АйгIайри Ахъахвитри рымш асквш 25 Согъвым апынгьи ареспублика шабгу апынгьи йдыртлапIатI.
АйгIайри Ахъахвитри рымш асквш 25 йазынархаз агвыргъьахъв уысква акIвшатI сентябрь а 30, амтшаша, Согъвым апны.
Агвыргъьахъв ащымта акъраль аунашвачпагIвчва Апсны йагIвзачву агIвыма къральква ргIащтийыгIвчвагьи рыцта гIвчвахъабагакI – ЦIахь Ешера кыт апны йгылу Апсны йапхъахуз рпрезидент Ардзынба Владислав йчвахъабага сини Артшхъвара апарк апны йгылу Апсны ауагIа р-Абашта айсра йаладзыз рмемориали – хIврапшдза рзыргатI.
УахьчIва зхъа йахвиту акъральыгIва апны йбзазауа абанпара рразыра – ари йдучвам ауыс акIвпI хIара зпсадгьыл ауачIвымш зхъа азыщтIазцIаз афырква рыхъаз йхIзычпушта йхIыму – араса йылпхьадзитI Апсны агIвыма къраль уысквала а-Министерства апны йынхауа, ансисквша ачвахъабагаква хIврапшдза анырзыщтIарцIауа йгIайлауа Гамисония Анна.
«ХIара хIфырква рбзирала мамыр ъащаквгылу акъраль апны хIбзазарныс йгьи апхъала хIымгIвайсырныс лшара хIымапI. Ари амачI акIвпI йырзыхIхушта йхIылшауа. Ауат ъадзахIхъмаштылуа рфыррагьи бзазлуштI», – лхIватI ауи.
АйгIайра амш агвыргъьахъв йазынархаз ауысква йрыуата ауи амщтахь Ахвитра агьагьара апны айсыгIвчва рпарад акIвшатI. Араъа йгIамгIвайстI айсра йалакваз, айсчва рырхъвква, ахы йнанамуахвуа атехника.
Ахвитра агьагьарагьи ауи йадзхъу апаркгьи апшыгIвчва йдырчвытI. Ауат дугьи хвыцгьи рылан, азджьакI ащхъагIвчва рфаша рышван, азджьакI зчва агIайыраква йрылагIващауа айсыга чгIвыча ршвын, зымгIвагьи ачырпIикви алентIакви рыман. Акъала хъада йгIадгылтI акытква, арайонква, акъалаква, йара Согъвым рбзазагIвчва.
Отырба Баграт Апсны ауагIа р-Абашта айсра далан. Ауи жвагIсквша ахIа дыртамкIва абджьар найахвын йпсадгьыл йхчун, «АхъацIара ахъазла» медаль гIайквнадыргатI. ЙахьчIва ауи Гагра дгIатыцIын йыхыгIвпачвахвыцквагьи йыцта агвыргъьахъв далазларныс, асабиква апарад дйырбарныс дгIайтI.
«Сара йстахъыпI ссабиква ртурых, ркъраль, руагIа ртурых рдырырныс. Ауат йшхвыцыркIву уалагата рпсадгьыл бзи йырбауата йбжьара атахъыпI», – йпхьадзитI ауи.
Ауи йгIацицIахуата Баграт йгIахIайхIвтI ужвы йанмамыругьи апарад даналу йкъраль ахъазла йхъа шдухауа, йаргьи ауи ахъазла джьауап шикIуа йалкIгIата йшйылайхIвауа.
Апсны абзазагIвчва ргвыргъьахъв рыцагIвыршатI асасчвагьи.
Ауи апшта, Италия апны йазалху хъвдаквцIара зму Апсны а-МИД ащтийыгIв Гриттани Вито уыста йкIын АйгIайра аюбилей тшаквйыршвауата Согъвым дгIайтI.
«Сара ари агвыргъьахъв йапхъахауата Апсны апны йсыртлапIитI, ауаса Италия, хIдипломат уысхарта апны ансисквша йсыртлапIалитI. Сара сыхъазла ари аюбилей апсыуа уагIахъа рпатриотра йагIарбагапI, сара мшкIыла Апсны ауыжвгIанчIви турых ссырдырныс сахадзатI. Угвы йгIадсылуа гвыргъьахъвыта йсыласхIвитI ари сара», – йгвгIанаграква гIахIайхIвтI ауи.
Италия йаъу адкIылара «Европа – Апсны» апрезидент Ночито Акилле йапхъахауата Апсны дгIайтI, йлахIвараквагьи гьцIайкIуам.
Ари агIаншара асуратлента апшра>>
«Сара йапхъахауата Апсны сгIайын ари апш гвыргъьахъв ду салашватI, ауи са сыхъазла насыпрапI. СлахIвараква пшдзапI: араъа ауагIа швабыж патриотра рылапI, Европа апны ауи хIчвыдзитI. Апсны йапхъахауата йызбитIта акъраль пшдзадзата, ауагIагьи гвапата, асасчва бзи йырбауата акIвпI сыла йшгIащтIнахуа. Йхъададзахугьи – араъа йызбауа Апсны ахъазла Интернет апны сызпхьуз закIылагьи йгьапшым. Мцы щарда гIахIархIвитI», – йгвы йасуата йгIаликIгIатI ауи.
