Гагулия Геннадий данйы атшын АААК ахабарргарта портал апхьагIвчва ргватра азынахIырхитI цIыпх сентябрь а 8 агIан пхастала адуней зхIваджьыз ари акъральыгIва уысхагIв ду йбзазари, йынхари, йшани йгIарыквчважвауа агIагвалашвахраквала йалу абзагIвра.
Капба Арифа
Гагулия Геннадий хын ддыргылтI акъраль дапремьер-министрта. Ауи йакIвта йырпхьадзитI АхвгIахвтра-рхарджьра палата йагIаныршагIву. Айсра амщтахь йхьантаз асквшква рагIан ауи ауыс дшадгылуаз, йхъвдаквцIараква рырхъйара апны лшарата йгIайырбуз зджьара йгIанымхауата швабыж магIны рыман, адипломатия апны йгврыхвара Апсны аимидж ащаквгылра швабыж йахъватI.
Гагулия Геннадий Леонид йпа асквш 1948 январь а 4 атшын Гуадаута район Лыхны кыт апны дйытI. АтгIачва рапхъанчIвиква дрыуата азаджв – Дзуг-ипа (аткъвымхьыз Гагулия апхъанчIви квпшырата йаман – аредакция ррытаразга) швабыж йыладухун. Ауи й-ХIХ-хауа асквшышв агIан Апсны рыцхIагIала йырчвыз атгара заман анырхъагылаз йпсадгьыл кIайрышвырныс гьйымуытI, йхаквлагIвчвагьи ауи йаквгIазшIитуан. Геннадий Гагулия йаба Леонид акыт апны пIатIу йыквын, гIамта ауыра Лыхны акыт совет унашва ахъицIун, ауи агIан йшырхIвуз апшта, «дстаршинан».
Апхьарта дангIалга амщтахь 18 сквша йыртаз Гагулия Геннадий апхьара Минск дцатI, Белоруссия аполитехника институт (ужвы Белоруссия акъральыгIва техника университет – аредакция ррытаразга) архарджьра йгьи акъральыгIв уыхвара знархараз афакультет дыцIалтI.
Гагулия апхьара сквшква швабыж пхата йгIайгвалашвахуан. Телебара айчважваракI апны ауи абелорусква рхIальла йъарейшу, йъацкьу ахъазла йгвапхун, йаразаджв йакIвын аинститут шабгугьи (астудентква рпхьадзарала уагIа зыкь 25-гIв йнадзун) апсыуата йрылаз.
Ауыхвара уалагата аполитика апныдза
Асквш 1972 агIан аинститут дангIалга амщтахь Гагулия Геннадий сквшквакI руацIа уыхвагIвта дынхатI, апхъапхъа ауыхвара хъвшара апны дмастерын, дпрорабын, динженер хъадан,уадыргIван дунашвачпагIвын. Асквш 1977 агIан Геннадий Леонид йпа Рица гвал ажвлара рчара акомбинат аунашвачпагIв дитарагылагIвхатI йгьи ари аъанатIа жвсквша йынкъвигатI. УадыргIвана сквшщарда руацIа, асквш 1991 агIандза, Гудаута район агIарысабапра кооперация даунашвачпагIвта дынхатI.
Гагулия Геннадий йполитика уысхара злагIаджвыквлыз Апсны АССР а-Министрква р-Совет агIвымакъраль экономика абадырраквала АкъральыгIва комитет аунашвачпагIв йъанатIа анкъвгара акIвпI. Асквш 1992 йгIашIарышвта асквш 1995 агIандза Гагулия а-Министрква р-Совет апредседатель дитарагылагIвын, ауи амщтахь асквш 1995 йгIашIарышвта асквш 1997 агIандза а-Республика апремьер-министр йъанатIа дадгылан, акъральыгIва апны Ардзынба Владислав йымщтахь йгIвыджьхуз дъанатIанкъвгагIвын.
