьыс азеиԥш ҵара бзиа рымазароуп. Академиа акомандақәа улаԥш здызхало, игәмырҿыӷьгоу ашьапылампыл иасуеит. Аспортсменцәа разыҟаҵараан хаҭа-хаҭала ирызнеиуеит. Ашкол аҽазыҟаҵарақәа зегьы х-категориакны еихшоуп: атехника-тактикатә, атеориатә, апсихологиатә, иҟоуп иара убас абаҩрҵәыратә ҽазыҟаҵарақәа.
шәҭалароуп, ма шәыҽҭажәыҩроуп.