Агвыргъьахъв ахьызла апарад амщтахь ансисквша апшта зныбыжьла йапшым уагIа швкIыгIвпхьадзара злаз «Аджьаль змам аполк» гIамгIвайстI.
Ауи йалаз йрыуазаджву Лазба Инал Ахвитра агьагьарала дангIайуаз йаба йаща цри – айсра йалаз, Леон йорден гIазквнадыргаз Лазба Алик йсурат йыман.
Ауи «Аджьаль змам аполк» дъарылагылаз ауагIа рнашхква шаъази йара йаба йаща йтарала АйгIайра апарад далата дъагIамгIвайсуаз лахIварата йгIайыланацIауи гIахIайхIвтI.
«Акция апхьагIвчвагьи алан. Ауаса йцан – сыгIвзакI июль агIан агъа дгIазжьара атахъыз, бзата йгIанхарныс лшарата йрыму шмачIу здыруата йпшцIалыз агвып йрунашвачпагIвыз саба йаща йсурат гIайбатI. ТшытракI анцIы сара аполк рсатыр салагылан, сгьагьара асабиква алагылан, сыгIвзагьи Согъвым ангIадырхвитхуаз атшын йгIарщыз йаба йсурат йымата дсыдзхъагылан. Са схъа ду йызбахитI ари амш, хIайгIайра сквш 25 анахъыцIуа, сара апарад алзыргуз срылата Ахвитра агьагьарала сгIайырныс ъасылшаз. Сгвы алагIваласуан, старала саба йаща йыгIвзачва дрылагылата дгIамгIвайсуазшва сыла йгIацIалуан… Угвы йгьи йунарыхьитI йгьи йгIатнаргвыргъьгIитI ауи. АйсыгIвчва рсуратква гIазгуаз асабиква йгIаргвынгIвра атахъыпI хIара ауат айсра афырква квырмыш рзыхIчпара шатахъу, хIапхъахьылагьи АйгIайра абаракъ хIнапIыцIхIрышвтырныс хIшахвитым, ауи йхIыщтагIайуаш абанпараква йырнапIыцIахIцIарныс шхIборчу».
Асквшква 1992-1993 рагIан йакIвшаз айсра йалакваз рзаман йрызгIанаргылыз архъвыхра хъацIара рылата йапшIагылтI, йхъвыцща йгIахIгвынйыргIвытI Лазба.
«ЙхIылшушмищтI хIаргьи йара ауаса хIапхъахьыла йхIызпшуа архъвыхраква йшаквнагу апшта хгIарылсырныс? Ауи азаман йгIахIнарбуштI. Ауаса уахьчIвала хIфырква рхъмаштылра щататагьи мгIвагIарбагатагьи йхIзалра атахъыпI», – йажва далгатI ауи.
Агвыргъьахъв АмхIаджьырква рдзтшпыурам апны йакIвшаз аконцертли «Динамо» стадион апны аюбилей ахъазла йадыргалыз агIахIвраквала йалаз аргылчIвли йалгатI.
АргылчIв дарежиссерын чкIвыныргIа руысквала Апсны а-КъральыгIа комитет аунашвачпагIв Квеквескири Темур. АргылчIв апны Апсны ауагIа р-Абашта айсра ачвгьари абзири йрапшIагылрата йгIарбапI.
«ХIара айсра атурых йауацIыхта хIадгылра, ауи ачвгари абзири йрабакIрата йгIахIырбара хIтахъхатI. Араъа йхIыму агIахIвчва гвыпква йырхъазымкIва ауи йалан айсра агIан зуагIа цхърагIара йхIызгIайыз акъральква йгIартыцIыз агIахIвчвагьи», – йхIвитI ауи.
Апсны агIахIвчва йрыуата аргылчIв йалан «Шаратын», «КIавкIаз» гвыпква йгьи Согъвым акульпросвет апхьарта рансамбль, асасчва йрыуата – Къабард-Балкъар Республика йауу «Кабардинка» гвып, Къарча-Черкес гIахIврала атеатр, Адыгея ауагIа ргIахIврала ансамбль «Нальмэс», Галаев Б.А. йыхьыз зхъу гIахIврали уарадхIварали ГIвадахь Осетия рансамбль «Симд», Моисеев Игорь йыхьыз зхъу ауагIа ргIахIврала академия ансамбль, Иордания йауу «Аль-Ахли» гвып.
ЙцIыхъвахауата ауатыкв дгIаталтI Апсны Республики Россия Федерации руагIа рартистка Герзмава Хибла. Ауи АйгIайри Ахъахвитри рымш асквш 25 йахъазла Фадеев Максим йалайцIаз ашва шIыц «Сара с-Апсны» пычIвта йылхIватI.
АйгIайри Ахъахвитри рымш асквш 25 артлапIара йалазларныс Апсны йгIайтI йхIыгIвзу акъральква Приднестровье, Щхъа Карабах, Сирия, Италия, ГIвадахь Осетия йгIартыцIыз асасчва, Къарча-Черкес, Къабард-Балкъар, Москва, Санкт-Петербург, Трыквшта, Сирия, Иордания рпны йбзазауа хIабашталагIвчва.
швталра йа тшаншвцIара атахъыпI.