АйгIайри Ахъахвитри рысквш 25 агвыргъьахъв ахьызла Къарча-Черкес йгIатыцIын Апсны автоколонна гIайтI.
Барганджиа Саид
Гвым кыт йтыцIыз автоколонна Апсны асабша сентябрь а 29 атшын йгIадзатI. Ауи айщчва уагIахъаква абазакви апсыуакви рацзакIыра йадамыгъапI. Ари агIаджвыквцIара Апсны АйгIайри Ахъахвитри асквш 25 йадахIвуата йакIвшауа агвыргъьахъв йазынархата йадыргалтI.
«Алашара» адкIылара апны апхIвысква рсоветква ркоординатор Джьмакъвыл Нателла йшылхIвазла, Гвыми Согъвыми йырбжьу амгIва апызщылыз амашинаква араса йабаркIыта йапхъахауата йгIамгIвайстI йгьи асквшква 1992-1993 рагIан йакIвшаз Апсны Абашта айсра апны АйгIайра асквш 25 йадахIвуата йадыргалтI. Ауи йагIаджвыквцIагIвпI Къарча-Черкес абаза кытква рпхIвысква ркоординация совет йгьи атш клуб «Гвымлокт» (урышв бызшвала Гвымлокт «Красный Восток» ахьызпI – аредакция ррытаразга).
«Амашинаква рымгIвайсра йамурадпI ари агвыргъьахъв ду ргватра азынадырхарныс амгIвала йчIву акытква, акъалаква рбзазагIвчва, амгIвала йзынйуз атранспорт анкъвцагIвчва йгьи амгIвайсыгIвчва. ХIара хIмашинаква йазалху асуратквалагьи абаракъквалагьи йрыпшдзан, ауи ахIатырла хIколонна уыла йгIащтIнамхуашта йгьаъамызтI», – лхIвитI Джьмакъвыл Нателла.
Ауи йгIацылцIахтI «ари ауыс йгIалалыз чкIвынргIа йгIадырбарныс шыртахъыз абазакви апсыуакви рацзакIыра».
АмгIвайсра йалу Уазден Амырби йшгIаликIгIазла, ари апш лшара гIаншата йанидыр мгIва дгIаквылырныс зынла тшадигалтI.
«ХIара Апсны хIгIайырныс йщаквхIыргылтI, йшпакIву ухIварыквын агвыргъьахъв лшара бзита йхIзалтI хIыгIвзачва, хIайщчва хIрабабарныс, ахабар шIыцква хIрылачважварныс. Амаль хIымапI Апсны апшдзараква рпны хIыла хIырпшыта хIанцахра рунашва рахIхIвхырныс», – араса йгвгIанаграква хIыцагIвишитI Амырби.
Датшагьи амгIвайсра йалу Гьльас Исльам ари агIаджвыквцIара магIныта йаму гIаликIгIатI.
«ХIайщчва йырдырныс хIтахъыпI хIшаргвану, хIшадкIылу. Адунейла йдхIырдырныс хIтахъыпI хIара хIхатI злахIцIауа ари ауыс: Апсны – йхвиту къральпI, ауат сквшы 25 рапхъала Грузия йырпшIагылата йакIвшаз айсра апны айгIайрала рхъахвитра знархару ахвитнагIа гIатыргатI», – йгIаликIгIатI Исльам.
Сентябрь а 30 атшын Апсны Республика апны АйгIайри Ахъахвитри йырхъыцIуа асквш 25 агвыргъьахъв дыртлапIитI. Ари атшын йхIвахIвырныс йгьи агвыргъьахъв йалазларныс ахъазла ареспублика апны тшазыркIкIитI абаза уагIа ргIащтийыгIвчва, агIвымакъральква ргIащтийыгIвчва гвыпква, адунейла Апсны нбжьагIвра рыцынкъвызгауа ауагIа.
швталра йа тшаншвцIара атахъыпI.