Сентябрь а 16 сквшы 70 йхъыцIитI ШенкIауа МухIадин, КъЧР апны ажвлара-политика уыснкъвгагIв, АААК ЙхIаракIу асовет йалу. АААК ахабарргарта портал ауи агIвычIвгIвыс джьащахъва йбзазари нархара щарда зму йынхари йгIарыквчважвауа абзагIвра аднагалтI.
Айсан Людмила
ШенкIауа МухIадин Али йпа – КъЧР апны гIатгара зму йхIаракIу апхьарта анхагIвы, ажвлара йгьи аполитика уыснкъвгагIв, АААК ЙхIаракIу асовет йалу – асквш 1949 сентябрь а 16 Ставрополь край, Къарча-Черкес автоном област йаланакIуа Хъвыжвду кыт апны ШенкIауа Али Айда йпи Гедегушева Шам Мырзабакь йпхIи ртгIачва апны дйытI.
«АпсхIвква» шварацыгIв ткъвымпI
Йара МухIадин Али йпа йширыбагъьауала ШенкIауаргIа КIавкIаз айсра анакIвшуз апсуа кыт ПсхIвы йгIатыцIхра атахъхатI. Асквш 1864 агIан «апсхIвква» (заман ауыра ауат араса йрыпхьун) МухIадин йабаду йаба Даквын Заухас йпагьи дрылата йауыраз йгьи йхIатлаз амгIва ангIамырда амщтахь Хъвжвы ахьызта дзыгIвчкIвынкI адзхъа йгIашIастI. Ужвы ауи Къарча-Черкес акъазакъ кытква Сторожевойи Преградни рбжьара йаныргIалу ашIыпIа «Коба-баши»-хIва йапхьитI.
Асквш 1866 уагIвхатI, рахв щардагьи псхъапсын ауагIа амла йагун. АхIбачва айкьангьаштI, ашта унашвачпагIвчвагьи йрангIалын рыцIа йкъвльейу датша бзазартакIла йайтыпарныс щаквдыргылтI, алагъьла уылбгIата Йынджьыгь дзыгIв атшпы апны йгIашIастI. Кыт шIыцта йъачIваз ауи апхъала йъаныз ашIыпIа ахьыз Хъвжвы ахьырцIахтI.
«Сабаду йаба Даквын Заухас йпа ПсхIвы апны йбергьльыз дшварацгIвын, ауи амшв дшайшварацуаз ауысла хабар щарда ауагIа йрылан. Йанайтыпа амщтахь ауи заман ауыра йбзазаща гьизанмыргIалуазтI, адгьылрхарджьра тшгьизамрыщцузтI – ауи аъарала дызпщылаз ауыси дгIазтыцIыз ашти йыхъуанта», – йхIвитI МухIадин Али йпа.
МухIадин йабаду йабаду Заухасгьи Апсны апны хъацIара йылата йхабар гун. Ауи Макьа хIаджьчпара йцуз агвыпква хъахчата дрыццалун. Зны ауи дызцыз агвып акъвым апны ахIвынчIагIвчва ангIаргвыквс йуагIа йхчауата ауат дырпшIагылын дщхатI.
Аба йгвы абагъьари ан лтIатIари
МухIадин Али йпа йапхъанчIвиква дрыквчважвауа даналагара дджвыквнагитI. Йаргьи ауи джьаущушта йгьаъам: сквшщарда руацIа ауи мачI-мачIымцара йткъвым ртурых азикIкIуан, ШенкIауаргIа рыжвабанпаракI йгIарыквчважвауа нхаракIгьи йгIвын агIацIщтра йазирыхIазыртI.
МухIадин йаба ШенкIауа Али Айда йпа асквш 1914 агIан дгIадритI. Дшхвыцыз уалагата ауи йаргьи йгIвайщчва ахIбачвагьи йхгIвахщчвагьи акыт анхара ахIатлара рдыртI, щарда рхътыстI ауат Граждан айсра анакIвшуз, ХХ асквшышв асквш 30-ква рагIан акIолхозква аналарцуз, йанымлаз, амахъарыхъвара змакваз ачвгьараква анынкъвыргуз. Ага ауаса йаъазтынгьи Али Айда йпа Ставрополь край апны Воронцово-Александровск механизация атехникум дыцIалырныс йылшатI, асквш 1942 агIан ауи дгIалган ХIабаз амашина-трактор станция апны механикта дынхауа далагатI. Ауи йапшыз аъачIвагIагIвчва ауи агIан швабыжта йырзыбжан, ауи йгIалцIла, ага Абашта айсра Ду акIвшарыгьи, ар йгьызшIырымтуазтI. Ауаса Али ауи апш лкIгIара йзырчпарныс гьйымуытI.
