АААК ахабарргарта портал асквш 1993 июнь а 12 атшын «Къарча-Черкес» телерадиуакомпания апны йгIаншаз абаза телебара атурых знархару абзагIвра дрыхIазыртI.
ХIасарокъва Бильаль
Асквш 1993 июнь а 12 атшын «Къарча-Черкес» къральыгIва телерадиуакомпания аэфир йталтI абаза бызшвала йапхъахуз ателебара атра. Ауи атшын гвыргъьарамшын, сабшан: июнь а 12 – Россия Амш. Ажурналист ЧкIала Георгий йапхъахуз атра джвыквицIауата апшыгIвчва араса тшырзынайырхатI: «УахьчIва Россия йагвыргъьарамшпI. ЙкIьыду агвыргъьахъв хIымапI абазаквагьи: йапхъахауата аэфир йталитI абаза бызшвала йадгалу ателебара атра».
Йапхъахуз апрограмма цри бызшва йазалхын
Ростов (Ростов-на-Дону – аредакция ррытаразга) къральыгIва университет йгIалгаз ЧкIала Георгий Къарча-Черкес ателебара студия апны асквш 1993 апрель мыз агIан дынхауа далагатI. Ауи атлахан астудия гIвымызкI цIуата йынхун – урышв бызшвагIвацала. Георгий йадигалуа далагатI ателебара абаркIыраква «Акыт ансимшбзазара», «Йпхатшу агIарбара», «Акриминал хабарква» датшагьи, ахабарква знархараз апрограммаквагьи акIвйыршун. Май мыз агIан ателебара компания апны йщаквдыргылтI цри бызшваквалагьи атраква джвыквырцIарныс. Абараъа Георгий йгIайыхъвахтI абаза газет апны хвысквша руацIа йадикIылыз аъазара: абаза бызшвала атраква радгалра ауи йыхъвдаквырцIатI.
«Йапхъахуз атра абаза бызшва йазынасырхарныс йщаквсыргылтI, – йгIайгвалашвахитI Георгий Константин йпа, – тамамта йухIвушызтын, апхьартаква рпны абаза бызшва арыпхьара баргвырата йапщылу. Швапхата йгIахIахвтI асабиква щхъарауа диалектла (абаза литература бызшва щатата йазалтI тIапIанта диалект – аредакция ррытаразга) йъачважвауа Хъвыжвду кыт апхьарти абзазагIвчва рщардагIв цри бызшвала йъамчважвауа Московск микрорайон апхьарти. Ауыс далачважварныс дгIахIрайгватI Черкесск апны йаныргIалыз Россия Федерация арыпхьара ауагIахъа уысква ринститут афилиал анхагIвы Гвана Луиза. Атра апны магIны ду змаз ауысква хIрылачважватI».
Йапхъахуз асквш: гIвырагьи монтажгьи гьаъамызтI
Асквш 1993 январь йгIашIарышвта зынхара джвыквызцIаз «Къарча-Черкес» къральыгIва телерадиуакомпания аъамапсымаквала швабыж льальата йадгалан. Астудия апны закI зланырцIуш, монтаж зларчпуш ъамапсымакIгьи гьаъамызтI. Атраква зымгIва апхъала аполитика арыпхьара тдзы йазалхыз атдзы ауацIа йадыргалыз астудия апны йшакIвшузымцара зынла рейша аэфир йталуан.
«ЗакIзаджвыкIта йаъаз акамера Betacam, сахIатбжакI видеогIвырата йзыншвалуаз (астудия йапщыламкIва йакIвшуз ателебара журналистика ахъазла йгIандыршаз апрофессионал камераква рпычIв абанпара – аредакция ррытаразга), гIадрысабапуамцара зынзамыза сюжетквакI анырцIун, ауатгьи монтаждъа апрограмма йаларцIуан, атра акIвзыршуз рбжьыла зынла йрыквчважвун, «асурат» астудия акамераквала ателебара мониторквала йшгIадырбузымцара йгIаркIуан. Дара астудия акамераква йайтыпуз ателебара станция акомплект йаланакIуан, ауи агIан агIыла йындырхауата йажвхьан», – йхIвитI ЧкIала Георгий ауи азаман ателебара нхарта гIапсарата йапщылаз «амадзаква» гIахъитIуата.
Ари апш нхаща шварагIварарата йапщылаз гьмачIмызтI – аэфир апышвтырныс закIы гьазхIвамызтI, мачIымхума атра йалазларныс йгIадрайгвуз агIвычIвгIвысква швхIаусыгIвата йырзалуашыз. ЦIабыргыта, Анчва йгIайхчатI: аэфир рейша йталуамцара йъадзанхуз руыс зынгьи йгьапымшвттI. Ауаса агвжвайыгIва-хъыччахъва гIаншараква аъан.
