Саид Барганџьиа

Адунеизегьтәи аԥсуа-абаза конгресси Ауаажәларратә еиҿкаара «Алашареи» еиҿыркааз аконкурс «Етноарт: иаӡәыку, иузеиҩымшо» хацыркхоит лаҵарамза 15 рзы. Аконкурс ахь иаашьҭхо иреиӷьу асахьа рдуны аграффити атехникала ианҵахоит Аҟәа ақалақь Воронов имҩала игылоу аҩнеихагыла аҭӡаҿы, зхышәа-ҵышәара 270 м² инаӡо. Асахьа атема – Иаӡәыку, иузеиҩымшо аԥсуа-абаза жәлар.

Апроект кураторс дамоуп Санкт-Петербург иҟоу АААК арегионалтә ҟәша ахантәаҩы Ҭемыр Рекәаа. Иара еиҭеиҳәеит аконкурс хықәкы хадас иамоу: аԥсуа-абаза жәлар ретнокультуратә акзаара арӷәӷәареи, абаҩхатәра змоу ауаа Аԥсны аҳҭнықалақь ахаҿсахьа аиӷьтәра иадҳәалоу азҵаарақәа разхьарԥшреи. Рекәаа иациҵеит аконкурс ахь иаашьҭхо асахьақәа зегьы амилаҭтә культура аелементқәа рныԥшуазар шакәу. Иара убасгьы иазгәеиҭеит аконкурс иацу аҷыдарақәак ртәы, урҭ инарҭбааны иарбоуп Аконкурс аԥҟарақәа рҿы.

«Лаҵарамза 15 инаркны аусумҭақәа раашьҭра ҟалоит. Аконкурс рхы аладырхәыр рылшоит изҭаху зегьы, адунеи ҭыԥс иахьынхозаалак, рықәра зеиԥшразаалак. Асахьақәа ԥшшәыла иҭыхзароуп, атехника зеиԥшразаалак ауеит. Асахьақәа зегьы ирыҵаҩызароуп абри аинформациа: автор ижәла, ихьӡ, иқәра, иҭел аномер, дахьынхо аҭыӡҭыԥ», – иҳәеит Ҭемыр Рекәаа.

Ԥхынгәымза 16-23 рыбжьара аконкурс аиҿкааратә еилакы иалнахуеит иреиӷьу асахьа-аескизқәа, анаҩс урҭ онлаин-абжьыҭаразы иқәыргылахоит. Уи амҩаԥгара азгәаҭоуп ԥхынгәымза 27, асааҭ 10:00 инаркны нанҳәамза 5, асааҭ 10:00 рҟынӡа Адунеизегьтәи аԥсуа-абаза конгресс асаит аҟны (www.abaza.org).

Абжьыҭара абжьаратәи алҵшәақәа убартә иҟалоит Аконгресс апортал аҟны, аамҭа ҵабырг инақәыршәаны. Зегь иреиҳаны абжьқәа зауз аусумҭа аиааира агеит ҳәа иԥхьаӡахоит. Аиааира згаз ихьӡ рылаҳәахоит нанҳәамза 8 рзы, иара ианаршьоит асертификат, иара убасгьы аҳамҭа хада – Урыстәыла иреиҳаӡоу асахьҭыхратә еилакқәа ируаку «Дари Добро» аиааира згаз аескиз аграффити аҳасабала ианнаҵоит Аҟәатәи аҩнеихагыла узлаҿаԥшуа аҭӡы, зхышәа-ҵышәара 270 м² ыҟоу.

Ихиоу аусумҭақәа аконкурс аиҿкааҩцәа ирықәуршәар ауеит АААК аофис ахь рынашьҭрала: Аҟәа ақалақь, Лакоба имҩа, 109, аҩбатәи аихагыла (Аԥсны Ашәахтәқәеи аизгақәеи рминистрра ахьыҟоу ахыбра – аред.), асааҭ 10:00 инаркны 18:00 сааҭ рҟынӡа, мамзаргьы абри аелекторнтә ԥошьҭахь инашьҭызар ауеит info.abk@abaza.org хаҭабзиара ҳаракыла. Аусумҭақәа рыдыркылоит ԥхынгәымза 15, ҵхагәҭанынӡа.

Аиҿкааҩцәа иазгәарҭеит, ари аконкурс қәҿиарала ихыркәшахар, уи ахырхарҭала аусура ԥхьаҟагьы хымԥада ишацҵахо.

Аконкурс иазку инарҭбаау аинформациеи, уи амҩаԥгара Аԥҟарақәеи шәрыԥхьар шәылшоит абра.