Адуней апсуа-абаза конгресс цымызкI рурала анхара агIарбараква «айшва гьажьы» апны йрылачважватI сентябрь а 29 атшын.
Барганджиа Саид
Адуней апсуа-абаза конгресс ЙхIаракIу асовет йгьи а-Конгресс йалакву цымызкI рурала анхара агIарбараква йгьи апхъахьыла йчпачIву ауысква асабша сентябрь а 29 атшын Согъвым апны «айшва гьажьы» анакIвшуз йрылачважватI.
ХIвахIвра ажвала йгIайззаз тшырзынайырхауата дгIачважватI а-Конгресс агIаныршагIвчва йрыуазаджву, АААК чIахIра нкъвызгауата йалу Шамба Тарас. Ауи апхъала даунашвачпагIвын асквш 2017 декабрь мыз агIан АААК зхьырцIахыз апсуа-абаза уагIа р-Дуней ассоциация.
«Сквшы 26 рапхъала хIара а-Конгресс ангIанхIыршуз хIуагIа хIащаквыгIжьырныс, хI-Псадгьыд гIахIхчарныс хIмурадын. Ауи азаман аъащата йызтагылаз гьмайрамызтI. АлахI йбзирала, ауи гIахIыдахIвтI. УахьчIвала хIкъральыгIва хIымапI. Датшагьи хIара йхIтахъын адунейла къраль 44 йыртабзазауа хIабашталагIвчва абабарныс, йащтаныкъварныс. А-Конгресс ъадзанхуз асквшква руацIа сара хIуагIа ъабзазауа къраль 38 рпны саъан. Ужвы абар йхIынасыпта хIабабитI. УахьчIвала хачIв хъадата хIпахь йгIагылитI хIкъральыгIва арыбагъьара», – йхIватI Шамба Тарас.
Анйара апны йащтагIайуата дгIачважватI репатриацияла аминистр Дбар Беслан. Ауи «айшва гьажьы» йалакваз тшырзынайырхатI апсыуа уагIа ртурых апны змагIны дудздзу АйгIайра асквш 25 знархару хIвахIвра ажвала. Датшагьи ауи гIатгара дута йпхьадзатI абашталагIвчва ари йапшу ранйараква ракIвыршарала лшара ъагIаншаз.
АААК ахабарргарта портал аунашвачпагIв Лазба Амина ЙхIаракIу асовет йалакву рпахь дгIачважвауата нхарата йакIвыршахаз агIарбараква гIалхIватI.
Ауи йгIалылкIгIатI апортал адгалра уысква уахьчIвала ахчата сом 1500000 шрыкврыдзхаз. Апортал анхара акврыдзраква асквш ацIыхъвадза, асурат йгьи авидеогIвыраква рыдынхалрала атехника амальква ргIахвгIарала ахчата йрыквшвуш апхьадзара сом 4000000 раъара надзуштI.
Лазба йшгIалылкIгIазла, апортал анхара хвбызшвакIла йджвыквылтI, гIамта айшысла гIарып бызшвалагьи анхара джвыквылуаштI, уадыргIвана ауыгьи агIарысабапыгIвчва ргватра азынархахуштI.
«Асайт бызшва щардала йъанхауа хачIвыта йархъйитI адуней шабгула апсыуа-абаза уагIа рабадырра адгалра. Асайт апны агIвыраква хвбызшвакIла йангIаквшвара хIара зымгIвагьи хIъабзазалакIгьи, бызшвата хIызлачважвалакIгьи хIащтаныкъварныс, адунейла хIуагIа йадкIылата йъабзазауа рхабарква хIзыгIадыритI, хIхъа зладухауа агIвычIвгIвыс дуква рунашва, хIыщата, хIхабзаква хвы хIызрыквцIитI, йшатахъу апшта йхIзынкъвгитI, азаман амгIвайсща тшхIзаквыршвитI», – лхIватI АААК апортал аунашвачпагIв.
Ауи датшагьи йшгIалылкIгIазла, бызшва щардала йынхауа асайтква адунейла зымгIва рацкIыс йтлапIапI: ауат рпны акврыдзраква рщарда знархару йалкIгIата атакIраква ракIвпI.
Ауи йгIаликIгIатI ансисквша ауат агвыргъьахъв гIаншараква йрылалуа ауагIа рпхьадзара рыцIа-рыцIа йшрылахIауа йгьи гIальаматрата йырзыгIаншауа йшалахIауа. ААА рыквчважватI.
«А-Конгресс аквта уысхарта гвып гIаныршахатI, ауи а-Конгресс ашIыпIа аргIапсща йащатапI, Апсны, Трыквшта, Къарча-Черкес, Къабард-Балкъар, Ставропольшта, Москва йгьи Санкт-Петербург рпны ашIыпIа хъвшара советква гIаныршахатI», – йхIватI ауи.