Зхъа йахвиту акъральыгIва шIыц ангIаншуз
Аполитика йгьи ажвлара уысхагIв Цугба Вячеслав йшихIвауала, Ардзынба апремьер йъанатIа дахъарцIарныс Гагулия йкандидатура анйыргылуаз ауи айсра агIан атыл адгалрала нхарата йакIвйыршуз, зджьара йгIанымхауата йгIайырбаз алшараква гIайпхьадзатI.
«Геннадий Леонид йпа Апсны ауыжвгIанчIви турых апны щта цIола гIанижьтI, – йгIаликIгIитI Цугба. – Ауи зхъа йахвиту апсыуа къральыгIва ангIаншуз Ардзынба Владислав Григорий йпа йыдзхъагылакваз дрыуазаджвын. Ауи агIан хIара хIыхъазла зымгIва пычIвын, йшIыцран. ЦIабыргыта, Геннадий Леонид йпа апремьер-министр йъанатIа дъахъарцIаз йшIу хIкъральыгIва ахъазлагьи йара йыхъазлагьи гIаншара шIыцдзан. Ауи ари ахъвдаквцIара пха йыквта дахIвра дула йырхъйатI. Ауи агIан Гагулия Геннадий йщаквйыргылыз анхарта ргIапсща уахьчIва йъагIадзазгьи йнардзата йынхитI хIва йауаштI».
Геннадий Леонид йпа аминистрква ркабинет унашва анахъицIуз акъраль йхьантаз аэкономика блокадала йанкIвыршаз, афинанс уысква аналарыхъвашаз агIан акIвпI. Цугба Вячеслав йшипхьадзауала, ари аъаща хьанта шщаквгылазгьи апремьер йылшатI хъвдаквыщт змаз аправительства гIанйыршарныс.
«Геннадий Леонид йпа заджвгьи дйапшымкIва анхагIвчва йызгIалхуан, ауат ауыс йшазъазуи ршIари йзашIырпшуата, йаргьи ари апш адгылща агIарбараква бзийын. Ауи дгIвычIвгIвыс рейшан, йынхара ъадаб хIагIан, ауаса ауи йаццауата дынбжьагIв бзийын йгьи дайгвыгIвыгIв унашвачпагIвын. Ауи ахъазла йыцынхуз зымгIвагьи бзи дырбун, пIатIу йыквырцIун», – йхIвитI Гагулия Апсны данапремьер-министрыз агIан аправительства ауысхарта йаунашвачпагIвыз Цугба Вячеслав.
Гагулия Геннадий агIвымакъраль политика анархаралагьи нхара ду акIвйыршатI, рахIа йхьантаз атлахан йгIашIарышвта. Апсны ахъахвитра Россия йацыркIындзыкIьара Гагулия Геннадий адунейла рахIа йхIаракIу анйараква дрылата дгIамгIвайстI. «Ауи апсыуа политика апхъагылагIвчва дрыуазаджвта Россия апрезидент Путин Владимир, Россия акъральыгIва уысхагIв Черномырдин Виктор, датшагьи щардагIвы дрынйатI, Апсны йапщылу ауысква рыцйырхъйун, ага хIреспублика ахъахвитра йацрымкIта йаъазтынгьи», – йгIаликIгIитI Цугба.
Апсны – ашIыпхьадзара швъа апны йапхъахуштI
Гагулия Геннадий апремьер йъанатIа хын йынкъвигатI: асквш 2002 агIан ауи ари ауыс дадгылтI Джергения Анри йымщтахь, йхынхауата Апсны аправительства данахъадаха асквш 2018 апрель агIан акIвпI, пхастала даныдзуашыз апхъала мызквакI бжьата.
