Апсны апны 09.04.2019 12:25 8825

ЙгIвбахауа Согъвым адуней кинофестиваль SIFF-2019 апрель а 8 атшын йхъыргIвахуата апхъагылагIвчва артшхъвагаква рырттI.

Барганджиа Саид

ЙгIвбахауа Согъвым адуней кинофестиваль SIFF-2019 агран-при ацрквнадыргатI Косово йгьи Франция йрыуу арежиссёрква рыгIвфильмкI – «Лара» йгьи «Месье Эндерсон». Ари ахабар гIархIватI ашвахьа апрель а 8 атшын афестиваль гвыргъьахъв айззарала йхъыргIвахуата.

АпхъагылагIвчва сом зыкь 150 йнадзауа ахча согIат рырттI. Ажюри рунашвачпагIв, Россия йауу акинорежиссёр йгьи апродюсер Федорченко Алексей йшихIвазла, асогIа хъада агIвшара гьуыс майрамызтI. Аэкспертква айгIайра зквнагуз анхараква «хсахIаткI раъара йамакIуа йрылачважвун».

«АгIвфильмкIгьи агран-при рквнагун. АзакIы жвлара уыс гIащтIызхуа арт-фильмпI, арахьари зыбызшва цIару, йцIолу ажанрла йхъыху фильмпI», – йгIаликIгIатI ажюри рунашвачпагIв.

Косово йауу арежиссёр Мора Рака йфильм «Лара» апны апхIвысква рпхыцIа баргвы даквчважвитI. Ауи афыр хъада апхIвыспа Зана лакIвпI, лаба йынкъвицауа атыхIацара паса тшачвхъылхчарныс дащтапI. Асценарий ахъаз хIадагIвачата йгьгIанымшатI: арежиссёр акинематография йахъазымкIва Косово апны апхIвысква рхчари рщтIыхри джьгарта дадынхалитI.

Зурала йайшысу Тома Скои йфильм «Месье Эндерсон» – комедияпI, ауи афыр хъада Огюст Луазо йъачIвагIала дбальзамировщикпI. Ауи Эндерсон зхьзу заджвы йхъвади ахъазла йунагIва данцара ауаъа заъащала йджьащахъву йпхIа длынйитI. Тома Скои – зхъа збжьахыз дрежиссёрпI, апхъала динженерын. Астудент адкIылараква рпны йхъихуа тшибжьатI, уадыргIвана ахъатачIв апхьарасахIатква рпны дапхьатI.

Акинофестиваль адуней жюри арежиссёр Мамыкин Антон йфильм «АквайчIвара апны шкIвокIвала» ахъазла йхпахауа асогIат йквнадыргатI. Ауи гIазквчважвауа афыр мышкIы йхъапщыла йлайхIвхитI йылчвыцIайкIуата дшпсахьыхвуаз. Ауи амщтахь йгвынгIвырам агIаншараква йызнийитI: дъанхауа арачвагIацIхырта апны пIайракIгьи гьгIайкIнылхуам, дцкьадзата дгIанхитI.

Артшхъвагаква рквнадыргатI йарауаса йагъьу ахъацIа йгьи апхIвыс турасквала йгIахъвмаркваз. Ауат йрынкъвгагIвхатI аитальян Фабио Ризутто (афильм «Апша дзылуква») йгьи аиспан фильм «КIасыжв кIьанджьы» апны йгIахъвмарыз актриса шIа Люциа Диез.

Афестиваль апны йагъьу режиссёрта дырпхьадзатI Полякова Мария (афильм «Париж ацара»), йагъьу операторта – Маркович Игорь (афильм «Ъарама»). АпшыгIвчва рсогIа аквнадыргатI абелорус режиссёр Семенова-Алейникова Митрия лфильм «Франка».

Акинофестиваль йалан апсыуа фильмзаджвыкI – йбергьльу апсыуа гIвгIвы Лакрба Михи йновелла йгIахъыху арежиссёр шIа Цурцумиа Джано йфильм «Сасы».

«ГIальаматпI йгIвысквшахауата Апсны апны агIвыма къральква йгIартыцIуа арежиссёрква гIаздгылуа адуней кинофестиваль ъакIвшауа. Асасчва Апсны йгIайитI, араъа абзазаща шаъу рыла йабитI», – йхIватI Цурцумиа.

Какалиа Занда йшылхIвауала, асквш 2019 агIан анкъвакъвра агеография йалудыргIауата тшауацIнахтI», афильмква рнархараквала, йгIазквчважвауала афестиваль апрограмма ъабайаз ахъазла апшыгIвчва швабыж йразхатI.

«ХIара джьауапкIра ду хIылахIхIвауата йгIалхIхитI афильмква: тшазынархара 3000 райхIа гIахIайдзатI, афильмква зымгIва хIырпшытI. Апшраква рпны апшыгIвчва ъащардагIвыз швабыж йхIгвапахатI. Ауат рпхьадзара агалагьи рыцIа йщардагIвын цIыпх ацкIыс», – лхIватI Занда.

Адуней фестиваль SIFF-2019 Согъвым апны йгIванхауата йакIвшатI. СынчIва анкъвакъвра йгIарщтитI тшазынархара швъата 3000 раъара, ауат йрыуата зурала йайшысу фильмта йгIалырхтI 30, Испания, Франция, Германия, ГIвадахь Корея, Польша, Косово, Иран, Эстония, Тунис, Италия, Румыния, Греция, Китай, Къазахстан, Андорра, Трыквшта, Россия, Белоруссия, Апсны къральквала йгIарщтийыз.