«Зны астудия апны йгIахIрайгватI аршIыйагIвчва ГваджьаргIа ртгIачва (Къарча-Черкес йгьи Апсны рпны йбергьльу акультура анхагIвчва ГваджьаргIа Абрагьзауыри Галини – аредакция ррытаразга), – йгIайгвалашвахитI ЧкIала Георгий. – Атра хъвщардала йалан: афыр хъадаква ргIачважвара йахъазымкIва ауат рпхIа Мадина амандолина дасуамцара Галина Бесльан йпхIа лашвакI Мартаза Дмитрий йхIвара атахъын. ЗымгIва асценарий йшану апшта йымгIвайсуан, ауаса Мартаза Дмитрий ауатыкв дгIаталра анатахъха дгьырмаухтI… – тутын йчварныс дджвылцIтI. Артист йархIвта астудия дгIардхындзыкIьара айчважвара апцIырхвхвара атахъхатI».
УыжвгIанчIви турых ахъыхра
Абаза бызшвала апрограммаква адызгалуаз агвып рынхара анархара хъада зынла йщаквдыргылтI – уыжвгIанчIви турых гIадырбарныс, уыжвгIанчIви уагIа йырхъырхырныс. «РшIыйагIвчва гвып» анхIхIварагьи ахърыкъьара алан – абаза бызшвала апрограммаква адызгалуаз гIвыджь ракIвын – ажурналисти арежиссёри. Абаза бызшвала апрограммаква апхъапхъадза режиссёрта йрыдынхалуаз Альбот Марина лакIвын, уадыргIвана йара ауи асквш ноябрь мыз йгIашIарышвта ари ауыс дадынхалуа далагатI, уахьчIва йъагIадзазгьи дадынхалитI МалхIваз Марина. Апрограммаква гIаджвыквылцIун адиктор ЧбытI ФатIима.
«ХIара абаза кытква рбзазара, ауагIахъа культура агIатгараква, хIуагIа зрыпшдзауа йгьи йджьащахъву агIвычIвгIвысква, анхагIвчва шгIахIырбушыз ацIыхъва хIтагылан. ГвынгIвырапI апхъанчIви турыхгьи хIуыжвгIанчIви уысквагьи хIылапш йшыцIаз», – йгIайгвалашвахитI ЧкIала Георгий.
Рынхара анджвыквырцIагIваца ауагIахъа редакцияква, абаза редакциягьи рылата, эфир заманта йрымаз дакъикъа 20 ракIвын – мызкIы апны зны, асабшаква рагIан. УадыргIвана аэфир заман йаладырхIауа йалагатI, апрограммаква мчбжьыкI апны зны йакIвшауата йырчпатI. Аредакция йгIарыквшвуз азаман магIны амата йшгIадрысабапуашыз йащтан. Амыз агIарбараква ауи ацIыхъва йгIартуаз ахабарргага-публицистика телебара журнал «ХIымшква» апны йадыркIылхуан.
АгIвычIвгIвыс лашараква рынйарта
АпшыгIвчва швабыж йыргвапхауата йаъан аэтнограф Къвныжв Льольа дызлата йакIвшуз атра адкIылара «ХIцIасква», абаза кытква ртопонимика йазынархата афилология наукаква ркандидат (ужвы – адоктор – аредакция ррытаразга) Йуан Сара йакIвлыршуз «ХIтурых анапаква». Аэфир йталуан амузыка программаквагьи: ауат йрылан акъвабызч ъазаква, ахIбачва ХIачвыкъва Льольа, Къвапсыргьан Дахауас, Цекъва Зарыльа, ансамбльква «Абазинка», «Шарпны», «Абазгь», «Амра», «Марашта», артистква Мартаза Дмитрий, Чыкъ Сима, ХIасан Римма датшагьи.
ЙащтагIайуата, агIвгIвы Къвапсыргьан Валентина лгIаджвыквцIарала, ашIаква рквтала абаза макъымквала, ашваквала, агIахIвраквала телебара анкъвакъвра акIвшауа йджвыквылтI. Ауи анкъвакъвра йалан уахьчIвала йбергьльу абаза ршIыйагIвчва рщардагIв. Аредакция анхагIвчва бзагIвра щардагьи адыргалтI: Абашта айсра Ду йалаз Къвапсыргьан Уасыф йгьи Аджьбакь ТIама, апхьахьаква Егьдза Назир, Тльыс МухIамад, Агырба Юрий, Кълыч Рауф, айъазагIв ХIвран Алексей, асуратгIвгIвчва Мартаза Нуральи йгьи Агача МухIамад, аспорт бжьагIвы Бала Арсен датшагьи йбергьльу гIвычIвгIвыс щарда йгIарыквчважвауата.
АгIвгIвчва йырзынархата атра абаркIыра кIьыда акIвшун. Ауи йахьзын «АршIыйара. Абзазара. АгIвычIвгIвыс». Ауат нархарата йрыман агIвгIвы арат ауысквала йхъвыцраква гIайрахарныс. Ари абаркIыра атраква йрысасын ЧквтIу Микаэль, Мыхц Кьарим, ТхIайцIыхв Бемырза, ЛагIвычв Джьамльадин. АгIвгIвчва рызджьакI айчважвара рыцIа йгIалырхуан, ауи ахIатырла атраква рызбжа интервью квпшыра рымата йакIвшатI.
