Апсуа-абаза этнос рыхъазла йхъаду ауысква рылачважвара знархару АААК а-Дискуссия клуб анхара сынчIва ноябрь мыз агIан йджвыквылуаштI.
Барганджиа Саид
Апсны апны Адуней апсуа-абаза конгресс апсуа-абаза уагIа ргIахчари ртшауацIыхри йырпщылу атемаква йауацIыхта йъарылачважвуш уатыквта Дискуссия клуб гIахънатIитI. А-Республика акъральгIвква йрыуата зныбыжьла йапшым ажвлара гвыпква зымгIвагьи аклуб алачIвараква йрылалырныс рылшуштI. Ауи анхара ноябрь а 7 йджвыквылуаштI. Аклуб даунашвачпагIвпI Апсны акъральыгIва университет аполитологии асоциологии ркафедра арыпхьагIв ахIба Турава Ирина.
Ауи йшылхIвазла, аклуб анхара апны йхъаду принципта йщаквгылазлуштI зымгIва йырзацапшу азазаъащаква, ауи йгIаныцIитI аклуб йалу зымгIвагьи гвхътIыла йрейшу азазыъаща шырбжьазлуш. АрыпхьагIв ари апш адгылща «гIвына аъамзара» – хIва дапхьитI.
«ХIара анйараква араса йадыгIгалырныс хIгвыгъапI: чкIвынргIа гIальаматра ззырбауа азцIгIараква ахIбачва йрыздыргылырныс, акъральгIвква аэкспертква, ъанатIа хIагIа нкъвызгауа агIвычIвгIвысква рейша тшырзынадырхарныс амаль рымата. АгIвына аъамзара ансхIвауа датшагьи йгIанасыркIуа аклуб анхара адгалща акIвпI: анйараква зымгIвагьи, лекциязтынгьи, практика апхьарасахIатызтынгьи, тренингызтынгьи аздзыргIвчви аспикери закIгьи рбжьагыламкIва йакIвшалуштI – кафедрагьи айшвагьи аъамкIва», – лхIватI багъьата Турава Ирина.
Ауи йшгIалылкIгIазла, аклуб анхара адгалра апны йхъаду ахачIвква йрыуазакIыпI алачIвараква зымгIвалагьи йнардзата, йхIагIата ракIвыршара. Ажва ахъазла, аклуб йалалуа «алазлара швачIвы йа датша ахча алацIара борч гьрыквызлушым».
«Анйараква пхарала йырчвызларныс, айчважвараква гвыхътIыла йакIвшаларныс ахъазла ауат чайыжврала йалдыргахлуштI», – лхIватI аклуб аунашвачпагIв гвыгъара бзи лымата.
Турава Ирина аклуб анхара апны йхъаду цнархаракI гIалхIватI: апсуа бызшва агIахчари атшауацIнарыхри, цри бызшвала алитература ауагIа йрылагара ауысла цхърагIара, апсуа-абаза этнос ртурых-культура тынха агIахчара, абашта наука атшауацIнарыхри ауагIа йрылагари руысла цхърагIара, апхъанчIви гвбайара-этика кодекс Апсуара агIахчара знархару цхърагIара, аэкологии агьагьара псабари ргIахчара.
Темипхьадза знархару анйараква йапшым аджыпхаква йыртагылата йакIвшуштI. Ауат лекциязлуштI, тренингызлуштI, аэкспертква злу интерактивызлуштI йа айшва гьажьызлуштI. Атемаква йзапшызлакIгьи знархару анхара хымызкI руацIа йымгIвайсуаштI, ауи АААК агрант зквнарга йауаш проект хIазыр агIарбарала йалгуштI. АрыпхьагIв йгIацылцIахтI ашвъаква йрылапшуаш Комиссия гIандыршата ауат рыцIа квгвыгъара злу апроектква шгIалырхуаш.
«Аклуб ангIахъхIтIра амщтахь ауи йалу рыхъазла зынла Апсны Республика АААК ашIыпIа хъвшара аунашвачпагIвчви ахабарргарта портал аунашвачпагIвчви алата анйара абаркIыра адыгIгалуаштI. Араъа дзачIвызлакIгьи йылшуштI хIкъраль ауацIа а-Конгресс анхара ауысла гIальаматра ззйыму азцIгIараква йыргылырныс, йгIаргванхауа агIамта апны йыздынхалырныс йлырхыз ауысква гIаййырдырныс, йгIайтахъхузтын йхъатала анхара далалырныс», – лхIватI Турава Ирина.
Ауи йшгIалылкIгIазла, йара аклубгьи апроект кIьыдаква лнахуаштI (йхъаду ацтемакI йрыламкIва – аредакция ррытаразга), дара ращтацаща рымата йынхуштI, ауат йрыуата апхъа йгылапI ноябрь ацIыхъва йджвыквылуаш апроект «Анчва-абачва рклуб».
Адискуссия клуб йалалырныс зтахъу анкета йтагIвра, гIальаматра ззрыму анархара гIалырхта рахIвара швъа аклуб аунашвачпагIв йылзырщтира атахъыпI ари аэлектрон адресла: discussclub@abaza.org. Нархарипхьадза йазалху атыпква йызтахъу зымгIва йырзынамхъарныс ауаштI, йшпакIву ухIварыквын аклуб алачIвараква ъакIвшуш атдзы уагIа 25-30-гIв райхIа гьыгIвнашвум («Алашара» ауысхарта, Апсны Республика анаукаква р-Академия атдзы, Лакоба йурам, 1 аэтаж). Атемаква йрылачважварныс гIазтахъхауа ауагIа щардагIвхузтын адгалагIвчва абаркIыра йызлаквгIацапахуаш амальква йырзыпшгIуштI. РыцIа магIны зму анйараква авидео йанырцIата АААК YouTube канал йтарцIалуштI. АлачIвараква рызбжа асоциал сетква рэфир рейша йтарыжьларнысгьи ргвыгъапI.
швталра йа тшаншвцIара атахъыпI.