АААК аунашвачпагIв Апсны ауагIа сентябрь а 30 атшын йдыртлапIауа АйгIайри Ахъахвитри гIатыргищтара йцIуа асквш 25 аюбилейла драйхIвахIвтI.
Адуней апсуа-абаза конгресс ЙхIаракIу асовет аунашвачпагIв Эгьзакь Мусса Апсны ауагIа амтшаша сентябрь а 30 атшын йдыртлапIауа АйгIайри ареспублика Ахъахвитри гIатыргищтара йцIуа асквш 25 аюбилейла драйхIвахIвтI.
Апсыуа уагIа йрызцауа йхIвахIвра тшазынархара апны Эгьзакь Мусса йгIаликIгIатI асквш 1992-1993 рагIан йакIвшуз Абашта айсра алгара – ауагIа рацзакIыра йшашвапха бзидздзу.
Ауи йшихIвазла, Апсны ауагIа ртурых апны айсра йнашхыйу йгьи йфырру напапI: йагъьу рпачви рыпхIчви рща ахвла апсыуаква аквырджь гIагвыквсра йапшIагылырныс, рхъахвитра гIархчарныс йгьи руагIахъа гIащаквырыжьныс рылшатI. Зтахъырала айсра йпшцIалыз айсыгIвчва рцхърагIарала Апсны ауагIа йдрыбагъьатI ркъральыгIва хвитнагIа йгьи йгIадзынгылуа рабанпараква рыхъазла йагъьу абзазара шIыц, йгIацицIахтI Эгьзакь Мусса.
«Арат асквш 25 йшгIадырбазла, апсыуа уагIа йтамаму амгIва лырхтI. УахьчIвала Апсны Республика Россия ркърарла йхчахауа зхъа йахвиту къральыгIвапI. Ауи абзирала апсыуа-абаза уагIа тшадыркIылырныс ахъазла алшара дуква рзыгIаншатI йгьи апхъахьыла хIтшауацIыхра атурых шIыц джвыквылуата ауи атурых хIара хIуысквала йыгIгIвырныс хIылшуштI», – йгIаликIгIатI АААК ЙхIаракIу асовет аунашвачпагIв.
Асквш 1993 сентябрь а 30 атшын апсыуа уагIа айгIайра гIатыргатI асквш 1992 август а 14 агIан йгIалагаз йгьи мыш 413 раъара йакIвшуз Абашта айсра апны. Апсны ачIвыла апны ащарычIвара айбащраква рымщтахь, йцIыхъвахауата, аквырджь рква щтахьла йтхъахтI. Асквш 2018 агIан АйгIайра йгьи ареспублика Ахъахвитра амш й-25-хауата йдыртлапIуштI.
швталра йа тшаншвцIара атахъыпI.