Аԥсны ахада Аслан Бжьаниеи Адунеизегьтәи аԥсуа-абаза конгресс Иреиҳаӡоу ахеилак ахантәаҩы Мусса Егзакьи аусуратә еиԥылара мҩаԥыргеит.
Адунеизегьтәи аԥсуа-абаза конгресс Иреиҳаӡоу ахеилак ахантәаҩы Мусса Егзакь ҩымш ҳәа Аԥсныҟа иаара иалагӡаны Аԥсны ахада Аслан Бжьаниа диԥылеит. Аиԥылара мҩаԥысит Аԥсны ахада иусбарҭаҿы, сааҭки бжаки рҟынӡа инаӡон. Бжьаниеи Егзакьи реицәажәара ажурналистцәа алахәӡамызт. Аиԥылара анхыркәшаха ашьҭахь апресса рызҵаарақәа рҭак ҟаиҵеит Мусса Егзакь.
«Ҳазлацәажәаз атемақәа иреиуоуп: Аԥсны системала, инеишьҭаргыланы иҿиалартә еиԥш шьаҿақәас иҟаҵатәу, нас иарбан программоу ишьақәыргылатәу ҭаацәацыԥхьаӡа зегьы рҟынӡа инаӡартә, Аԥсны ауааԥсыра зегьы аӡәыцыԥхьаӡа ауаажәларра ргармониатәра аус иалахәызарц, аҳәынҭқарра асоциалтә-економикатә ҿиарагьы иалахщызарц», - иҳәеит Мусса Егзакь.
АААК ахантәаҩы иазгәеиҭеит Тамшь ақыҭаҿы атуристтә комплекс (аурыс инвестор дадыԥхьаланы иргылаз аԥсшьарҭатә комплекс, сынтәа аԥхын иаадыртит – аред.) аргылара ҿарԥшыс иганы Аслан Бжьаниеи иареи аиԥш зеиԥшу аԥсуа қыҭа ҭызгаша аинвестициатә проектқәа ишрылацәажәаз.
«ТамшьVillage» еиԥш иҟоу апроектқәа ақыҭа шьҭырхуеит, ақыҭауаа аусура ҭыԥқәа роуа иҟарҵоит. Аинвестициақәа зыхьчаша аҭагылазаашьақәа аԥҵалатәуп Аԥсны. Аинвесторцәа мшәакәа Аԥсныҟа иааирц азы азакәанԥҵара шырӷәӷәатәу ҳалацәажәеит. Иара убас иаҳҳәеит аԥсуа наплакцәа рхеидкыла шаԥҵатәу, урҭ асоциалтә-економикатә программа еиқәдыршәарц, нас уи аԥсҭазаара аларҵәара иалахәхарц азы», – ҳәа еиҭеиҳәеит Егзакь.
Уи иажәақәа рыла, ахадеи иареи ззааҭгылаз азҵаарақәа иреиуоуп иара убас аԥсуа бызшәа аиқәырхареи арҿиареи, аԥсуа ҭоурыхи акультуреи раларҵәара атемақәа.
«Аԥсуа бызшәа аҿиара иацхрааша платформас иаԥҵатәу ҳалацәажәеит, еиуеиԥшым акультуратә проектқәа, иааидкыланы аԥсуара ашьаҭақәа зырӷәӷәаша», - ҳәа еиҭеиҳәеит Мусса Егзакь, иагьациҵеит Аԥсны ахада Аконгресс аусура ахәшьара ҳаракы шаиҭаз.
«Аслан Бжьани даара дазҿлымҳауп Адунеизегьтәи аԥсуа-абаза конгресс аусура, уи ахә ҳаракны ишьоит, зегь рылагьы дадгылоит» - иҳәеит Аконгресс ахантәаҩы.
Мусса Егзакьи Аслан Бжьаниеи еибырҳәеит излацәажәаз атемақәа анаҩстәи анагӡара роурц азы АААКи Ахада иусбарҭеи рхаҭарнакцәа еиқәшәаны аус еицырулоит ҳәа. Егзакь игәы ишаанаго ала, ари иалҵшәаны Аконгресс аусура еиҳагьы ихырҳагахоит.
Ари уажәшьҭа ҩынтәуп Адунеизегьтәи аԥсуа-абаза конгресс Иреиҳаӡоу ахеилак ахантәаҩы Мусса Егзакьи Аԥсны ахада Аслан Бжьаниеи еиԥылоижьҭеи. Раԥхьатәи русуратә еиԥылара мҩаԥысит ҳазҭоу ашықәс хәажәкырамзазы. Усҟан Аслан Бжьаниа хаҭала АААК аколлектив драбадырырц иҭахны Аҟәа иҟоу Аконгресс аофис даҭааит.
шәҭалароуп, ма шәыҽҭажәыҩроуп.