Адуней апсуа-абаза конгресс асквш 2020 агIан нхарата йакIвнаршаз агIарбараква йрылапшхтI.
АААК ЙхIаракIу асовет аунашвачпагIв Эгьзакь Мусса асквш 2020 ауацIа апандемия йгIалцIла ашIакIраква шаъазгьи а-Конгресс шынхаз гIайхIватI.
Эгьзакь Мусса зымгIвагьи йгIаргвалайыршвахтI а-Конгресс агвып рпахь хачIв хъадата йгылу хIуагIа рбзазара анадзара агъьхара ахъазла йчпара атахъу шхIызлыхуаш апшта «апсуа, абаза тгIачвипхьадза шбзазауа» гIдырра шакIву.
«Къарча-Черкес абаза кытква рпны бзира щарда гIахIыдахIвтI – ауаъа агIсквша цIуата «Алашара» жвлара адкIылара абзазара ахъатаква зымгIва гIацIанакIуата нхара ду акIвнаршитI», – йхIватI Эгьзакь Мусса.
Асквш 2021 агIангьи а-Конгресс анхара адгылща тшгьапсахуашым.
Апсны апны ужвыгьи шIыпIа хъвшарата рахIа йанмачIу швбжакI гIандыршарныс рмурадпI. АААК ЙхIаракIу асовет ахъада йгIаликIгIатI АААК анхара алшараква йшрылахIуш апшта гIалцIыртата йаъу зымгIва шгIанарысабапуаш.
«Багъьата йхъасцIитI хIъабзазауа ашта йазхIыму абзибара ажвлара рыхъазла рыцIагьи бзита хIшыннархуш», – йпхьадзитI ауи.
АААК ЙхIаракIу асовет аунашвачпагIв йшихIвазла, йшабгу йгIауахвырквын асквш 2020 ауацIа ажвлара йрыхъвуш, гвчIагIвра нархара змаз уыс щарда акIвшатI. Ажва аламкIва ауат йрыуапI «Ащтра», «Амазара» проектква, Апсны Республика акъральыгIва дамыгъаква рымш артлапIара, АААК а-Дискуссия клуб анхара.
«ХIара йалкIгIу гватра азынахIырхитI цри бызшва хчари тшауацIнарыхри. АъачIвагIагIвчва хIыцта абаза бызшвала арыпхьара ахъазла аметодика цхърагIагаква лыхIхын йгIацIхIщттI, видеола апхьара сахIатква адыгIгалтI, амультфильмква атахIкIтI, йапхъахауа абаза сабигIзарта анхара джвыквнацIарныс хIацхърагIатI, апсуа йгьи абаза бызшвала ашва шIыцква гIанхIыршатI, абаза бызшвала йапхъахауа акино хIазырхитI. Дискуссия клуб анхара апкъ йтата хIара апсуа бызшва амаль шIыцла йъаддырдыруа арыпхьараква адыгIгалтI», – йгIашIипхьадзатI Эгьзакь Мусса.
Ауи йгIаликIгIатI асквш 2020 агIан йщаквгылыз аъащаква йгIарылцIла АААК йцарныс ъаргвыгъаз агIвыма къральква зымгIва рпны йшзымцаз, ашта хъвшаратагьи йгIахъыртIырныс йыртахъыз аъара шырзыгIахъымтIыз.
Ага ауаса йаъазтынгьи Сирия апны АААК ашта хъвшара гIанырша йауашызтын гIаддырдырныс, ауаъа йгIаныршу агвхъауа гвчIагIвчпагIв адкIылара ацынхара уысла ангIалра рыдырчпалырныс ахъазла йцарныс рылшатI. Эгьзакь Мусса йгIацицIахтI апсуа-абаза диаспора ъану акъральква рпны ашта хъвшараква ргIахътIра йгIаталуа асквш 2021 агIангьи ахачIв апхъаква йшрылазлуш.
«ТгIачва дукIта йспхьадзауа хIуагIахъа йрызсыму абзибара, гIвычIвгIвысипхьадза, сабипхьадза рылахь шцуш ахъаз аджьауапкIра, йхIырхъйара атахъу хIапхъанчIвиква ргвыгъараква, Анчва йазхъацIара ракIвпI сара ари схъвдаквцIара нкъвызгарныс саззыргвышхвауа. Сара йстахъыпI абаза уагIахъа тшгIащтIырххырныс, хIгвбайари хIцIаскви хIымрыдзныс, абызшва тшауацIнахырныс, абзири абзибари хъгалра ркIырныс. Апсни России руачIвымш лашарахарныс», – араса йалйыргатI йажва Эгьзакь Мусса.
АААК акытква рпны джьгарта йынхитI
АААК архъйагIв секретарь Гьыцба Инар йшихIвазла, асквш 2020 агIан Адуней апсуа-абаза конгресс анхара анархара хъадаква йрыуан Апсны акытква рпны а-Конгресс ашIыпIа хъвшараква ргIаныршара ауысла ЙхIаракIу асовет аунашвачпагIв йыргылыз ахачIвы архъйара. Гьыцба Инар ауи анхара мурадта йаму ашIыпIаква рпны абзазагIвчва рахIа йыззыбжу ауысква зырхъйуш йджьгару агвыпква гIаныршара шакIву гIаликIгIатI.
