Интернет апны рыцIа-рыцIа щардагIв хънахитI Апсны гIазырбауа Италия йауу амакъымршIыйагIв Эйнауди Людовико ймакъым «Щаквгылра» зцIу авидео – ауи Апсны ашIыпIаква рпны пхIвыспакI пианино дасуата йгIанарбитI. Авидео ахъызхыз йгьи йабызтыз ари ауыс гьыръачIвагIам. Ауат Отырба Даниил, Отырба Давид, Лагулаа Беслан ракIвпI. ЙгIанарбауа апхIвыспа агIахIвгIвы йгьи апианистка Бутба Оксана лакIвпI.

Отырба Даниил йшихIвауала, авидео мшкIыла йхъырхтI, цIабыргыта, ауи ахъазла йажвыз пианинокI гIаута «рояльта» йчпахра атахъхатI.

«МызкIы ахча азскIкIытI, уацIыхъван пианино зму сазцIгIауа сахъыкIвшун. ЙгIаснапIыцIашваз ауыхвага пкъыгIваквала рояль счпатI, апианино ауацIа йтаз ауаъа йтасыргылын йсшвыхтI», – йхIвитI ачкIвын.

YouTube йгIатарцIищтара йагIвсыз агIвымызкI руацIа авидео 2000-гIв райхIа апшхьатI, мшигIадзагьи ауи апхьадзара йалахIитI.