Барганджиа Саид.

Санкт-Петербург йауу асуратчпагIв Назарова Елена лгIарбарта гIахъыртIытI Гвдауыта йаъу Дбар Сергей йыхьыз зхъу Апсны ауагIа р-Абашта айсра амузей апны ахваша, май а 29 атшын. Ауи агIаншара йацхърагIакваз йрыуапI Адуней апсуа-абаза конгрессгьи.

АгIарбарта пещ апны щарда цIуата ауи аъарагIв уагIа гьамайззахсызтI. Ауи гIалыркIгIатI агIарбарта ангIахъыртIуаз йгIачважвакваз.

«Апсны швыга зигIвала»: Назарова Елена лынхараква ргIарбарта гIахъыртIытI Гвдауыта апны

© АААК / АгIвдза Наала

Апхъадзата йайззаз рпахь йгIахъвмартI «Рица» фольклор ансамбль. Ауи асахIат агIарбарта ззадыргалыз мачIкIгьи дачвпхащауа йылзыразыз апшыгIвчва ргвгIанаграква дрыздзыргIвуан.

Назарова Елена Красноярск апны дйытI. Асквш 1985 агIан Ленинград абнатехника академия дгIалгатI. Асквш 2010 агIан кандидат диссертация лхчатI. Йара ауи асквш ауи лмонография «Валаам. Апсабара ашвыгаква» гIацIцIтI. Назарова лсуратква, луысаква, ллитература гIвыраква Петербург йгIацIцIуа ажурналква йгIарыншваллун.

АсуратчпагIв лгIарбартаква асквш 1992 агIан йгIашIарышвта йадыргаллитI. Ауи Шемякин Михаил й-Фонд йаднагалыз «Ачрыкъв азъазара апны» йгьи «Асабиква азъазара апны» гIарбартаква дрылан. Асквшква 2013-2020 руацIа Санкт-Петербург апны ауи йылхъатачIв гIарбартата быжьба адыргалтI.

Асквш 2015 агIан Назарова Елена лхъапщылагьи длыцта бзазара Апсны йгIайтI. Ауищтара Апсны акIвпI ауи лыршIыйыра квта гыларта зкIыз.

«Сара сыхъаз Апсны зпхыцIа баргву, зуагIа заджвгьи йапшым, йкъагIауа штагIвацата гьакIвым йшаъу. Ауи зылкIгIараква ауыжвгIанчIвира йамрыдзыз адгьылпI. АуагIа араъа йшгIаншаз апшта йаъаркIву ащхъаква, амшын, гIайырала йбайу адгьыл, амца йрылата йбзазитI. Араъа датшата угьзаъазлушым: КIавкIаз гIазхчауа йбагъьу аъахIльыра азазаъащаква ракIвпI. Абарауи абайара зымгIва уыла йгIацIакIкIауа ашвыга зигIваквала йхърыспI. Ауи акIвпI агIарбартагьи «Апсны швыга зигIвала»-хIва захьзу. Ауи йгIанысщтуа сара снапIы йачпауа гьакIвым – абарауи Анчва йгIайшаз апшдзари абайари ракIвпI», – йгIахIгвынлыргIвытI асуратчпагIв.

Лразыра ажва цIолаква азыналырхатI ауи Адуней апсуа-абаза конгресс. АсуратчпагIв йшылхIвазла, а-Конгрессгьи Эгьзакь Мусса йхъаталагьи ацымхърагIазарквын агIарбарта гьырзадымгалуашызтI. Апхъахьылагьи йацынхушта дшайгвгъауагьи лхIватI ауи.

АгIарбарта гIахътIрала ахъвдаквцIара АААК анхагIвы, а-Конгресс ахабарргарта портал агIвыраква ргIатацIара адызгалуа аредактор Хагба Изольда йлыквшватI. Ауи Адуней апсуа-абаза конгресси Эгьзакь Мусси рыхьызла зымгIва сальам пхала тшырзыналырхатI.

«АААК хIыхъазла гвыргъьара дупI Апсны бзибара ду азызкIыз, ауи аъара талант ду зму агIвычIвгIвыс «лыдзхъа хIгылырныс». Асуратква злагIву ашвыгаква, ауат йгIархъыцIуа абзири апхари Елена Николай йпхIа хIпсабара апшдзара цIолата лпсы йшалалыз гIауархIвитI. Ауаса, са сшхъвыцуала, ауи гьнымшушызтI лара хIкультура, хIцIасква лылалымкIзарквын, хIуагIагьи лмаргванхазарквын», – лхIватI Хагба Изольда.

ЙалкIгIу аразыра ажваква лзынайырхатI Елена Николай йпхIа амузей адиректор Гвынба Батал.

«Ауи хIгвбайара лылалкIтI, Апсны швабыж йылгвапхитI. ХIкъраль дъадзату абыжьсквша руацIа Назарова Елена лнапIы Апсны йазынарху нхарата 100 райхIа гIацIцIтI. Араъа 60 гIахIырбитI. СгвыгъитI ари асурачпагIв, агIвычIвгIвыс джьащахъви хIари апхъахьылагьи хIацынхушта», – йхIватI адиректор.

Назарова лыршIыйара хвду аквицIатI Апсны йауу ауи лъачIвагIалагIв, ареспублика апны йбергьльу асуратчпагIв Пандариа Руслан.

«АршIыйагIв Апсны апшдзара лылалхIвитI. ШвапшыстI ауи лшвыгаква шбайу, лкомпозицияква, апсабара гIазырбауа асуратква къарута йрылу! Йугвапахушта йаъапI Апсны апшдзара ауи йлапшу асуратчпагIв дъахънахыз», – йхIватI Пандариа.

Санкт-Петербург йауу йбергьльу азъазарадырыгIв Камер Григорий «Апсны швыга зигIвала» гIарбарта адуней апны йагъьу йрылапхьадза йауашта дхъвыцитI.

«ЗапшгIарбарта пещызлакI ахъазлакIгьи чахIразлушын арат анхараква гIвназарквын, йауа ухIварыквын ауат згIвыз ашвыгаква джьащахъвата йзызгIарысабапуа дыршIыйагIвпI. ЗынзамызадзапI сара жвасураткI раъара рколорит гIальаматдзата йангIалскIгIауа», – йхъвыцраква йхIватI аъачIвагIагIв.

АгIарбарта даъан арыпхьарали абызшва йазынарху аполитикали Апсны аминистр Габлиа Инал. Ауи Назарова Елена Апсны гIазырбауа лсуратква рыхъаз ажва пха лзыйхIватI, апхъахьылагьи адахIвраква лымазларныс длызхIвахIвтI.

Ауи йгIаликIгIатI йаргьи азъазара бзи йшибауа, зынзамызагьи суратквакI шйыгIвуа.

«Ажва гьалам, ари сара йгьсъачIвагIадзам, ауаса хвы сзаквымцIуштагьи сгьаъам, йгьи йсзыхIвуштI агIарбарта анадзара швабыж йшхIаракIу», – йхIватI аминистр.

Назарова Елена лгIарбарта «Апсны швыга зигIвала» хымызкI йакIвшуштI. Ауи йызтахъу дзычIвызлакIгьи дзапшуаштI. Ауаъа хвыдъа унашылитI. АгIарбарта йалу асуратква ухвгIагьи йауаштI. Ауат сом зкьы 20 йгIашIарышвта сом зыкь 200-дза йахвпI.