«Амара» абаза кIьанджь театр Къарча-Черкес апны йгIаншищтара сквшыкI акIвпI йцIуа, ауаса ауи апшыгIвчва бзи йырбарныс йахадзахьатI. АуагIа ршIалахIвара йгIахъыху аргылчIвква дугьи хвыцгьи йыргвапхитI, ауат ауагIа ргвбайара аналькъвытнальмасква апшыгIвчва йддырбитI. АААК акорреспондент атеатр аргылчIвкI йанадынхалуаз дрызцан агвып йалакву драчважватI.

Ардзынба Астанда

Аквыджьми атыгъьи йгIарыквчважвауа алокI хIальальдза йаъапI, закIгьи уазнабжьитI. Ауи апхъапхъа асабиква йырзынархазшва йубазтIхIва «ЗагIвдан дзыгIв» ргылчIв бзи-бзи уапшрыквын дугьи хвыцгьи йгIаргвынгIвуа философия злу турыхпI. Ауи асценарий абаза уагIа рлокIква йгIархъыхпI. Абарауаса «Амара» кIьанджь театр ацри культура, атурых, ашIалахIвара ауагIа йрыланагитI.

«Амара» – марапI

«Амара» агвып йалу акъральыгIва абаза театр апны йынхауа, руагIа разъазари рыршIыйари йрызцIабыргу хвактер шIакI ракIвпI.

АкIьанджь театр Къарча-Черкес апны йъадзанхауа асквш ауацIа аргылчIв гIадырбауата ареспублика шабгу йгIахъыкIвшахьатI. Ужвы агвып Ставрополь йцарныс тшадыргалитI, ауаъа мшкIы ауацIа гIвызджьара-хызджьара йгIахъвмарра атахъыпI. ХIаргьи актрекви ауат рунашвачпагIв Къвапсыргьан Зураби ауат агIахъвмарраква тшрыздрыхIазыруата хIрызцатI.

«Амара» абаза кIьанджь театр арепетиция
© АНО Алашара

КъЧР апны акIьанджь театр цхърагIарадъа йгьгIанымшатI. Абаза жвлара адкIылараква рассоциация «Апсадгьыл» ауагIахъа уысквала ареспублика а-Министерства агрант гIатнаган ауи ахча акIьанджь театр адгалра йазынанархатI. Ауыла адекорацияква, амзаква рхвгIатI, акIьанджьква рдзахытI. АкIьанджьква йазалхыз эскизла йырчпун, Къвапсыргьан Зураб ауи анхара йылапш гьахъимхуазтI.

Ащайдзала йгIалагитI

ГвынгIвырапI абаза театр апны акIьанджьква кIвымжвы шрышву. Ауат ргвтшпы апны ахIазырквагьи кIыдпI. Араъа йдрыхIазыруа аргылчIвква зымгIва ауагIа ршIалахIвара йгIахъыхпI. Асценарийква згIвуагьи йара Къвапсыргьан Зураб йакIвпI. Ауи бзидздза цIуата абаза локIква, ахабарыжвква тшрыхайыргIвазитI, йаргьи ауи акIвпI йыргылчIвква рпны ауат рфырква уызрынйалауа.

Йцри уагIахъа ргвбайара тшъазынайырхауа – ауи Зураб йыхъаз йгьгвшIыгъьратыхгам. Ауи йыщайдзаква ъану ййырдырта йара ймагIну гIайгвынгIвра йтахъыпI. Абазаква уагIахъа щардала йалу акъраль ду зпхьадзарала ймачIу уагIахъата йрылапI. УахьчIвала ауат дара ъабзазауа Къарча-Черкес апынгьи йрыгвлачву ауагIахъаква йгIарыквухырквын ймачIыгIвпI. Ага ауаса йаъазтынгьи, ауат рцри культури рыбызшви штшауацIддрыхуаш йащтапI. «Амара» театр анхарагьи щардагIвы йыргвапхауата йаквчважвитI, зыщайдза цIолу рцIаскви ршIалахIвари здырра зтахъу зымгIвагьи ауи хвы аквырцIитI.

«ЙаъапI алокI апны ахъаз шIыпIакI ахьызгIваца гIаукIыта ауи йапщылу уырхъвыхуа уаналагара абазаква зныкI ауаъа йбзазауата йангIацIцIуагьи. Ауат ашIыпIаква ртурых, зыхьыз ауат йырпщылу ауагIа гIахъутIуа уалагитI. Абарауасамцара алокIквала ууагIа ртурых йауата щарда гIаууырдыритI», – йхIвитI Зураб.

АргылчIвква зымгIва гIвбызшвакIла – абазали урышвли – йдрыхIазыритI. ДасузлакIгьи йара йтурасы атайкIхитI.