«ГвасрапI, ауаса абаза бызшвала атраква анджвыквыл атлахан йакIвшаз гIвырата архив апны йгьгIанымхатI – ауат рейша аэфир йталуан, – араса йхIвитI йапхъахуз ателебара программаква равтор йгвы йыцIалуата. ЦIабыргыта, рызджьакI аунагIва апны йынкъвыргуз авидеомагнитофонква йырнырцIарныс рылшатI. Ауат ужвы аэфир ахъазла йгьуызгIарысабапхуашым, ауаса апхьартаква йа акультура нхартаква йадыргалуа ауысквала йгIарысабап йауаштI».
РыцIа кIьасата йадыргалыз апрограммаква гIвырата ателерадиуакомпания архив апны йынкъвыргитI. Ауат рмагIны дупI, ателебара журналистики арежиссури йыршвапхапI.
«Апщашаква хIунагIва хIадгылхырныс хIгвжважвитI»
ЙагIвсыз асквш 26 руацIа астудия алшараквагьи йара абаза телебарагьи швабыж тшырпсахтI. Апсахраква апрограмма радгалрагьи атраква рквпшырагьи йрыдсылтI, анхагIвчва гвыпгьи ауыс рыцIа йазъазахатI. Арат асквшква руацIа абаза бызшвала аредакция апны журналист шIа щардагIв нхатI: Шогьан (Мукъай) Алеся, ТхIакIвщын (Муратыкъва) Белла, ХIачпакъ (Темыр) Альбина, ХIакIвын (Квициниа) Инна, НакIвахв (Чачан) Аза, Джьбаба Радмир.
УахьчIвала апрограммаква адыргалитI Льи Зауыр, Хвына ФатIима йгьи Аджьбакь Анжела. Рыуа дзачIвызлакIгьи анхара шIыцракI, чIащыгIваракI алайцIитI. Ауи абзирала апрограммаква рыцIа-рыцIа йахъыхацIыххитI, апшыгIвчва хъат-хъата йырзалху атра шIыцква гIаншитI. АуагIа швабыж йыргвапхитI Адуней адкIылара «Алашара» рцхърагIарала йадыргалуа атраква – амацIаура программа «ЙшвшIамшвакIва йгьауашым» йгьи асабиква йырзалху «Марашта».
УахьчIвала «Къарча-Черкес» къральыгIва телерадиуакомпания атраква хвбызшвакIла йакIвшитI – урышвла, къарчала, агвхъауала, абазала, нагIвайла. Ателерадиуакомпания аунашвачпагIвчва ргIаджвыквцIарала ужвы аредакцияква зымгIва рыхъазлагьи йхъадапI апрограмма «Уыхъвлапын бзита, хIреспублика!» Астудия апны гвыхътIыла йакIвшауа айчважвара угвы йаланархIауа йахъазымкIва ахабар гIальаматквагьи ашваквагьи аларцIитI.
Ажва гьалам, аредакция йгIартитI абазаква йгьи Къарча-Черкес Республика рпны магIны змата йгIаншауа зымгIва рхабарква. Атраква анадыргалуа йгIадрысабапитI йызрыпшдзауа, профессионал квпшыра рызтуа ауыжвгIанчIви амальква зымгIва.
Амчбыжь амшква ателерадиуакомпания аредакцияква рквтала йшапI. Абазаква апщаша акIвпI йрыквшваз.
«Абаза телебара хIбзазара йахъвхатI, – йхIвитI йбергьльу апхьахьа, Къарча-Черкес къральыгIва университет апроректор, апрофессор ПIаз Сергей. – ХIащцахьатI: апщаша ангIадзара хIынхара уысква ласылас йахъвдаквыхIщтта хIунагIва хIшадгылхуаш, хIыбызшва эфир хIшаквшвахуаш хIащтапI. Йшыздыруала, ауи азаман аннадзара акытква рпынгьи ауагIа рунагIва уысква надрыскIьитIта ателевизорква йрыдзхъачIвитI».
УахьчIвала ателебара программаква йангIаутахъхара, уанахадзара Интернет апны уырпшы йауаштI, ауаса абазаква рцIас гьдрыдзуам – ауат абаза бызшвала ателебара атраква апщаша ахъвлапын телевизорла йырпшрыквын рыцIа йгIалырхитI. Аредакция рхачIв хъадагьи тшампсахуата йгIамгIвайситI: уыжвгIанчIви абаза турых шгIадырбуш, хIуыжвгIанчIвиква йшырхъырхуаш йащтапI.
ЙырзыхIтахъпI анатгьи аратгьи апхъахьылагьи гвыргъьарала йырчвыта йабаргвышхваланыс!
швталра йа тшаншвцIара атахъыпI.