Къарча-Черкес йтабзазауа ауагIахъаква рыбызшваква ргIахчари ртшауацIыхри знархару ауысква йрылачважватI ансисквша йакIвшалауа анаука-практика конференция «Кълыч Рауф йыхьызла апхьараква – 2019» апны.
Барганджиа Саид
Россия аштаква гIацIанакIуата ансисквша цIаста йщаквгылу анаука-практика конференция «Кълыч Рауф йыхьызла апхьараква» апщаша апрель а 11 атшын Къарча къала апны йакIвшатI. Ауи Къарча-Черкес йтабзазауа ауагIахъаква рыбызшваква руысла абаргвыраква йырзынархан.
Аконференция «Кълыч Рауф йыхьызла апхьараква» йаднакIылтI Россия йауу абызшвадырыгIвчва. Ауи йалакваз апхьахьакви арыпхьагIвчви Къарча-Черкес ауагIахъаква рыбызшваква ргIахчари ртшауацIыхри йырзынархата хъвдаквыщт зауаш агIамальква йырзыпшгIун, ацри бызшваква рарыпхьаща агъьчIвра апны уахьчIвала хачIвыта йгылу йрыквчважвун.
Аконференция гIахъызтIыз апленум алачIвара апны дгIачважвауата АААК ЙхIаракIу асовет аунашвачпагIв, «Алашара» адкIылара апрезидент Эгьзакь Мусса апхъапхъа йгIайрахатI аконференция зыхьыз ахъхIвалгIу апхьахьа Кълыч Рауф йгIатгараква. Асоветква рзаман хIантагылаз йгIашIарышвта ари апхьахьа бергьльы ауагIахъа чкIвынква рыбызшваква ртшауацIыхра знархару ауысква гIащтIихуан.
«Афилология наукаква ркандидат, абаза бызшвадырыгIв ду, атурыхдырыгIв, апсыуа-адыгьа бызшваква рпны ажвагIаншащала, морфологияла, диалектологияла, турыхдыррала йъачIвагIагIвыз Кълыч Рауф ахв узымшвушта тынха байа гIанижьтI. Ауи дыравторпI гIвмонографиякI, гIвапхьагакI, хажваркI, йхIаракIу апхьартаква рстудентква йырзалху апхьагакви ацхърагIагакви цба йнадзауата, наука гIвырата 70 райхIа», – йхIватI Эгьзакь Мусса.
Мусса ХIабальа йпа йгIаликIгIатI арат апхьараква рмагIны – араъа абызшва проблемаква рырхъйара йазынархата йазакIу адгылщакI лырхитI. Датшагьи ауи йшихIвазла, асквш 2019 аконференция агIарбараквала «апхьартаква рпны йынхауа цри бызшвала арыпхьагIвчва йырзынарху акьангьашра ажванахъаква» нарахвуаштI.
«УадыргIвана арыпхьара рыцIа йагъьхауата йхIаракIхуштI, абызшваквагьи ргIахчара йахъазымкIва тшауацIырхуа, абзазара апсахраква йрыквыргIапста ажва шIыцква гIалалуа йымгIвайсуаштI», – йгIаликIгIатI Эгьзакь Мусса.
Россия аштаква гIазцIазкIуата анаука-практика конференция «Кълыч Рауф йыхьызла апхьараква» йапхъахауата асквш 2015 агIан Къарча-Черкес Республика апны йакIвшатI. Ауищтара ансисквша аконференция цIаста йакIвшитI, ауи йаднакIылитI швыгIвпхьадзара йнадзауата абызшвадырыгIвчва, арыпхьагIвчва йгьи ажвлара уысхагIвчва. Конференцияпхьадзагьи агIарбараквала йагъьу анаука гIвыраква разкIкIра гIацIырщтитI. Аконференция адыргалитI Абаза-апсыуа уагIа ртшауацIыхра ацхърагIара знархару адуней адкIылара «Алашара», Къарча-Черкес къральыгIва университет йгьи Къарча-Черкес республика арыпхьагIвчва рдырраква йъарыладырхIауа аинститут. Аконференция йыхьыз ахъхIвалгIапI сынчIва сквшы 85 зхъыцIуашыз, йбергьльу абызшвадырыгIв йгьи акIавкIаздырыгIв Кълыч Рауф.
швталра йа тшаншвцIара атахъыпI.