Ауааԥсыра акоронавирустә ҿкы рацәыхьчаразы аоперативтә штаб адырра ҟанаҵоит Аԥсны иахьаҵанакуа 14-ҩык COVID-19 рыхьит ҳәа, ачымазара ицәа иалоуп иара убас Аԥсныҟа ԥсшьара ҳәа иааз руаӡәкгьы.
Нанҳәа 8 рзы иҟоу аоперативтә дыррақәа рыла, Аԥсны ишьақәыргылоуп акоронавирустә хҭыс ҿыцқәа 14, урҭ рхыԥхьаӡараҿы дыҟоуп ачымазара зыдбалоу раԥхьатәи аԥсшьаҩгьы. Уи ихәышәтәразы Урыстәылаҟа дыргеит. Абри атәы аанацҳауеит Ауааԥсыра акоронавирустә ҿкы рацәыхьчаразы аоперативтә штаб.
Аоперштаб адыррақәа рыла, аҵыхәтәантәи уахыки-ҽнаки ирылагӡаны акоронавирустә ҿкы амазааразы агәаҭара иахысит 149-ҩык ауааԥсыра. Ачымазцәа ирныруаз ауааԥсыра зегьы ргәаҭарақәа макьанагьы ирыцырҵоит.
«Абри аамҭазы Гәдоуҭатәи араионтә хәышәтәырҭа хадаҿы ишьҭоуп акоронавирус зцәа иалоу 42-ҩык апациентцәа», – аҳәоит аоперативтә штаб аацҳамҭа.
Ахәышәтәырҭаҿы ишьҭаз, згәабзиара еиӷьхаз апациенткацәа руаӡәк дылҩаауп, аҵыхәтәан иалҭаз атест ачымазара шлымам аҳәеит. Ус шакәугьы инагӡаны дшьақәгылаанӡа аҩны лҽыԥхьакны дыҟазарц лабжьгоуп ҳәа аҳәоит Аоперштаб аацҳамҭаҿы.
Иахьазы Аԥсны акоронавирус здырбалахьоу рхыԥхьаӡара 134-ҩык ыҟоуп. Урҭ рахьтә 38-ҩык ргәы бзиахеит, хҩык рыԥсҭазаара иалҵит.
Аԥсуа-аурыс ҳәынҭқарратә ҳәаа аартын нанҳәа 1 инаркны. Раԥхьатәи ԥшьымш рыла аҳәаа иахысны Урыстәылантә Аԥсныҟа иҭалаз рхыԥхьаӡара 100 нызқьҩык рҟынӡа инаӡоит.
COVID-19 Кавказ алаҵәара астатистика шәахәаԥшырц шәылшоит абри азхьарԥш шәықәныҟәаны>>
шәҭалароуп, ма шәыҽҭажәыҩроуп.