Август а 24 йгIашIарышвта август а 27-дза АААК ЙхIаракIу асовет аунашвачпагIв нхара уысла Иордания даъазлуштI.
Барганджиа Саид
АААК ащтийыгIвчва а-Конгресс ЙхIаракIу асовет аунашвачпагIв Эгьзакь Мусса дырхъадата август а 24 атшын Иордания Хашимит ПаштахIыгIвара йцуштI. Ауат ауаъа хымшкI йаъазлуштI.
А-Конгресс архъйагIв секретарь Гицба Инар йшихIвазла, йара йхъатала Иордания рыцIа паса, август а 20 атшын, самолётла дпссгIуштI. Датшагьи ащтийыгIвчва гвып йрылапI а-Конгресс ЙхIаракIу асовет йалу Алшундба Инвер йгьи АААК ахабарргарта портал агIацIщтыгIв-редактор Хагба Изольда.
«ХIъацауа мурад хъадата йхIымапI – а-Конгресс ЙхIаракIу асовет аунашвачпагIв Эгьзакь Мусса, Иордания йту апсуа-абаза диаспора йгьи айщчва кIавкIаз диаспораква ранйара, апсуа-абаза тгIачваква тшрылазпхьадзауа абзазагIвчва ргIаура йгьи ашвъа йанцIара, АААК амурадкви ахачIвкви рпрезентация», – йхIватI Гицба Инар.
Агвып Иордания йъадзану адиаспора ажвлара адкIылараква рунашвачпагIвчви руысхагIвчви йрынйарныс ргвыгъапI. Ауат йрыуапI, йапхъахауата, Черкес гвчIагIвчпара адкIылара йгьи адиаспора аспорт клуб «Аль Ахли Клаб». Ауи акIвымкIва ауат ажвлара уысхагIвчвагьи акультура анхагIвчвагьи йрынйуштI.
«Ацынхара уысква хIрылачважварныс хIтахъыпI, Иордания апны АААК ашIыпIа хъвшара гIанхIыршарныс, адиаспора йрыуу ауагIа Адуней апсуа-абаза конгресс йшалалуашла амальква нахIахвырныс хIгвыгъапI, акультура ауысла хIацынхара анархараквагьи хIрылачважвуштI», – йхIватI Гицба Инар Иордания апны йыздынхалуаш ауысква дрыквгIашIасуата.
Иордания Хашимит ПаштахIыгIвара ацара а-Конгресс аунашвачпагIвчва нхара уысла агIвыма къральква ргIарыкIвшара знархару асквш 2019 аплан йаланакIитI. Ауи аплан ЙхIаракIу асовет асквш 2018 агIан йдрыбагъьатI. СынчIва асквш ацIыхъвадза АААК ауысхагIвчва йыргвыгъапI йарауаса Сириягьи, Германиягьи, Голландиягьи, Трыквштагьи йцарныс.
А-Конгресс гватра ду азрымапI адунейла апсуа-абаза диаспори ауат йрыуу ахIаракьатчпара къарукви радкIылра, адуней акъральква рквтала Апсны агыларта арыбагъьара йызлацхърагIуш амальква йырзыпшгIитI. Ауи апшта, сынчIва апрель мыз агIан Адуней апсуа-абаза конгресс ауысхагIвчва гвып Мсыр нхара уысла йаъан. Ауаъа йъадзаныз магIын ду зму анйараква акIвдыршатI. Мсыр йтабзазауа Абаза ткъвым йрыуу щардагIвгьи аргваныта йрабадырныс йгьи йшацынхушла йрангIалырныс рылшатI
швталра йа тшаншвцIара атахъыпI.