Абаза бызшвали литературали йхътIыз апхьара сахIатква акIвшатI Къарча-Черкес апхьартакI апны. Ауатла йджвыквылтI абаза бызшви литератури йпщбахауа рфестиваль.
Барганджиа Саид
Къарча-Черкес апны ансисквша йакIвшалауа абаза бызшви литератури рфестиваль гIахъыртIытI. Ауат АлбыргIан аквтанай апхьарта апны йакIвшаз йхътIыз гIвапхьара сахIаткIла йджвыкврыжьтI.
Афестиваль «Алашара» дуней адкIылара Къарча-Черкес къральыгIва университет, арыпхьарали наукали КъЧР а-Министерства йгьи Абаза муниципал район аунашвахъцIарта ацта йакIвнаршитI. АдгалагIвчва йшырхIвауала, сынчIва ауи рыцIа йауацIыхпI йаргьи «Алашара» йгIатнагаз а-Президент йгрант гIадрысабапуата йадыргалитI.
Афестиваль йапхъахуз ахъвы: йхътIыз апхьара сахIатква
ЙхътIыз апхьара сахIатква зныбыжьла йапшым асабиква – йхвбахауа йгьи йжвбахауа аклассква рапхьагIвчва – йырзадыргалтI. Арыпхьара шцауа йапшуан апрофессор, абызшвадырыгIв ПIаз Сергей, арыпхьагIвчва ръазара йъаладырхIауа Къарча-Черкес Республика аинститут апны агвхъауа йгьи абаза бызшвакви алитературакви ркафедра унашва ахъызцIауа ХIасарокъва Бильаль, Къарча-Черкес агуманитар рхъвыхраква ринститут абаза хъвшара аунашвачпагIв Дзыба ГIищат, Абаза муниципал район аунашвахъцIарта арыпхьарали культурали ахъвшара аунашвачпагIв Мартаза Земфира, «Алашара» акIылара анхагIвчва.
АрхъвыхыгIвчви адгалагIвчви апхьагIвчва бзита йшхIазырыз гIалыркIгIатI.
«РахIа йхъаду – асабиква уызгIвымсхызпI, абаза бызшвагьи дара бзита йырдыритI. Ауат рапш апхьагIвчва анаъу арыпхьагIв дызцынхушгьи дыздынхалуашгьи йымапI», – йпхьадзитI апрофессор ПIаз Сергей.
Афестиваль йалазлуштI ауысаква йгIарыпхьауа, алацIара згIвуа ранкъвакъвраквагьи, абаза бызшвали литературали олимпиадагьи, ауат Черкесск 16-хауа агимназия апны йакIвшуштI.
«Анкъвакъвраква йгIарылалырныс зтахъыта ахIвара швъа хIзыгIазгIвыз сынчIва рыцIа йщардагIвыпI. Къарча-Черкес апхьагIвчва ракIвымкIва ауат йрылазлуштI Апсны йгIатыцIта йхIызгIайыз апхьагIвчви астуденткви», – йхIватI абызшвадырыгIв.
Афестиваль апрограмма
Афестиваль уагIата йалазлауа сквшигIадзагьи рыцIа-рыцIа йгIарылахIитI, йгIаликIгIитI ПIаз Сергей. Ауи апшта, афестиваль анкъвакъвраква йрыларцIарныс йахIваз рпхьадзара 200 йнаднацалитI.
«Ансисквша афестиваль апрограмма йалахIцIауа ауысква гIахIыршIыцитI, ауи йалазлауа ргеографиягьи тшауацIнахитI. [ХIызту асквш] апрограмма йалапI абаза бызшвали литературали йагъьу арыпхьагIвчва рмастер-классква, Апсны Республика, Гвдауыта къала 2-хауа аквтанай апхьарта апхьагIвчви Апсны акъральыгIва университет йапхъахауа акурс астуденткви рквта уыса апхьарала анкъвакъвра, Апсны йауу апхьагIвчви астуденткви КъЧР Абаза район йаланакIуа Къарапагва кыт йтагылу Ардзынба Владислав йыхьыз зхъу арыпхьара квта арыпхьагIвчви апхьагIвчви ранйара», – гIахIайхIвтI апрофессор йгьи йгIацицIахтI: ансисквша йакIвхIыршалауа афестивальква йшгIахIдырбауала, ага радгалра гIапсара щарда апщылазтынгьи, арыпхьагIвчва рыжвлара ауат абаза бызшва, литература, культура ргIахчари ртшауацIыхри ауыс щардала йахъвауата йырбитI магIын дугьи рзырбитI.