«Абарауасамцара а-Конгресс ауагIа йрыладнаркIырныс йащтапI дзачIвызлакIгьи йара дъану апны сабапкI шйызгIагуаш. Апхъапхъа – йара йыпшцIа апны, уацIыхъван – йурам апны, уадыргIвана – йъакIвызлакIгьи. УагIа щардагIв бзиракI гIандыршарныс йащтата йхIзадкIылуазтын – ауи агIан хIмурад хIырхъйата йпхьадза йауаштI», – йхIватI Гьыцба Инар.
АААК архъйагIв секретарь йшипхьадзауала, проекткI уырхъйара, йчпачIву уыскI ухара ахIатырла зымгIва йрапхъата «угвалымсзара гьатахъым, датша заджвы дгIайта узынйауа абаргвыра упырихындзкIьа уазпшы йгьауашым – ухъатала ауыс гIащтIухта йуыцызкIуаш уагIагьи адукIылра атахъыпI».
Ауи зымгIвагьи ргватра абаргвыраква йырхъазымкIва – ауат кытипхьадза апны йаъапI, щардалагьи йапшыпI – дара къарута йрымугьи йазынадырхарныс, лшарата йрыму гIаргвынгIвырныс йаквгIазшIиттI. Йбаргвчвам уысквакIла угIалагата псайспамцара рахIа йалачпакву урызца йауаштI.
«Абарауи апш «философия» щатата йгIахIахвын хIара уахьчIвала ареспублика апны шIыпIа хъвшарата 31 гIанхIыршатI. Ужвыгьи 8 Трыкв Республика апны апсуакви абазакви йалакIыта йъабзазауа апны йгIахъхIтIытI. АААК ауат ахъвшараква рпны джьгарта нхара акIвшитI. Ажва гьалам, коронавирус згIва тшъауацIнахуа йгIалцIла ауи анархара йшхIтахъыз апшта йгьхIзауацIымхтI. Ага ауаса йаъазтынгьи, анхара гьашIахIымрыстI», – йхIватI Гьыцба Инар.
Асквш 2020 апроектква
Асквш 2020 агIан АААК йархъйаз апроектква рыцIа йауацIыхта дгIарыквчважватI а-Конгресс йаланакIуа апхIвыс советква рунашвачпагIв Ардзынба Гета. Ауи йшгIалылкIгIазла, ашIыпIа советква рынхара гIащтIырхра ахъазла АААК апроектква рырхъйара йгIаланадыркIын Баслахв, ПакIващ, Атара, Уарча, Дранда кытква ргIаджвыквцIараква йрыцыркIтI йгьи йдырхъйатI.
А-Конгесс йацызкIуа агIвзачвагьи алата Баслахв апны акыт апхьарта йынхауа арыпхьагIв шIа йтгIачва ъабзазуш тдзы ъадыргылуаз йацхърагIатI. ЧIлоу, Уарча рапхьартаква рарыпхьагIвчва рыхъазла психологияла атшыбжьараква адыргалтI.
Ардзынба Гета йгIалылкIгIатI ашIыпIа советква анхара рыцIа джьгарта йаланадыркIра ахъазла йцIасхаз асаби гвыргъьахъвква акъала хъада апны йрымчпауата Очамчыра район акытква Атара, ПакIващ, АкваскIьа, Баслахв, Гвада рпны йшадыргалыз. Ардзынба йгIацылцIахтI араъагьи а-Конгресс агIвзачва шгIацIагылыз.
Май а 21 Адуней апсуа-абаза конгресс ахъмаштылра йазынарху акция «Ащамака» аднагалтI – аджьабара ачвамза ащамака адыркIытI. Июль а 23 АААК Апсны Республика АкъральыгIва баракъ амш артлапIара йагIаджвыквцIагIвхатI. Ауи акIвымкIвагьи «Амазара» проект ауырщттI. «Амч» жвлара адкIыларагьи алата апсуа кытква рапхьагIвчва Апсны ашIыпIа джьащахъваква ддырбауа агIамдараква рзадыргалуа йалагатI.
«Апроектква зымгIва уагIа щардагIв шадхIкIылуаш йазынархапI, ауыла АААК мурадта йаму рыцIа щардагIвы йдхIырдыритI, ауи йаргылуа ахачIвква рырхъйара йгIалагIжьитI. Ауаса ужвы хIызту агIамта хачIв хъадата йхIыму ашIыпIа хъвшараква рынхара щаквыргылра акIвпI – ауат дара-дара руысква рбауата йцара хIтахъыпI. Ауи ахIатырла хIара апроектквала анхара анлыхIхуа «а-Конгресс агвы» йашIамсуа йшкшуш, ашIыпIа хъвшараквагьи АААК «щаныкъвартата» йшазалуаш хIащтапI», – лхIватI Ардзынба Гета.
Ахча гIарбараква
А-Конгресс аппарат шынхаз гIайхIватI ауи аунашвачпагIв Таниа Кан.
