Йбергьльу апсуа суратчпагIв йгьи аскульптор, Апсны асуратгIвгIвчва радкIылара аунашвачпагIв Джениа Виталий йынхараква ргIарбарта гIахъыртIытI Согъвым апны.
Джениа Виталий йчпаз амшIы, агипс йгьи аджьаз йгIарылху аскульптуракви йгIвыз асураткви май а 17 атшын Согъвым Аквта гIарбарта пещ апны йандыргIалтI. ЙгIахъыртIыз агIарбарта сынчIва сквшы 70 зхъыцIуа йбергьльу апсуа суратчпагIв йгьи аскульптор йюбилей йазынархапI.
Ари агIаншара Джениа йыхъазла ужвыгьи магIныкI амапI – арат амшква ауи «Апсны Республика АуагIа рсуратгIвгIв» чIахIра хьзы гIайквнадыргатI. АгIарбарта ангIахъыртIуаз ХIаджьымба Рауль йыхьызла асуратчпагIв йайхIвахIвызI а-Президент йкьангьашагIв Зантариа Владимир аршIыйагIв ужвыгьи сквш щарда дыззъазу ауыс дадгылазларныс шизыйтахъу йайхIвтI.
Джениа Виталий дхвыцищтарагьи сурат йгIвитI, ауаса апхъапхъа йгвабызта ауи ъачIвагIата йгIалихныс дгьазымхъвыцуазтI, дыззымхъвыцдзахуазгьи дскульпторхушта акIвын.
«Сани саби сайъазагIвхарныс ртахъын. Саргьи медицина институт сыцIалныс тшсрыхIазыруан, ауаса ауысква датшата йцан ар къвырльыкъвхара сыргатI. Зны уахъынла счIапщауата сара йычваз хIунашвачпагIв йсурат хъсшвшвгIатI. Ауи [йызгIвыз] аниба ауи аъарала йгвапхан суратчпагIвта сымцакIва йгьйымуазтI. Ауи агIан саргьи йгIасгвынгIвхьан сурат зыгIвныс шстахъу», – йъачIвагIа дшазгIайыз гIахIайхIвтI асуратгIвгIв йгьи йгIацицIахтI ар дшгIахъынхIвыхуаз асуратгIвгIвчва ъадрыхIазыруа училища скульптурала ахъвшара дшыцIалыз.
УахьчIва Апсны апынгьи ауи утыцIтагьи Джениа Виталий амонументал йгьи астанкова (монументал азъазара йауу, ауаса рыцIа йхвыцу аршIыйараква – аредакция ррытаразга) скульптураквагьи йхвыцмыцу апластикагьи йацапшыта йгIаздахIвуата рахIа йырдыруа асуратчпагIвчва дрыуазаджвыпI. Асквш 2012 агIан ауи азъазара дъазынхауа ахъазла Россия акультури азъазари р-Дуней Академия йщаквнаргылыз ахьапщ медаль гIайквнадыргатI. Ауи йхъатачIв гIарбартаква йанакIвызлакIгьи уыла йгIацIашвауа культура гIаншарата апшыгIвчва хънахитI.
«Сара щарда цIуата ари агIарбарта сазпшуан, йауа ухIварыквын Джениа Виталий йынхараква йанакIвызлакIгьи угвы йнадзитI. Анчва дизыразхатI ауи йыршIыйара ахъазла», – лгвтараква хIыцагIвылшатI агIарбарта йгIайкваз йрылаз Дарчам Индира.
Джениа Виталий йгIарбарта май ацIыхъвадза йынхуштI, ауи дзачIвызлакIгьи хвыдъа дапшы йауаштI.
швталра йа тшаншвцIара атахъыпI.