«ХIаба йара-йара дахIван афронт дпшцIалтI», – йхIвитI МухIадин Али йпа.
Агвардия акрасноармеец ШенкIауа Али Айда йпа атанкква йырпшIагылаз архъв дрылата Россия агIвадахь шIыпIаква, Украина, Белоруссия, Прибалтика, Польша, Германия рпны дайсытI. ХъацIарати фыррати йгIайырбаз ахъазла Абашта айсра аорден агIвстепенкIгьи, «хъацIара ахъазла», «КIавкIаз ахчара ахъазла», «Кенигсберг акIра ахъазла» медальква гIайквнадыргатI. Асквш 1945 апрель агIан Кенигсберг аныркIуаз Али хIатлата дгIархвын йщапIы шIырхтI. Швара зымдыруаз ашварацыгIвчва рткъвым йгIарылцIыз ахъацIа йгвы гькIамхIатI: йпны дгIайхын йъачIвагIала анхара джвыквицIахтI, ласыла пхIвысгьи дгIайгтI. Али Айда йпа йхъапщыли йари хвыгIвпачви пхIакIи гIадзындыргылтI, ауат йрыуата йгIвыджьхуз МухIадин йакIвын. ЗымгIва адрыпхьатI, йхIаракIу дырра ддраутI.
«Сара йанакIвызлакIгьи хIаба йгвы абагъьара, абзазари анхари йрызгIашыкъра джьасщун. Дшныкъвадыкъвазгьи ауи аъара сквшы зны цхърагIара дгьамхIватI, зны дгвыжвкIта дгьымласхатI, йцIыхъвахуз йымшдза дцIарата, абзирала дахъуата дгIабзазатI. Ауи хIрайон амлыкврхIара атшауацIыхра къару ду алайцIатI, йкытлагIвчва рпны пIатIу гIайынхатI», – йаба йхъа йыладухауа йхIвитI ШенкIауа МухIадин.
МухIадин йан Шам Мырзабакь йпхIа къьльейта йбзазуз ГедегушевргIа дыртпхIан, Черкесск апны медицина училища дгIалгатI, ауаса лынцIра шабгаз лтгIачва, лсабиква рыгIзара йалттI. «Ауи швабыж дгIвычIвгIвыс тIатIан, лгвы зымгIва йырзыхътIын, – йгIайгвалашвахитI МухIадин Али йпа. – АкIьадыгв шабгу рсабиква хъвмарра хIпны акIвын йъанайуаз, ауат зымгIва драйгвыргъьун, хъагIаракI рылтуан. Агвлачвагьи хIзаъачвагьи ауи лхIальальра ахъазла бзи дырбун».
Физик, астроном, уыхвгIв…
МухIадин йсабихъа джьащахъван, насыпла йырчвын. Ауи бзита дапхьун. Акласс ахIбаква рпны йыздрыпхьуз акIвымкIва абаза-апсуа уагIахъа ртурыхи йара йткъвым шгIаншази ййырдыруа далагатI. Бзи йбун ауи физикагьи, хIисапгьи, йызнымкIва арайон олимпиадаква дрылалуан, айгIайрагьи гIатигун. Ажвлара уысквагьи дхъырхуан, апхьарта апны акомсомол адкIылара дасекретарын.
Асквш 1966 агIан ШенкIауа МухIадин Хъвыжвду аквтанай апхьарта дгIалган Ленинград къральыгIва университет амеханика-математика хъвшара дыцIалта астроном ъачIвагIа гIацIигарныс йаквикIтI.
«Сара архъвыхраква зымгIва сыркIылстI, ауаса апхьара йнарахвыз сгьрыламшватI», – йхIвитI МухIадин Али йпа, дхъыччауагьи йгIацицIахитI: «ЙсзыгIанхахуаз ачIвызйа – зымгIва зльажьу сан лан Быба лакIвта схIватI: ауи хъара сымцарныс алахI дйыхIвун».
ЙащтагIайуаз асквш арайон апны бзидздзата йапхьаквуз дъарылаз гIарпхьадзауата ШенкIауа МухIадин Ашхабад акытмлыкврхIара институт дырщтитI, ауаъа агидротехника хъвшара дыцIалтI, ауаса ласыла рыцIа зыхьыз гуз Одесса аинженер-уыхвара институтла дхъысхырныс йтахъхатI.