«Сара йгIасгвалашвахуа йджьащахъвата сгвы йгIатахаз агIахIвахраква йрыуапI асквш 2003 агIан пщхъатакIла йалата Гал район апны йакIвшаз анйара ахабар – анйара йалан Грузия, Апсны, Россия амамырхчагIвчва, ЙадкIылу ауагIахъаква р-Организация ргIащтийыгIвчва, – йгIалгвалашвахитI Апсны АхвгIахвтра-рхарджьра палата апрезидент йъанатIа Гагулия Геннадий йымщтахь йахъарцIаз Мерцхулава Тамила. – Ауи азаман Геннадий Леонид йпа апремьер йъанатIа нкъвигун. Анйара лкIгIара зламаз ауи йапхъахауата Грузия апны йынхуз ЙадкIылу ауагIахъаква р-Организация агенерал секретарь йазалху йгIащтийыгIв Хайди Тальявини дъалаз акIвын. Анйара апны йызлачважвуз ауысква йрыуан амамырхчагIвчва рмандат апIатла йалархIара, артыгIвчва Гал район ргIацапахра йгьи Апсны Республика асуверенитет. Тальявини лгвы мгIвадзакIва Геннадий Леонид йпа тшылзынайырхауата йхIватI «ласыла Апсны ахъахвитра йанацыркIуаш амш шгIаталуаш йгьи ауи амщтахь адуней акъральква рашIыпхьадзара швъа апны Апсны йапхъахауата йшанызлуш, уадыргIвана Америка». Тальявини ауи даргвыжвкIуата дазцIгIатI: «Ауи уыла йшпагIацIауыжьуа?» – хIва. Геннадий Леонид йпа джьауап айтуата йшихIвазла, «адуней акъральква рклассификатор апкъ йтата ахIарыфква АВ (Абхазия) ахъала йгылитI, USA (Америка) ауи амщтахь».
Асквш 2005 агIан Гагулия Геннадий йгIанйыршатI, уадыргIвана даунашвачпагIвхатI Апсны АхвгIахвтра-рхарджьра палата, ари анхарта апны ауи аунашвачара уысквала дыззычпаз алшараква рахIагьи йауацIыхта йгIайырбатI.
ЩардагIвы цабыргыра алата йшырхIвауала, АхвгIахвтра-рхарджьра палата Гагулия данаунашвачпагIвыз атлахан Апсны агIвымакъраль уысква рминистерства джьгарта йырцхърагIун а-Республика аимидж адунейла йшщтIыцIуаш йазынхауата. Гагулия Геннадий дзапхъагылагIвыз ащтийыгIвчва агIвымакъральква щардала йгIарыкIвшун, Апсны АхвгIахвтра-рхарджьра палата ащтийыгIвчва адунейла йымчхъу акъральква йрыдзхъагылата агIарбартакви аджьармыкIьакви йрылалуан.
Гагулия йынкъвигуз адипломатия
Адунейла, агIвымакъральква рпны Гагулия йакIвйыршуз анйараква щардала йрылаз АхвгIахвтра-рхарджьра палата апрезидент Мерцхулава Тамила йшгIалылкIгIазла, ауи ддипломат дууын, ага йазалху адырраква гIайыквымшвазтынгьи. Ауи йажва багъьан, йамакIыргьи, йыцрымкIыргьи йхIвауа йаздзыргIвуан, йъадабла зныбыжьла, здунейпшыщала, зполитика хъвыцщала йаквымшвуз агIвычIвгIвысква дызрачважвун, ргвы йзыхвгIун.
Абар швапхакI. Зны Грузия Чехия агIвымакъраль уысквала рминистерства йразымкIва тшырзынадырхатI Апсны АхвгIахвтра-рхарджьра палата Прага апны йакIвшуз адуней турист джьармыкIьа Holliday World Top Gastro & Hotel йъалаз ахъазла. Ауаса Гагулия Геннадий ауыс ауи аъара гвыбзыгъата йацайырпан агIарбарта адгалагIвчва агрузинква рымразыра гIатадымрышвуа йахъазымкIва атшын шабгаз апсыуа щтийыгIвчва гвып рхчарала амальква нарахвтI.
Грузия рщтийыгIвчва ари ргвымхара бзира апщылата йъацапаз джьалщауата Мерцхулава Тамила лунашвачпагIв дицIгIатI агIарбарта адгалагIвчва ртланыкъвала ари апш айгвыгIвра азазаъаща шизахъвдаквыцIыз лдырырныс лтахъыта.
