АгIаншараква 19.01.2019 17:10 17517

Абашта айсра Ду агIан абаза литература дырранкъвгагIвчва йырпхыцIахаз знархару ЧкIаларгIа айщчва ркнига Къарча-Черкес ахъада йсогIат аквнадыргатI.

Барганджиа Саид

Йапхъахуз абаза литераторква йгIарыквчважвауа акнига йаквнадыргатI асквш 2018 агIан алитератури азъазари анархарата йщаквдыргылыз Къарча-Черкес Республика ахъада йсогIат. Анхара йахьызпI «Абаза литература дырранкъвгагIвчва айсра апхъали айсра агIани рпхыцIа шцаз: архив швъаква рыщтала». Ауи йадынхалтI ЧкIаларгIа Пётр йгьи Георгий. ЧкIала Георгий «Алашара» адкIылара апны ахабарргарта-рхъвыхра знархару ахъвшара унашва ахъицIитI, ауи йаща ЧкIала Пётр афилология наукаква дырдокторпI, длитературадырыгIвпI.

Авторква архив швъаква гIадрысабапуамцара йдырхъвыхтI йапхъахуз абаза уысагIвчва, гIвгIвчва йгьи ажурналистква рпхыцIа шцаз. Арат алитераторква йрыуата щардагIвы рыхьызква бзита йгьырдырам апхьагIвчвагьи, ауат ныжьхта аъачIвагIагIвчвагьи. Акнига афырква 29-гIв йнадзитI, ауат йрыуата пщгIвы арепрессияква йрылашватI, агIгIвы Абашта айсра Ду айбащраква йрыладзтI, ахыгIв айсра амщтахь рцри псадгьыл йачвыхъарахатI. Айсра йпшцIаз абаза литераторква рынцIра шакIвшуз алитературадырыгIвчва уыжвгIандзара йгьдмырхъвыхсызтI, ауи йгIалцIла акнига агIацIщтрала авторква арат анапа шкIвокIва йыртагIвыхтI.

ЧкIаларгIа айщчва рырхъвыхра Адуней адкIылара «Алашара» анаука программа «Абазакви апсыуакви: абызшваква йгьи атурых-культура тынха ргIахчари ртшауацIнарыхри» апкъ йтагылата йакIвдыршатI.

Анхара йхIаракIу асогIатла йъагIалыркIгIаз «йгIанарбауата гIацIцIуаштI цIабыргыта ауи магIны шаму», йхIвитI ЧкIала Георгий.

«Сащи сари ауи сквшыкI аурала хIадынхалтI. АгIвыраква рызбжа хIазырхахьан, азбжа шIыц-шIыц йадхIкIылтI. Акнига атираж экземпляр хышв йнадзитI. Ауи хIара зынла апхьартакви абиблиотекакви йрылахIшатI, азбжа Апсны Республика анаукаква р-Академия йрыхIттI», – йхIватI алауреат.

Къарча-Черкес Республика ахъада асогIат датшагьи йырквнадыргатI агIвгIвы Тоторкулов Кази-Магомед, ауысагIв шIа Кьанчашвауа Артур, аскульптор Зарманбетов Кошали йгьи Байрамыкъва Халимат лыхьыз нкъвызгауа Къарча-Черкес къральыгIва библиотека анхагIвчва гвып.