«ХIыбызшвала хIъагIахъвмаруа хIдахIвраква йрыщатакIпI, – багъьата йазхъайцIитI Альбот Зауыр. – УыжвгIанчIви сабиква зпшуа амультфильмква зымгIва урышв йа гIвымакъраль бызшвапI йызлачважвауа. Араъа ауат дара рцри бызшва рлымхIа йтаситIта ауи йхънахитI, атурыхгьи рымагIальаматхитI».

«АкIьанджьква гьхъвмаргам»

КIьанджь театр лкIгIара зму азъазарапI. Асцена апны датша турасы йтагылуа йащцахьаз актер ахIбачвагьи адгылитI: акIьанджьква гьхъвмаргам, ауат урыцынхарнысгьи гьмайрам. Адрама театр апны актер йара-йара дгIахъвмаритI, араъа апшыгIвчви йари акIьанджь гIарбжьалитI. Ауи апшыгIвчвагьи ащцара атахъыпI.

«ХIара хIызланхауа «панель кIьанджьы» – хIва йызпхьауа ракIвпI. Араъа апшыгIвчва йара акIьанджь йахъазымкIва актергьи дырбитI, йнапIы йкъьузтынгьи, йшIахъа закIыта йчпузтынгьи рыла дыцIапI. ХIара апрапса ащтахьла хIаъазлушта йхъвыцуаз апшыгIвчва ауи зынла йджьарщатI. Ауаса мачIдзакI ахIа йнамихуата йшабгу аспектакль йнанауахвуанта зымгIва рхъаштылхуан», – лхIвитI Къвныжв Ратха.

АкIьанджь ргылчIвква гьапшызлум. Ауат рквпшыраква рыцIа майрата йалуыргара ахъазла «ахъахьква», «ацIахьква», «аквтаква» – хIва йуша йауаштI. Апанель кIьанджьква «аквтаква» йрыланакIитI. «Ахъахьква» – ауи рнапIы йахъарцIауа ракIвпI. «АцIахьква» – рахъвала йа айхацIала йдрыхъвмаруа акIьанджьква ракIвпI.

АкIьанджь квтаква рыцIа йдупI. Актерква ауат йрыдзхъачIвата («Амара» апны апш) йа йыртачIвата йдрыхъвмаритI.

Хвы зму алкIгIаракви анхагIвчви руысла ужвыгьи тIакIвы

«Амара» театр йрылу рыцIа йшIу актер Къвапсыргьан Виталик 12 сквша дыртапI. Агвып рпны йгьи йунашвахъцIагIву, йгьи йрежиссеру, йгьи йсценаристу ауи йаба йпагьи азъазара дадикIылтI. «Сара ауи дгьадсымцалтI, йара йгIалихтI, – дпшвырхъыччитI Къвапсыргьан Зураб. – Араъа йхIчпауа йгвапхитI. ЦIабыргыта, апхъахьыла ймагIынхуш ужвыгьи дазхъвыцыркIвитI».

«Амара» йалакву дара йырчIвыта йъанхуш, аргылчIвква ъадрыхIазыруаш, йъагIадырбуш пещ гьрымам: Черкесск асцена хъада – ареспублика адрама театр – ужвы йдырчIаджьырныс йадыркIытI. Ауаса агвып ауи абаргвыра йшгIалцIуашыз гIараутI. Араъагьи ауат йрыбызшву ауагIа гIарцхърагIатI: «Алашара» апны йгIаныршу апхIвысква радкIылара унашва ахъызцIауа МалхIваз Зальиха Черкесск йачвыхъарам Псыжв кыт апны актерква пещкI рзалылхтI.

«Сцена ъахIымам хIынхара закIылагьи йгьтанащахIум. ХIара майрата йайтыпауа хIтеатрпI. ХIымгIапсауата йъахIтахъу хIцата йъакIвызлакIгьи спектакль хIзыргылуаштI. Актерква рынхарагьи, адекорацияквагьи, амзаквагьи ауи гьрызарархум. ХIъанхалакIгьи йхIызгIайуа ауагIа аспектакль йшнанауахвуаш апш аъащаква хIзыгIаныршуштI», – йгIахIгвынйыргIвитI актер Шармат Гурам.

Ауи йапшу ауыс азыласзара «Амара» кIьанджь театр йалкIгIарапI, йаргьи ауи хвду амапI, йадгылитI актерква зымгIва. Къарча-Черкес апны уагIа щардагIв рыхъазла атеатр ацара щцалрата йгьамылстI. Ауаса йанаъазара, йшырхIвауа апшта, «абыхъв МухIамад йзымцузтын МухIамад абыхъв дазцитI».

Ауи акIвпIта, агвып бзи йырбауа ауыс йгIалырщтуа ддырбарныс ауагIа йгвыргъьачIвауа йрызцитI. Апхъахьыла «Амара» театр йалакву ррепертуар тшауацIнадрыхырныс, абаза кытква зымгIва йгIарыкIвшаларныс, ареспублики Ставрополь крайи рапхьартаква рпны агIахъвмарраква адыргалларныс ргвыгъапI. ЙрылапI ауат рмурадква Апсны ацарагьи.