Ауи йгIаликIгIатI АААК аппарат адкIылара аустав апкъ йтата йшынхуш, АААК ЙхIаракIу асовет аунашвачпагIв йыргылуа ахачIвква шырхъйахуш йахъпшылуа йшхъвшару. Аппарат анхара апны йалкIгIу гватра азалхпI йапшым акъральква рпны йаъу а-Конгресс ашта йгьи ашIыпIа хъвшараква рынхара аквыршвара.
Таниа йатайхIвахтI аппарат ауыснкъвгагIвчва ансисквша а-Конгресс уыста йакIвнаршуш лырхта АААК ЙхIаракIу асовет аунашвачпагIв йрыбагъьарныс йшидырбауа, ауат рырхъйара шдырхъвыхуа, ансисквша ахча шгIадрысабапыз агьиквала ашвъаква шдрыхIазыруа, аунашвачпагIв дызлу алачIваракви айззаракви шадыргалуа, аунашвачпагIв тшизыназырхауа ауагIа рахIвараква йшрылапшуа, аунашвачпагIв йгIарыхъвдаквицIауа антахьгьыт ауысква шдырхъйауа.
«А-Конгресс ауагIа йгIаларцIауа ахча акIвпI йаму. Асквш 2020 агIан ауи ахча гIалазцIаз а-Конгресс ЙхIаракIу асовет аунашвачпагIв Эгьзакь МуссазаджвыкI йакIвпI, ауи сом 13 312 400 алайцIатI. Асквш 2019 агIан адкIылара цхърагIара бзи гIайрайдзатI Москва йту апсуа диаспора рхъада, АААК ЙхIаракIу асовет йалу Агрба Беслан, ауи акIвымкIвагьи а-Конгресс асчет йгIаталуан ауи йалакву йыртийуа ашвачIвква», – йхIватI аппарат аунашвачпагIв.
Таниа Кан йгIаликIгIатI а-Конгресс анхагIвчва, Санкт-Петербург апны йаныргIалу аппаратгьи шалу, нхаша хIакъта сом 6 549 000 шрыртыз, ахабарргарта портал анхара адгалра йагIвсыз азаман ауацIа сом 5 063 000 шаквдрыдзыз, жвлара магIны зму апроектква рырхъйара сом 762 400 шаларцIаз, антахьгьыт акврыдзраквагьи сом 600 000 йшнадзаз. Нхара уысла аныла-арыла ацараква сом 227 000 рыквдрыдзтI, ахабарргагакви асогIакви – сом 111 000.
Адуней шабгула хабар хIыргитI
Адуней апсуа-абаза конгресс ахабарргарта портал анхара агIарбараква дрыквгIашIасуата ауи аредактор Хагба Изольда йгIалылкIгIатI апортал йгIаталуа ауагIа ъауу акъральква рыцIа-рыцIа йшрылахIауа.
«Къраль 155 рпны йбзазауата Интернет гIазрысабапуа ауагIа хIхабарква йрыпхьитI. Ажва аламкIва ауи збзиру цбызшвакIла хIъачважвауа акIвпI, адуней шабгу апны дзачIвызлакIгьи Апсны йгIатыцIуа ахабарква райшата йадзарныс лшара аъапI. ХIара хIкультура, хIтурых, хIхъа зладухауа, зуагIахъа рпны йахъазымкIва щта пшдза гIанызжьыз хIыгIвычIвгIвыс дуква хIрыквчважвитI. ЙхIвара атахъыпI апортал йгIатахIцIауа йырпшуа ауагIа сквшигIадза йшгIарылахIауа, абызшваква зымгIвала йгIву агIвыраква ауат йацапшыта йшрымагIальамату», – лхIватI Хагба.
Ауи йшылхIвазла, асквш 2020 агIан АААК ахабарргарта портал «йанакIвызлакIгьи апшта» йынхун.
«Коронавирус апандемия адуней шабгу апынгьи, Апсны апынгьи ауагIа рбзазаща псахра щарда гIаланацIатI. АгIвыма къральква рпны йбзазауа хIдиаспора рахIварала хIара Апсны апны коронавирус згIва ауыс шаъу хIхIвитI. АшIакIраква шаъазгьи АААК агвып проект щарда дырхъйарныс рылшатI. Ауи апшта асквш ауацIа асайт гIвырата 155 гIаталтI, абызшваквала атакIраквагьи гIаупхьадзарыквын ауат 930 йнадзитI. ЙгIалкIгIара атахъыпI хIачвыхъарата хIшынхузгьи «Амазара» апш проект (агвбайара тынха йазынарху апроект – аредакция ррытаразга) Интернет апны щардагIвы йырбауата йшхIзычпаз. Ауи агIаджвыквцIара сабап алата йгIацIцIтI, асайти асоциал сеткви рбзирала апроект йаланакIуа авидеоква адуней шабгу апны щардагIвы йырбитI. Йшалу йгIауахвырквын йхъыхIхыз авидеоква уагIа зкьышвкIыгIвпхьадзара рпшхьатI», – лажва аллыргатI Хагба Изольда.
швталра йа тшаншвцIара атахъыпI.