МухIадин йшихIвахуала апхьара сквшква ауи йбзазара апны рахIа йджьащахъваз, насыпла йычвыз гIамтан. Ауи амшын йатшпынчIвалу акъала пшдзаду абзазара даздзышуата тшаланайырхIвун, джьа зымдыруаз ашIара ахъагIара йгвы азйырчIвун.
«Сара сынасып йгIанакIытI йсахIбата йапхьуз Торнапольский Игорь сйабадырныс. Ауи йдырраква цIолан, щарда дырзычпан, ауысарагьи азъазарагьи тшрыдикIылуан, йаргьи щарда гIасылайцIатI», – йхIвитI МухIадин Али йпа йгьи йгIайгвалашвахитI йыгIвзачва йыцта Одесса йгIарглуз спектаклькIгьи, кино шIыцкIгьи, гIарбартакIгьи шхъдымрыпуз, ргвы аущтта йшбзазуз, рдырраква йшрыладырхIуз.
«Одесса ужвы йъагIадзазгьи спхызквагьи сгIагвалашвахраквагьи бзидздза йызбауа къалата йрыларкIвапI», – йлахIвараква хIыцагIвишитI ШенкIауа МухIадин.
Черкесскгьи Камбоджагьи
Аинженер-уыхвара институт дангIалга амщтахь МухIадин Нижний Тагил, Къарча-Черкес акъральыгIва уыхвартаква рпны дынхатI, асквш 1975 агIан Черкесск апны йаъаз Ставрополь политехника институт ахъвшара аинженер-уыхвара дырраква ркафедра апны нхара дызшIырттI. ЙхIаракIу апхьарта дарыпхьагIвта дъадзанхаз ахвысквша руацIа ассистента йалагаз ачкIвын апхьарали наука нхарали адиректор йтарагылыгIв ъанатIа дазынадзатI. Асквшква 1980-1983 рагIан Москва аинженер-уыхвара институт аспирантура дапхьатI, диссертация йхчан атехника наукаква дыркандидатхатI.
Асквш 1985 сентябрь агIан СССР йхIаракIу адырраквала а-Министерства ащаквыргылрала ШенкIауа МухIадин Али йпа Кампучия (ужвы – Камбоджа) нхара дырщтитI. ГIвысквша ауи ауаъапны Пномпень ЙхIаракIу атехника институт апны дарыпхьагIвын. Ауи Кампучия ауагIа йырреспубликата йанщаквгылуаз гIамтан, Совет Союз йауаз аъачIвагIагIвчвагьи ауи акъраль апны йхIаракIу адыррагIацIгара аргIапсра гIащаквыргылхри тшауацIнарыхри йацхърагIун.
Камбоджа апны йгаз асквшква апхьахьа шIа йгвы пхата йгIатахаз йбзазара йахъвыкIта йалтI: ауи швапха бзи йырхIатI, ауыс йахъвауа ъачIвагIагIв ъазатагьи тшгIайырбатI. ШенкIауа МухIадин йхIаракIу апхьарта ахъазла программа, ауыхвара йапщылу йапшым адырраквала арыпхьаща амальква лихуан, йынхара ахъазла ареспублика арыпхьарала а-Министерства артшхъвага швъа гIайырттI, аинститут апхьахьаква рсоветгьи даларцIатI – Совет Союз йауата Кампучия йаъаз аъачIвагIагIвчва 120-гIвы йрыуата ауаъа йалашваз жвагIвы ракIвын.
Асквш 1987 агIан йпны дангIайх апхьахьа Къарча-Черкес къральыгIва технология институт апны доцентта йгьи ауыхвара атехнологияква ркафедра даунашвачпагIвта йынхара джвыквицIахитIта жвахсквша ауи ауыс йайтитI.
«Ауи атшын сгвала сырхъйарныс йаквскIтI»
Ажвлара-политика бзазара ШенкIауа МухIадин джьгарта даналал асквш 1989 сентябрь агIан акIвпI: ауи агIан ауи «Адгылара» жвлара адкIылара гIаныршарала йакIвшушыз йапхъахуз абазаква райззара ду адгалагIв комитет аунашвачпагIв дитарагылыгIвта далырхтI. Ауи далата акIвпI адкIылара аустав, абаза уагIахъа рсоциал-экономика тшауацIыхра апрограмма датшагьи ашвъаква йапхъахуз рпроектква шлырхыз.
Асквш 1990 агIан ШенкIауа МухIадин Къарча-Черкес йтыцIыз агвып дрылата Согъвым апны йакIвшуз Апсны ахъахвитра йацкIра йазынархаз йапшым акъральква ргIащтийыгIвчва ъагIайыз айззара далан. Ауаъа йнанаркIыта ауи йайщчва ргвалаква гIардахIвра ахъазла дырцхърагIарала, йапхъанчIвиква радгьыл рыцIа даргванхара йпыран.