Калинкин йгIацицIахтI асквш 2018 ауацIа хачIвыта йшдыргылуала ашIыпIа уысхарта гвыпква ргIаныршара знархару а-Конгресс анхара аплан йаквыргIапста чкIвынргIа рсоветква, апхIвысква рсоветква, ашIыпIа советква Апсны республика апны йгьи анахьанат ашIыпIа хъвшараква рпны ргIаныршара.
Ауи йшгIаликIгIазла, а-Конгресс ахчала йацхърагIауамцара Апсны анаукаква р-Академия апрограмма абзазара йалажьхитI, Апсуара знархару акнига агIври йазакIу апсыуа-абаза алфавит алыхри аланакIуата.
«Апсны анаукаква р-Академия рнаука программа акврыдзраква сынчIва асквш ахъа йгIашIарышвта сом 2 288 000 азалххатI», – йхIватI Калинкин Михаил.
Ауи йгIаликIгIатI, а-Конгресс ауысхара акврыдзраква мзигIадзапхьадза сом 1500000 раъара йшнадзауа.
Калинкин датшагьи йшихIвазла, а-Конгресс аюристква аорганизация а-Устав, анахвра знархару ашвъа, апрезидиум, Россия Федерация апны а-Конгресс афилиал знархару ашвъа, «Ахабарргарта портал» аустав агьиква йрыдынхалтI. Аконгресс ауысхарта аъачIвагIагIвчва гвып адкIылхатI, ауат ангIалра рыдчпалхатI, ЙхIаракIу асовет агIвалачIваракI акIвыршахатI, ауат рыуа азакIы конференцсвязь амальла йадгалахатI.
УахьчIвала аконгресс йнарахвхьатI уагIа 200-гIв райхIа, алалра алацIара ахчата йнадзахьатI сом 2000 райхIа.
Аревизия комиссия йалу ХIапIатI АхIмад йшгIаликIгIазла, аконгресс анхара йнардзата ауагIа йацыркIра атахъыпI. Ауи анйара йалакваз ргватра азынайырхатI алалра алацIара ахча апхьадзара 2 долларкI йнадзауа, йа сом 100, аконгресс айззара ду мартI мыз йалаз зымгIвагьи йшацыркIыз.
«ДзачIвызлакIгьи йборчпI ауи ахча алайцIарныс ймачIпI йа йщардапIхIва кьангьаш гIайыламшвауата. ХIара Мусса ХIабальа йпа (АААК ЙхIаракIу асовет аунашвачпагIв Эгьзакь Мусса – аредакция ррытарзга) йалацIара ахъазла хIизыразпI, ауаса ари ауыс ауи йгьихъатачIвым. Йгьи аконгресс ауи йхъазы йчIвыта йгьаъам, ауи хIара зымгIвагьи йацыхIчIвпI. Ауи ауагIа йырчIвыпI. ХIара аконгресс йхIылшауала хIацхърагIара атахъыпI. ДзачIвызлакIгьи йкъару йгIащтIнахуала: заджвы 2 долларкI, датша заджвы – 200», – йхIватI ауи.
Аконгресс архъйагIв секретарь Гицба Инар анйара алйыргауата апхъахьыла уыста ауи йархъйуш ауысла амурадква дрылачважватI.
«Уыжв ласыла йхIмурадпI асоциология рхъвыхраква акIвхIыршарныс. ХIара кытипхьадза, къалипхьадза къарута, лшарата йрыму гIахIрыбергьыльырныс хIтахъыпI – Апсны апынгьи, адунейла хIуагIа йадкIылата йъабзазауа ашIыпIаква рпынгьи. Ари апш рхъвыхра зынгьи йгьакIвымшатI, шIырпшыра гьамам», – йхIватI ауи.
Гицба йгIацицIахтI архъвыхраква рымщтахь акытква рпаспортква шлыххуш. АгIарбараква рырхъвыхра йащтагIайуата кытипхьадза ауат шагъьчIвхуш знархару анхара акIвшуштI.
Трыквшта акультура квтаква рфедерация ахъада Аквысба Атанур араъа йаъаз зымгIва ргватра азынайырхатI АйгIайри Ахъахвитри рысквш 25 ахьызла йаларцIаз агимн шIыц «Амра гылоит Аҟәантәи» (апсыуа бызшва йгIахъыхта абаза бызшвала «Амара гIахъагылитI Согъвым» – аредакция ррытарзга).
Анйара ацIыхъва аконгресс йалу зымгIвагьи Адуней апсуа-абаза конгресс алазларала йазалхта йрыхIазырхаз аршахIатгаква рнапIыцIарцIатI.
швталра йа тшаншвцIара атахъыпI.