Ԥхынгәы 31 рзтәи адыррақәа рыла, Аԥсны иахьаҵанакуа даҽа х-коронавирустә хҭыс ҿыцк азгәаҭоуп. Уаанӡа ачымазара зыдбалаз апациентцәа руаӡәк иԥсҭазаара далҵит Гәдоуҭатәи ахәышәтәырҭаҿы. Абри атәы аанацҳаит Ауааԥсыра акоронавирустә ҿкы рацәыхьчаразы аоперативтә штаб.

COVID-19 зцәа иаланы иԥсыз апациент 79 шықәса дырҭагылан, иара Гәдоуҭатәи агоспиталь ахь диаган Аҟәатәи ақалақьтә хәышәтәырҭа акардиологиатә ҟәша аҟынтә ԥхынгәы 26 рзы, иҭагылазаашьа акыр иуадаҩны. 

«Иҭагылазаашьа ауадаҩра зыхҟьаз иара имаз аполисегментартә гәаҵәкроуп, иара убасгьы агәы ачымазара иман, [игәеисра] аритм еиқәшәамызт. Аҵыхәтәантәи уахыки-ҽнаки рзы  иҭагылазаашьа иаалырҟьаны еицәахеит, ирыԥҳақәа аҳауа рҭарсрахь ииаган, аха арҭ ареанимациатә усмҩаԥгатәқәа акагьы имыхәеит. Апациент иԥсҭазаара далҵит иԥсыԥлагаҩагареи игәеисреи ахьмаҷхаз иахҟьаны», - аҳәоит аацҳамҭа атекст.

Аоперштаб ишаҳәо ала, иаҳхысыз уахыки-ҽнаки рзы акоронавирус амазааразы агәаҭара иахысит 26-ҩык ауааԥсыра, урҭ рахьтә адиагноз COVID - 19 рзықәыргылоуп хҩык. Ачымазцәа зныруаз егьырҭ ауаа ргәаҭарақәа ирыцҵоуп.

«Иахьазы Гәдоуҭатәи ахәышәтәырҭаҿы ишьҭоуп акоронавирус зцәа иалоу 17-ҩык апациентцәа», – ҳәа аанацҳауеит аоперативтә штаб.

Апандемиа ҟалеижьҭеи Аԥсны иахьаҵанакуа акоронавирус рыдырбалахьеит 84-ҩык ауаа. Урҭ рахьтә 37-ҩык ргәы бзиахеит, хҩык рыԥсҭазаара иалҵит.