Апсны МухIадин йапхъахауата асквш 1973 агIан дцатI. Дъанхуз Нижний Тагил дгIатыцIта зны Мин-Воды дангIапссгIа Апсны дцарныс йхъа йгIаташватI.
«Йара уыжвгьи ауи алахъвгIахъасра сгвы шгIасыцIасыз сыласхIвахитI. Ауи атшын акIвпI сара щарда цIуата сгвы йтаскIыз сырхъйарныс йанаквскI», – йгIайгвалашвахитI МухIадин.
Абарауаса йгвы йтадзамкIва Апсны данага йгIашIарышвта ауи ауыла щарда дцалауа далагитI. МухIадин йшихIвауала, йпсы бзи йабуз апсабари зхъвыцщали змурадквали йаргваныз ауагIи йымбакIва дамуыхуа дцатI.
ЙалкIгIата йгвы пхата дгIатахатI МухIадин Али йпа йъахIльы ШенкIауа Николай – атурыхдырыгIв, археолог. Ауи МухIадини апсыуакви апызщылуаз цхIата далуан. ШенкIауа Николай МухIадин Апсны ажвлара-политика уысхагIвчва, аршIыйагIвчва щардагIв драбайырдыртI, ауат ауи уацIыхъван ауырата дрыцынхатI.
Ардзынба Владислав дрысасра
Асквш 1990-ква рхъаква рагIан ШенкIауа МухIадин Нальчики Черкесски рпны йакIвшуз Апсни Грузии рыжвлара адкIылараква ргIащтийыгIвчва райчважвараква йрылаз апсуа делегация даларцIатI. Асквш 1990 агIан абазаква рыжвлара мгIвайсра апхъагылагIвчва Меремкъвыль Алексейи ТхIайцIыхв Михаили дрыцта ШенкIауа МухIадин Москва апны йакIвшаз СССР ауагIахъа мачIква йапхъахуз райззара ду далан.
Ауи айззара гIалазгаз йгьи йадызгалыз дрыуазаджвын Ардзынба Владислав. Айззара ауысла дкьангьашырныс ахъазла Владислав Григорий йпа Лагъь КIавкIаз ареспубликакви аобласткви дгIархъыкIвшун, Черкесскгьи даъан.
«Ардзынба уыс щарда ъайыму, йзамангьи ъамачIу гIахIпхьадзан сунагIва апны хIйынйарныс йаквхIырпштI», – йгIайгвалашвахитI ШенкIауа МухIадин.
Йджьащахъву – атдзы ауи агIан йгьымхъйасызтI, ауыхвара нхараква акIвшауаркIвун. Ауаса апшвыма асасчва тлапIаква дырпылра ахъазла йылшуз закIгьи гьгIанимыжьтI.
«Сара насыпра дута йызбун Ардзынба Владислав съайынйаз. Ауи йчпащаква, йгвхътIыра, йгвапара зынла сгвы рхвгIатI. Ауи дуасаражвдзан йгьи загъь даъам дапхъагылагIвын», – йгIагвалашвахраква хIыцагIвишитI МухIадин Али йпа.
Акъбаш Борис дзахIбаз Адуней Черкес Ассоциация архъйагIв комитет аделегатква ргвып Апсны Республика а-Президент Ардзынба Владислав йпны, Согъвым© ШенкIауа МухIадин йазикIкIыз асуратква йгIарылхпIЛагъь КIавкIази Апсни руагIахъаква мчыла рышта йъатырцаз йазынархаз аджьабагIа митинг. Асурат апны агъьмала угIалагата: ШенкIауа МухIадин, Йумит (Ардзынба) Джьамальадин, Аргвын Юрий, Лачвыш, АгIвдза Владимир. Астомбыль, асквш 2004© ШенкIауа МухIадин йазикIкIыз асуратква йгIарылхпI
Анхара швапха, ауагIа рпны пIатIу, абзазара ауыс хъада
ШенкIауа МухIадин йынхара-бзазара йащтагIайуаз асквшква рыцIа-рыцIа уысла йырчвхун, йхъвдаквцIараквагьи щардахун. ЙуагIахъа ргIащаквхари ртшауацIыхри рзынхара йбзазара йауыс хъадахатI. МухIадин Али йпа хын – асквшква 1999, 2012 йгьи 2015 рагIан – Къарча-Черкес Республика йту абазаква рыжвлара мгIвайсра даунашвачпагIвта далырхтI.
