Барганджиа Саид

АААК ЙхIаракIу асовет аунашвачпагIв йцхърагIагIв Таниа Кан йшихIвазла, ахча сом 18 зыкь йапхъахауа гвчIагIвра цхърагIарата Адуней апсуа-абаза конгресс асчёт йгIаталтI, ауи ахча аконгресс йапхъахауата адкIылара йалалкваз йаларцIатI.

Ауи йшихIвазла, аконгресс анхара нархарата йамапI ауагIахъара, абызшва, акультура, ацIасква ргIахчара йгьи ажвлара рджьгарра атшауацIнарыхра йацхърагIарныс ахъазла апсыуа-абаза уагIа ркъару адкIылра. 

«ДзачIвыйа аконгресс йалакву ракIвымкIва зшвапхала ауат ажваква гIазырцIабыргра атахъу? Йшспхьадзауала, ахча щата рауырквын аконгресс апроектква, агIаджвыквцIараква рыцIагьи йнардзата, йауацIыхта абзазара йалалуаштI, апсыуа-абаза уагIа зымгIва рбзира йазынхуштI», – йгIацицIахтI Таниа Кан. 

Йапхъахауа агвчIагIвра цхърагIара гIанзыршаз дрыуапI Санкт-Петербург апны АААК ашIыпIа хъвшара аунашвачпагIв Реквава Темур. Ауи йгIаликIгIатI аконгресс амурадква рырхъйара апны ахча алацIара амагIны шдуу. 

«МагIны ду амата йспхьадзитI хIара зымгIвагьи аконгресс анхара хIацIагылырныс, йауа ухIварыквын апсыуа-абаза уагIа радкIылри рбзазара агъьчIври руысла хIпахь хачIв щарда гылапI. Ауи ахIатырла хIыуа дзачIвызлакIгьи йкъару алайцIарквын АААК амурадкви ахачIвкви агалагьи рыцIа йласхауата йхъйуштI», – йхIвитI Реквава.   

Ауи датшагьи йгIаликIгIатI ацхърагIара апхьадзара дасу йылшауа йгIаквих йшауаш, араъа йхъаду аконгресс йалакву йазакIу ауыс тшъадыркIылуа, йъацхърагIауа. акIвпI.

Йапхъахауата гвчIагIвра цхърагIара гIандыршатI Реквава Темур, Таниа Кан, Калинкин Михаил, Торчуа Леван, Айба Альас, Ардзынба Гета, Гицба Инар, Берулава Алхас, Патарая Анжелика, датшагьи. 

Адуней апсыуа-абаза конгресс щатата йамапI ауагIа йацгIандыршауа ажвлара адкIылара. Ауи амурадква хъйара ахъазла ахчагьи алацIара атахъыпI. АААК йалакву йгьи датша йызтахъу дзачIвызлакIгьи ахча адкIылара ркасса йа «Согъвым-банк» апны йгIахътIу аконгресс асчёт йаларцIа йауаштI.