Гагулия араса йджьауапхатI: «АгIвычIвгIвыс йуагIахъа дыршвапхапI хIва йауаштI. ХIыуа дзачIвызлакIгьи йчва ауагIахъа шабгу йырхъыситI. Ауи акIвпI адуней шалу. Ууыс уазъазазтын ууагIахъа пIатIу рыквызлуштI. Абари акIвпI апатриотизм хцIарата йаму, ауи дзачIвызлакIгьи йымч аквхъуштI. Зуыс здыруа агIвычIвгIвысква гIадзынхIыргылырквын, ауат рталант штшгIахънатIуашла амальква нахIахвырквын ахвамыхври ацныхчалри ррыхъвартаква хIызрыгIвсуаштI. Згвы йахвиту, йцкьу ауагIахъа уырпахарныс утахъызтын – угвы уахвитха йгьи уцкьаха».
Цугба кьангьаш йыламкIва йхIвитI Сирия ГIарып Республика Апсны ахъахвитра йацыркIра ахъазлагьи Гагулия Геннадий дызхъадаз АхвгIахвтра-рхарджьра палата гIайрысабапуата адгалра уыс щарда шакIвйыршаз: «Ауи ари акъраль апны апхъа дгылата АхвгIахвтра-рхарджьра палата ахъатала абадырраква щаквйыргылтI. Ауи дызхъадаз ащтийыгIвчва гвыпква Дамаск апны йакIвшуз агIарбартаква йрылалуан, ага ауи азаман ауыла ацарагьи агIарбартаква рылалрагьи баргвыра ду рпщылазтынгьи. Йхъатала йакIвйыршуз анйараква рпны ауысхагIвчва драбадыруамцара хIкъраль ахъахвитра йацкIра йапщылу ауысквагьи нкъвицун. Ауи йгIалцIла швабыж йгвасрапI хIкъраль рщтийыгIвчва Дамаск йанцузгьи йангIайхуазгьи дъарыламыз, ауат амшква рагIан апхаста дъалашваз».
«Ауи хIара зымгIвагьи хвы хIзибун»
Йара йхъатала йгIайырбуз азазаъаща, анхара йазйымаз абзибара, ажва «йгьауашым» йхIварныс заджвгьи дъахвитмыз рбзирала Гагулия Геннадий йылшатI АхвгIахвтра-рхарджьра палата апны ймчхъаз, йхъацIауачвата анхари акъыльпшгIари йырзычпаз аъачIвгIагIвчва гвып адикIылырныс, рщардагIв рныбыжьла йшIата.
«Геннадий Леонид йпа анхара апны йъадаб багъьан, ауи ауыс ахъвдаквыщтра нархараква гIайрыбергьыльуан, дзачIв нхагIвызлакIгьи йуыс адигалуан, йзапш темазлакIгьи йхътIыта, йхIвауа хъауйырцIауата дзалачважвун. Здырраква цIолу дунашвачпагIвын, дашIамсуатагьи йхъа дадынхалуан, йылшараква йрылайырхIун. ЙъанатIа апны дыззынадзаз агIатгарала зынгьи дгьгIашIамсуазтI, йдыруан йылшараква ауацIихпхьадзагьи йзычпуш агалагьи рыцIа йшщардахуш. АуагIа рпныла, йалкIгIата йызхъазцIуз рахьыла, йынкъвигуз аджьауапкIра абзирала дзунашвачпагIвыз агвып рбзибарагьи рызцIабырграгьи гIайцхърагIауата йуыс рыцIа-рыцIа йхъалуан», – лхIвитI Мерцхулава Тамила.
Гагулия йанйыцынхуз атлахан йаквчважвауата АхвгIахвтра-рхарджьра палата анхагIвчва ацшIакIта йгIалыркIгIитI Геннадий Леонид йпа ахъаз друнашвачпагIвта акIвымкIва, дшбжьагIв гвыбзыгъаз, дшыгIвза цIабыргыз, дшгIвычIвгIвыс гвапаз, гвалымста зынгьи дгIанымхауата зымгIва рыхъазла йгвы шцхIуз йгьи дшрайгвыгIвуаз.
