АкъральыгIва филармония апны Апсны ауагIа р-Абашта айсра йаладзыз рхъмаштылра йазынархата аклассика музыка аконцерт акIвшатI. Ари апш концерт ансисквша йадыргалитI.
Барганджиа Саид
Ашвахьа мартI а 18 атшын Согъвым йтагылу Гумба Ражден йыхьыз нкъвызгауа акъральыгIва филармония апны Апсны ауагIа р-Абашта айсра йаладзыз рхъмаштылра йазынархата концерт-реквием акIвшатI.
Аконцерт адыргалтI Гумба Ражден йыхьыз нкъвызгауа акъральыгIва филармония, ауи йацыркIтI Апсны акультура йгьи атурых-культура тынха агIахчара рминистерства.
АкъральыгIва филармония апиар-менеджер хъада Капба Арифа йшылхIвазла, сынчIва аконцерт йалан Россия йауу амузыкант дуква – Россияла гIатгара зму артист Спиридонова Маргарита, аскрипач Абрамян-Эшба Виктор, авиолончелист Спиридонов Андрей, адуней анкъвакъвраква рлауреатква апианист Турпанов Михаил йгьи агобоист Балашов Алексей.
«Амузыка ъазагIвапI, гIамта айшыскIла акIвызтынгьи угвы йгIанылыз ахвыртаква йрайъазитI, ухьыгIа мачIкI йухънараштылитI. ХIара йанакIвызлакIгьи швабыж магIны азыгIбитI аконцерт йалу амузыкантква ръазара ахIагIара. Анчва йбзирала, ужвыгIандзара ауи ауысла дахIвра хIымата хIгIамгIвайситI. Аконцертква ауралагьи рнадзара хIагIата йакIвшитI, йапшымызтынгьи йанакIвызлакIгьи йджьащахъвапI. Ансисквша аконцерт йалапI Апсны акъральыгIва камера оркестр. ЙхIгвыгъапI ари ацIас – аконцерт-реквиемква радгалра – йапымшвтуата йнахIырдзарныс, йшпакIву ухIварыквын ансисквша ауагIа ауат йшрызпшуа хIылахIхIвитI», – йгIалылкIгIатI Капба Арифа.
Ахъвлапын йазалхта дасасын аскрипач шIа Хагба-Терзян Мария-Эмилия. Ауи сынчIва йапхъахауата аконцерт далан йгьи лъамапсыма пшка йгIатылщттI Венявский Генрик йлирика макъым «АпхъанчIви турыхква».
«Ари апш уыс ъагIасквнадыргаз джьауапкIра ду шалаз сыласхIвун. Сара Апсны ахъахвитра йазгылата зхъа щтIазцIаз афырква, льажьа змамкIва йаладзыз асабиква, ауагIа хыйаква рыхьызла сгIахъвмартI. СгIазсыз амакъым нашхыйарагьи алапI, хIуачIв бзазара лашара знархару агвыгъараквагьи гIауыланацIитI», – лхIватI Хагба-Терзян Мария-Эмилия.
Апсны акультура йгьи атурых-культура тынха агIахчара рминистерства апресс-секретарь Марщан Сария йшылхIвазла, пщысквша цIитIта аконцерт-реквиемква ансисквша йакIвдыршитI, йанакIвызлакIгьи ауат радгалра йацхърагIитI аминистерствагьи.
«Арат ахъвлапынква схъатала швабыж магIны ду рымата йспхьадзитI. Швабыж йсгвапапI Апсны акъральыгIва филармония апны Апсны ахъахвитра ахъазла зхъа щтIазцIаз айсыгIвчва йырчвахъабагата абари апш ахъвлапынква ансисквша йъадыргалуа. ХIара амамырра хвы азыгIбара атахъыпI, йхIхъаштыл йгьауашым хIбзазара мамыр ахъазла ауат рхъа шщтIарцIаз», – лхIватI Марщан Сария.
Аконцерт-реквием ъадзакIвдыршауа асквшква руацIа ауи щардагIвы йыргвапхауата йазпшитI. Ауат дрыуапI ажурналист Шакая Рената.
«Ари асквш сара асабиквагьи гIаздтI аконцерт йапшырныс, йшпакIву ухIвараквын ауатгьи йрылархIвара атахъыпI ари ауыс амагIны. Амузыка амальла абанпараква рыцIа йгватшныта йрылархIвитI ахъмаштылра. Зхъа щтIазцIаз ауагIа рпсадгьыл ахвитра дара рыхъаз рыцIа йшхъадаз гIадырбатI. Ауат рпсра хIара йгьи йхIхьагIапI, йгьи йхIхъардугапI. Анчва дырзыразхатI аконцерт адгалагIвчва зымгIвагьи. Амузыка уаназдзыргIвуа айсра йаладзыз ауагIа уыла йгIацIалхитI, уыладзгьи гIахъагылитI», – лхIватI Шакая.
Ахъмаштылра концерт апрограмма йалан Платти, Моцарт, Бетховен, Венявский, Барбер, Шостакович рыршIыйара музыка.
Апсны ауагIа р-Абашта айсра йаладзыз рхъмаштылра йазынархаз аконцерт йапхъахауата асквш 2015 агIан йакIвшатI, ауищтара ансисквша йадыргалитI. Арат асквшква руацIа апроект йацыркIуата рхатI аларцIатI Апсны акъральыгIва камера оркестр, Апсны акъральыгIва хор капелла йгьи Москва акъральыгIва хор капелла. МартI йакIвшуз аконцерт-реквиемква рпны рыршIыйара гIадырбатI апсыуа ашвахIвагIвчва Черкезиа Нана,
Эшба Кристина, Ферзба Алхас, йгIадрайгваз ашвахIвагIвчва Алхазов Михаил, Шагун Елена, Хагба Елена, агIвымакъраль ашвахIвагIвчва Молина Любовь, Локоленкова Ольга, Косинов Геннадий, Леунова Лариса, Кожанов Александр. Асквш 2017 агIан апроект йгIалалтI Спиваков Владимир йдуней гвчIагIвчпара фонд астипендиатква.
швталра йа тшаншвцIара атахъыпI.