Ԥхынгәы 23 рзы Адунеизегьтәи аԥсуа-абаза конгресс Иреиҳаӡоу ахеилак ахантәаҩы абаза жәлар ирыдиныҳәалеит Аԥсны Аҳәынҭқарратә бираҟ амш.
АААК Иреиҳаӡоу ахеилак ахантәаҩы Мусса Егзакь аԥсуа-абаза жәлар ирыдиныҳәалеит Аҳәынҭқарратә бираҟ амш.
Мусса Егзакь Адунеизегьтәи аԥсуа-абаза конгресс ахьӡалеи хаҭала иара иҟынтәи иуаажәлар рахь ааԥхьара ҟаиҵеит, «гәыкалагьы ирыдиныҳәалеит Аԥсны Аҳәнҭқарратә бираҟ амш».
Иара иазгәеиҭеит, 1992 шықәса, ԥхынгәы 23 рзы иуадаҩыз ауаажәларра-политикатә аамҭазы Владислав Арӡынба дызхагылаз Аԥсны Иреиҳаӡоу Асовет ишьақәнарӷәӷәеит ҳәа Аԥсны аҳәынҭқарратә бираҟи агерби.
«Ари ииашаҵәҟьан ҭоурыхтә хҭысхеит, ҳажәлар рмилаҭтә-хақәиҭратә қәԥараҿы акрызҵазкуа етапхеит», - ҳәа ациҵеит иара.
Мусса Егзакь иазгәеиҭеит убасгьы 2005 шықәса, рашәара 3 рзы Аԥсны аҩбатәи ахада Сергеи Багаԥшь инапы шаҵаиҩыз «Аԥсны агәалашәаратәи аныҳәатәи амшқәа рзы» азакәан аԥсахрақәа, уи нахысгьы ԥхынгәы 23 – официалла Аԥсны Аҳәынҭқарратә бираҟ иамшны ишьақәыргылан.
Аконгресс Иреиҳаӡоу ахеилак ахантәаҩы иадныҳәалараҿы иҳәеит 1992-1993 шықәсқәа рзтәи Аԥсны жәлар рџьынџьтәылатә еибашьраан аҳәынҭқарратә бираҟ Аиааира аагара иасимволхеит ҳәа, иахьа акәзар «ҳаамҭазтәи аҳәынҭқарра қәҿиарала ԥхьаҟа ацара, аҿиара ҵаҵӷәыс иамоуп ҳәа».
«Имҳәакәа сзавсуам, исызгәакьоу Абазашҭаҟынгьы ари арыцхә азгәарҭоит, Аԥсны абираҟ амши Абаза жәлар ркультура амши ҳәа еидкыланы, адунеи зегьы жәларыкны ҳшыҟоу дырбауа. Ҳбираҟ ԥшӡа – аԥсуа-абаза жәлар ахаҭарнакцәа зегь еидзкыло символуп, адунеи ҭыԥс иахьынхозаалакгьы. Акыр иаԥсоу сашьцәеи саҳәшьцәеи абри аныҳәамш аҽны ишәзеиӷьасшьоит аманшәалара, аҳәоуеиқәшәара», – иҳәеит Мусса Егзакь.
Иахьатәи Аԥсны аҳәынҭқарратә бираҟ шьақәыргылан 1992 шықәса, ԥхынгәы 23 рзы Аҟәа, Аԥсны Иреиҳаӡоу Асовет аилатәараҟны, 1978 шықәсазтәи Аԥснытәи АССР Аконституциа амчра аанкыланы, 1925 шықәсазтәи Аԥснытәи ССР Аконституциа азыхынҳәра ашьҭахь.
2005 шықәса раахыс Аԥсны Аҳәынҭқарратә бираҟ амш ныҳәак аҳасабала иазгәарҭоит ԥхынгәы 23 рзы. Ари амш азы Аԥнсы зехьынџьара ауаа рацәа еидызкыло агәырӷьаратә усмҩаԥгатәқәа еиҿыркаауеит.
шәҭалароуп, ма шәыҽҭажәыҩроуп.