АнапIылачпараква, акIьанджьква, асуратква, апсыуа шIалахIвара йалу апкъыгIваква гIарбапI декабрь а 12 атшын Согъвым апны йгIахъыртIыз «АхьынапIква» зхьзу ауагIа йырцIасхата йызпщылу ауысква рфестиваль апны.
Барганджиа Саид
Апсны апны йапхъахауата йакIвшауа ауагIа йырцIасхата йызпщылу ауысква рфестиваль «АхьынапIква» гIахъыртIтытI Согъвым апны декабрь а 12 атшын.
Афестиваль апны ауагIа рыршIыйара йапшым анархараква, датша зджьара уызнымйуш анапIылачпараква гIарбапI.
Афестиваль адызгалыз Апсны ауагIа рыршIыйара а-Квта адиректор, Адуней апсуа-абаза конгресс ЙхIаракIу асовет йалу Кварчия Нури афестиваль ангIахъыртIуаз дгIачважвауата агIарбарта мурад хъаадата йаму даквгIашIастI. Ауи апсыуа напIъазаква ауагIа йдырдырра шатахъу гIаликIгIатI: ауат рунашва здыруа мачIыгIвпI.
«Араъа йгIадыргалыз апкъыгIваква Апсны анхагIвчва ъазаквала йшбайу гIадырбитI. ХIара ауагIа йырцIасхата йызпщылу ауысква тшауацIдхIрыхра хIгвыгъапI», – йхIватI Кварчия Нури.
ЦIабыргдзата, агIарбарта йгIадгылкваз мачIта узынйалуш анхараква тшрыхадыргIвазатI, зынцIра ауат йырпызщылыз анхагIвчва ъазаква йрабадыртI.
Ауи апшта, арахв чва йадынхалуа Когония Эдем ачва йгIалху апкъыгIваква йырхъазымкIва хIваспагьи гьатагьи йчпитI. Ужвы ари асахIат аъаза йара йжьира йыргылырныс дащтапI, ауи амщтахь ауи йнапIы йгIацIцIуа рыцIа йщардахуштI, йтиуашгьи йымазлуштI.
«АуагIа рыцIа йджьарщауата йызпшуа аурым айсыга гьата акIвпI. Ауи йызлайсдзуз агьата йгIахъыхпI йгьи йапшдзапI. Атара амшв чва йгIалхпI, агьата аура – анапIыркIыра угIалагата апынцIадза – сантиметр 70 йнадзитI», – гIахIайхIвтI Когония.
АхIвссаква рыцIа йхъызхуаз зынхара джвыквызцIагIвацауа адизайнер Салакая Инна лгIарбарта акIвпI. Инна швъабгъьыла далапитI.
«Швъабгъьы аласпауа салагищтара сквшыкI акIвпI йцIуа. СызлагIалагаз ахIврапшдза таракви апасха мартанкви ракIвпI. Ауи амщтахь ахIвссаква рыхъазла йапшым апкъыгIваква счпауа йджвыквсцIатI», – дызпщылу ауыс дгIаквчважвитI Салакая.
Ауи йшылхIвауала, Согъвым ахIвссаква лнапIылачпараква ауи аъара йъарымагIальаматхаз джьалщатI. АнапIъаза щарда мцIуата арахв чви амшIи йгIалху апкъыгIваква лчпауа дшалагазгьи гIахIалхIвтI.
Апсны ауагIа йырцIасхата йызпщылу ауысква рфестиваль «АхьынапIква» Согъвым йтагылу «НУР» зхьзу Акоммандит (АзазхъацIара зыщату) адкIылара апещ шIыц апны йадгалапI, ауи декабрь а 19-дза йакIвшуштI. Афестиваль йызтахъу зымгIва гIадгыл йауитI.
швталра йа тшаншвцIара атахъыпI.