«Ауи зымгIвагьи хвы хIзибун, анхагIвчва гвыпгьи ахъаз бзи дырбауата акIвымкIва црикI йапшта дырбауа пIатIу ду йыквырцIун, – йгIалылкIгIитI Мерцхулава. – Геннадий Леонид йпа йдырраквагьи ауыс апны йъазарагьи дызцынхуз агвып гвыхътIыла йрыцагIвишун, ауи апш азазаъаща уахьчIвала уанашIашвауа мачIдзапI. ЧкIвынргIа АхвгIахвтра-рхарджьра палата нхара йалагарныс ахъазла амальта йрыму зымгIва ъанарахвуа, йалкIгIата йцIыхъвахауа асквшква рурала, зквшахIатхауа закIыпI – ауи гIанзыршаз агIвычIвгIвыс пIатIу ду шйыквырцIуз, ъадаб хIагIа шынкъвигуз, йъачIвагIа шIырпшыра амамкIва дшазычпаз. Ага дахIбазтынгьи агвып зынгьи йхъа гьрылйымхуазтI, даргьи майрата, йырчпуз гIальаматра азрымата йыцынхун».
Гагулия зынгьи дшамайчуаз, анхара бзи йшибуз ауысла йырхIвахуа щардапI. Геннадий Леонид йпа анхара мшы ацIыхъва йхъатачIв уатра апны дынхарныс бзи йбун, араъа ауи амандаринкви акивикви гIайриуан. ЙгIацIайгахуаз ашвырква щардала анхарта йгалун, агвып йыршIайыршвун.
УахьчIвала Апсны АхвгIахвтра-рхарджьра палата йаунашвачпагIву Мерцхулава Тамила йшылпхьадзауала, Гагулия Геннадий дйыдзхъагылата агIсквша дъайыцынхаз, ауи йпны йлылалкIыз абжьагажвакви акьангьашракви ракIвпI араъа нхагIвыта даналага амщтахь аунашвачпагIв йъанатIа дазынадзанцIкIьара йамылдаз амгIва апны йгIалцхърагIуз. Мерцхулава Тамила кьангьаш гьазгIалгуам уахьчIвала апалата апны дахIврата йлыму зымгIва щатата йырзалуа Гагулия йщтIайцIаз ащапI багъьа шакIву.
«Геннадий Леонид йпа сбзазара апны йхъаду бжьагIвыта дсзалтI. Сара ауи йшвапха йгIахъскIгIатI аъадаб шынкъвугушгьи, чхIара шгIауырбушгьи, упсадгьыл бзи йшубушгьи, ууыс уазцIабыргзара шатахъугьи, йгIаджвыквуцIаз ауыс хъвдаквыщт айаура ахъазла ймайрам ачIвырхъа уазайквра шатахъугьи. Сара ауи дъасызбзийыз ауралагьи хвы аквсцIун, сйапшханыс стахъыта йшвапха сашIпшуан йгьи сашIпшитI», – лхIвитI Мерцхулава Тамила.
Гагулия Геннадий йбзазара апхаста йшIначIватI: ауи асквш 2018 сентябрь а 8 атшын амгIва апны апхаста даладзтI – Сирия йцата йгIайхуаз аправительства ащтийыгIвчва ркортеж далата дшгIамгIвайсуазымцара. Апремьер ачымазагIвтара дшыргузымцара йпсы тыцIтI. Пхастала ауи йпсра йаргванкви йъахIыльчви йырхъазымкIва Апсны абзазагIвчва зымгIвагьи ргвы йыцIалтI, йшпакIву ухIварыквын апремьер-министр йъанатIа нкъвигауата йакIвйыршуз анхара ауагIа бзигвыгъа щарда апырщылуан.
Гагулия Геннадийи йхъапщыла Отырба Заири гIвысабичва гIадзындыргылтI – ужвы рпа Гагулия Астамур дхIаракьатчпагIвпI, рпхIа Гагулия Асида дайъазагIвпI.
швталра йа тшаншвцIара атахъыпI.