Апсуа-абаза уагIахъа рыхъазла рахIа йбаргвыз асквшква рагIан ШенкIауа МухIадин ауагIа рапхъа йгылакваз рсатыр далан. Апсуа уагIахъа рхъахвитра йаназайсуаз агIан (асквшква 1992-1993 рагIан йакIвшаз Апсны ауагIа р-Абашта айсра – аредакция ррытаразга) ауат гуманитар цхърагIара рзадигалуата ауи уыста йхаз хвы аквцIауачвапI. Ауи Апсны йапшым цхърагIара арайдзарала ажвлара штаб аунашвачпагIвчва дрыуазаджвын, артыгIвчва дырцхърагIун, бзазарта рызгIайауан, Россия йакърыльгIвхара, артыгIвчвата йырпхьадзара, КъЧР йхIаракIу апхьартаква рпны йапхьарныс лшарата йчпара ацIыхъва дтагылан.
ШенкIауа МухIадин ауыс бзита йъайдыруаз, пIатIу ъайыквырцIуз рбзирала абаза уагIа ргвбайара ахчара йгьи тшауацIнарыхра йазынархаз уыс щарда йзахъвдаквыщтуан. Ауат йгIарыцIанакIуан чкIвыныргIа цхърагIара рзыгIаныршара, асоциал, акультура проектква рхъйара.
Асквш 2001 йгIашIарышвта 2009-дза МухIадин Али йпа гIван КъЧР АуагIа Райззара (а-Парламант) дадепутатта далырхтI, ауаъа ауи акыт млыкврхIара зхьырпшыраз акомитет унашва ахъицIун, арегламентли хабарргарала аполитикали акомитети хабзалыхрала, хабзанкъвгарала йгьи къральыгIва уыхварала акомитети рунашвачпагIвчва дыртарагылыгIвын. ШенкIауа МухIадин КъЧР ахабза щарда – «КъЧР апны ймачIу абаза уагIахъа руысла» ахабзагьи Абаза муниципал район агIаныршара ауысгьи рылата – рыквчважвари рнахври джьгарта дрылан.
ШенкIауа МухIадин йбзазари ажвлара рыхъаз магIны зму йынхари йауацIыхта уаквчважвара ахъазла гIвыракI гьнахъушым. Згвы цкьу, хъардура злам, ацIабырг йазгылу, хъацIара злу, зынцIра ауагIа рзынхара йазыназырхаз дгIвычIвгIвыста акIвпI йшгIайпшуа ауи йаргванквагьи ауи апш дукI дзымдырквауагьи: аджьамгIат рпны хвыта йыму йара йтарала «йчважвитI».
Йцри уагIа ргIащаквхари ртшауацIыхри ауысла ШенкIауа МухIадин араса йхIвитI: «Арат асквшква руацIа ауыс йазцIабыргу апхъагылагIвчва, агIвычIвгIвыс джьгарква, зуагIа рыхъазла згвы цхIауа уагIа щардагIв уыс ду рхатI. Ауатдаъа баргвырата хIзынйауа ауысква зымгIва гьхIзадымкIылуашызтI. Ужвы хIара йхIымапI «Алашара», АААК – ауат хIуагIа рпахь йгылу ауысква зымгIва йалакIыта йдырцитI. ХIара хIгвыргъьитI, хIхъагьи ду йыгIбахитI ужвы ауи анхара ргIапсракI йтахIыргылныс ъахIылшаз. ХIаргьи йшхIзахъвдаквыцIуа апшта йгIадзынгылуа аполитик шIакви ажвлара уысхагIвчви хIшырцхърагIуш, нхарала йхIырхIаз ашвапхи хIдырракви шрыхIтуаш хIащтапI».
ШенкIауа МухIадин Али йпа данчкIвыныз угIалагата йуагIа рыхъазла йгвы йтаз ужвы йхъйата ухIва ауаштI. Ауи насып йымата тшибитI, йауа ухIварыквын ауи йанакIвызлакIгьи йыцпI йцриква: йыгIвза цIабыргу йсабиквагьи йран бзидздзу йхъапщыла Ирина Адыльгьари йпхIа, йыхыгIвпачва, ауат йгIадрихыз ачкIвынхвыци агIвпхIвыспачкIвынкIи. ХIайчважвара хIалгауата МухIадин Али йпа ужвыгьи чкIвынкI дгIарылахIушта йшазпшуа гIасайхIвтI.
МухIадин Али йпагьи йтгIачва шабгугьи рынасып дута, рбзазара тынчта, рзгIвадара багъьата сквшщарда адуней йыквызларныс рзыхIтахъпI!
швталра йа тшаншвцIара атахъыпI.