«Ауи йаквшахIатхитI арыпхьагIвчвагьи апхьагIвчвагьи афестиваль азыгIальаматрата йазрыму йъалахIауа. Ауи злалу ауысква зымгIва Къарча-Черкес Республика арыпхьарали наукали а-Министерствагьи Абаза муниципал район аунашвахъцIартагьи йдхIырдыритI, асквш 2019 йгIашIарышвта Апсны Республика йазалху аминистерствагьи ауат йгIарылалтI, даргьи швабыж йгIахIцхърагIитI», – йгIахIгвынйыргIвытI ПIаз Сергей.
Афестиваль йаланакIуа ауысква зымгIва зпхьадзарала ймачIгIву абаза уагIахъа рыбызшва, рлитература, ркультура шгIахчахуш йгьи штшауацIырхуаш, апхьагIвчва рцри бызшви рцри литератури азыгIальаматра шрызрымазлуш йазынархапI.
«СынчIва йакIвшаз амастер-классква йгIахIдырбатI хIара швапха ду зырхIахьаз, зуыс йнардзата йыздыруа арыпхьагIвчва шхIыму. ЙхIымапI зцри бызшви зцри литератури дара бзита йыздыруа апхьагIвчвагьи. ХIара хачIвыта йхIыквпI ауи ашвапха арыпхьаща рыцIа йъальальу, абызшви алитератури йырдрыпхьара ахъазла алшараква рыцIа йъамачIу апхьартаква зымгIва рпны йгIадрысабапуата йхIчпарныс. ЙалкIгIата ауи ззынарху акъалаква рапхьартаква ракIвпI», – йхIватI ПIаз Сергей.
Афестиваль шгIаншаз атурых
Афестиваль асквш 2014 йгIашIарышвта йакIвшалитI. Ауи агIан Алий Умар йыхьыз зхъу Къарча-Черкес къральыгIва университет филологияла аинститут агвхъауа йгьи абаза филология акафедра агIаджвыквцIарала, «Абаза» жвлара адкIылари «ЧкIвыныргIа ринтеллектуал-ршIыйара жвлари» рацкIрала, ауагIахъа уысквали ажвлара хабарргагаквали апечатли Къарча-Черкес Республика а-Министерства ацхърагIарала ауниверситети АлбыргIан кыт апхьарти рпны «Абаза бызшви литератури: агIащаквхари атшауацIыхри зрыбаргвуа ауысква» ахьызта дуней наука конференция акIвшатI. Аконференция адырранкъвгагIв, абаза литература ащатащтIацIагIв Тобыль Тольыстан йысквш 135 йазынархан. Араса йухIварыквын – ауи акIвын йапхъахуз «Тобыль апхьараква», ужвы йцIасхаз анаука-практика конференция.
ЙащтагIайуаз асквш абзихагIв, ажвлара уысхагIв, «Алашара» адкIылара ахъада, ужвы АААК ЙхIаракIу асовет йаунашвачпагIву Эгьзакь Мусса йгIаджвыквцIарала йара йунашва йацIаз нхарала гвып гIандыршан «Абазакви апсуакви: абызшваква рхчара, архъа рхъвыхраква йгьи архив швъаква (асквшква 2016-2026 руацIа нхарата йакIвшуш апрограмма)» алыхра джьгарта йджвыквылтI. Ауи «Алашара» адкIылара апрограмма йаларцIаз ауысква йрыуапI «Кълыч апхьараква», «Тобыль апхьараква» йгьи «Абаза бызшви литератури рфестиваль».
Абаза бызшви литератури рфестиваль йанджвыквлызищтарагьи йапшым ауысквала йалапI: Къарча-Черкес апхьартакви аколледжкви рапхьагIвчва рквта абаза бызшвала алацIара гIврала, уыса гIапхьарала анкъвакъвраква, абаза бызшвали абаза литературали олимпиада. ЙшцIасхаз апшта афестиваль «Тобыль апхьараквала» йалдыргитIта ауаъа анкъвакъвраква ргIарбараквагьи гIарылархIвитI, айгIайыгIвчвагьи ауат зрыхIазырыз арыпхьагIвчвагьи согIа рыртитI.
швталра йа тшаншвцIара атахъыпI.