АААК ЙхIаракIу асовет йахъаду ахIаракьатчпагIв Эгьзакь Мусса «Асквш амеценат» согIа гIайквнадыргатI
АААК апресс-къвырльыкъвхарта
АААК ЙхIаракIу асовет аунашвачпагIв, «Джи Си Девелопмент Груп» апрезидент Эгьзакь Мусса Россия ауацIала йакIвшауа акция «Асквш амеценат» асогIа зквнадыргауа дрылата йыхьыз гIархIватI. АйгIайыгIвчва рсогIаква ноябрь а 15 Фаберже ймузей апны йрырттI. Ауи ауыс Санкт-Петербург апны йакIвшауа VIII адуней культура айззара ду йахъвыкIта йалтI.
СынчIва асогIа зквдырпшуаз рыхьыз гIазхIвуз меценат цхърагIара гIазадзаз культура анхартаква ракIвын. Эгьзакь Мусса йыхьыз гIазхIваз Россия аэтнография музей акIвпI. Эгьзакь Мусса ансисквша амузей агIарбартаква радгалра дацхърагIитI. Ауи апшта асквшква 2018-2019 рагIан ауи йацкIрала запш нымшас агIарбарта «Къапщы-гIважь-шкIвокIва» акIвшатI. Асквш ауацIа Россия этнография музей йнашылуаз ауагIа Евразия ауагIахъаква ркультура апны «апсабара ачваква» ргIарысабапра атурых тшахадыргIвазара, аминералкви арыпшдзагакви йырпшра рылшатI.
Асквш 2018 ноябрь мыз агIан абазакви апсуакви ртурыхи ркультури йырзынархаз ужвыгьи гIарбартакI адгалазара ахъазла Эгьзакь Мусса датша зджьарагьи уызнымйуш экспонат 100 райхIа – ауагIахъа фашаквагьи археология артефактквагьи рылата – Петербург йгIадирыгтI. Амузей адиректор Грусман Владимир Эгьзакь Мусса йгIайыртыз асогIа даквчважвауата йгIаликIгIатI абзихагIв «ауагIа зпхьадзарала ймачIу ауагIахъаква ртурыхи ргвбайари хвы рзырбауата йбжьара гватра ду шазалихуа».
«Сара ауи апш млыкв змата ажвлара рпынгьи ауи апш гыларта зкIуата йаъу ауагIа дрыуата захча зуагIахъа ргвбайара ахчара йалазцIауа датша гIвычIвгIвыскIгьи дгьсыздырам. ХIара ауи Россия этнография музей аэкспозицияква ргIаныршара дъацхърагIауа ахъазла швабыж хIизыразпI».
Йара Эгьзакь Мусса ари агIаншара даквчважвауата «аэтнография музей акультура айззара ду ъакIвшауа аквтаква йрыуазакIыта йъалыз» дарыразуата йхIватI.
«Афорум апны уыс хъадата йызлачважвауа «глобализация агIамта апны акультура кодква» амузеи хIари хIацынхари унашва зхъсцIауа «Алашара» адкIылара анхари йрыквшвитI. ХIызту азаман агIан Россия Федерация ауагIахъаква зымгIва рцIасква гIахчара зджьара йгIанымхауата магIын ду амата йспхьадзитI. Ауат ртынхала акIвпI йызлащаквгылу закIгьи йапшымкIва уагIахъа щарда ргвбайарала йалу Россия акультура», – йхIватI абзихагIв йгьи йгIацицIахтI амузейи йари ъацынхауа дшазыразу.
«ХIапхъахьылагьи акъраль ахъазла магIны зму акультура проектква шхIызпшуа багъьата йазхъасцIитI», – йалйыргатI йажва Эгьзакь Мусса.
Эгьзакь Мусса этнографии культури рнархарала бзирата йхауа йгIацIанакIуа Россия этнография музей йгьахъазым. АбзихагIв Петербург абзазагIвчва р-Дуней клуб ахъпшылыгIвчва дрыуазаджвыпI, Суворов А.В. йыхьыз зхъу а-КъральыгIва мемориал музей ахъпшылыгIвчва рсовет далапI. Асквш 2017 агIан Эгьзакь Мусса Суворов А.В. йыхьыз зхъу а-КъральыгIва мемориал музей ахъазла Германия апны «Россия Император гвардия йцIыхъвахуз рпарад» зхьзу запш аъам олово йгIалху айсчва разкIкIра йхвгIатI. Ауи асквш 2018 май агIан Санкт-Петербург апны йгIахъыртIыз олово йгIалху айсчва р-Музей йащатахатI.
Эгьзакь Мусса АлбыргIан кыт (Къарча-Черкес Республика) апны йгIаныршу аштадырра знархару амузейгьи дацхърагIитI. Ауаъа «Абаза пшцIа» этнография адкIылара гIандыршара рмурадпI. Амузей тыдз шIыц ъаздыргылуаш тып гIалырххьатI, ужвы апроект нхараква акIвшитI.
Эгьзакь Мусса дхIаракьатчпагIвпI, дбзихагIвпI, ажвлара йгьи аполитика нхара джьгарта далапI. Асквш 2011 агIан ауи абаза-апсуа уагIахъа ртшауацIыхра ацхърагIара знархару «Алашара» Дуней адкIылара гIанйыршатI. Асквш 2017 декабрь агIан Адуней апсуа-абаза конгресс ЙхIаракIу асовет даунашвачпагIвта далырхтI. Асквш 2019 сентябрь йгIашIарышвта КъЧР а-Парламент аунашвачпагIв дитарагылыгIвпI.
швталра йа тшаншвцIара атахъыпI.