Апсны апны акоронавирус ашIашIкIгIара згIва тшауацIнамхырныс ахъазла йнарахвыз амальква йрыладырхIитI.
Апрель а 6 атшынла йгIахIахвырквын Апсны апны коронавирус аъата йгьгIахърымтIыстI, ауаса ареспублика апны ашIашIкIгIара згIва абакIра знархару анхара йашIамсуа джьгарта йакIвшитI. УахьчIвала COVID-19 абакIрала ауыс зкву йалачважватI абзазагIвчва акоронавирус ашIашIкIгIара згIва йачвхъыхчара ауысла йынхауа а-Координация штаб (ауи асквш 2020 мартI а 18 атшын йгIандыршатI, унашва ахъызцIауа апрезидент йхъвдаквцIараква зырхъйауа Бганба Валерий йакIвпI – аредакция ррытаразга) алачIвара апны. АлачIвара ашвахьа атшын йакIвшатI.
«Намдзара ъану анархартаквала амальква рымчра атахъыпI»
Апрезидент йхъвдаквцIараква зырхъйауа Бганба Валерий а-Координация штаб хачIвы рызйыргылтI Апсны Республика йгIаталуа зымгIвагьи амаль амамкIва йырхъаззаджвыкIта йшгIанырыжьуаш ауысла щаквыргылра лырхырныс. Ауи йшгIаликIгIазла, акъраль апны ГвжважвагIва аъаща щаквдыргылищтара мчбжьыкI агIвстI.
«Ари агIамта ауацIа акъральыгIва къвырльыкъвхартакви анхартакви ауагIа акоронавирус ашIашIкIгIара згIва йачвхъырхчарныс ахъазла уыста йчпара атахъыз зымгIва дырхъйатI. АнархартаквакIла анхара джьгарта йымгIвайситI, йаъапI анамдзараквагьи, ауи ахIатырла амальква рыцIагьи йрымчра атахъыпI», – йгIаликIгIатI Бганба Валерий.
АлачIвара йалаз рпахь дгIачважватI акоронавирус ашIашIкIгIара згIва абакIра ауысла йынхауа аоперштаб ахъада, азгIвадарахчара аминистр Цахнакиа Тамаз. Ауи йшихIвазла, йагIвсыз агIамта ауацIа акоронавирус агIахътIра йазынархата рхъвыхра 86 акIвшатI, ауат йрыуата кьангьаш гIазырбаз пщырхъвыхракI йгIванхуз йатакIвдыршахтI. Архъвыхраква рыуа закIгьи азгIва аъата йгьгIадмырбатI.
«ГIамта айшысла азгIвадарахчара аминистерства ужвыгьи тест 600 гIарыквшвара атахъыпI», – йхIватI Цахнакиа.
Анйара апны дгIачважватI ауагIа акоронавирус ашIашIкIгIара згIва йачвхъыхчара ауысла а-Координация штаб йалу, Апсны Республика агIвымакъраль уысква рминистр Кове Даур. Ауи йшгIаликIгIазла, йапшым адуней адкIылараквагьи хIазырпI акоронавирус ашIашIкIгIара згIва абакIра анархарала Апсны йацхърагIарныс.
«Ажва ахъзла, ПРООН (ЙадкIылу АуагIахъаква р-Организация атшауацIыхра а-Программа – аредакция ррытаразга) хIазырпI ауагIа акоронавирус ашIашIкIгIара згIва йачвхъыхчара знархару апрограммаква абзазара йаларыжьныс ахъазла зпхьадзарала бзидздза йнадзауа ахча ПРООН йаланакIуа апсуа хъвшара йазалырхырныс», – йхIватI ауи.
COVID-19 ауысла атестква ракIвыршаща йгьи айъазагIвчва йырзалху атренинг
Аоперштаб йалу, аимуннология йгьи авирусология рлаборатория аунашвахъцIагIв, наука нхарала АНА а-НИИЭПиТ аунашвачпагIв йтарагылыгIв Матуа Алиса ареспублика апны акоронавирус ашIашIкIгIара згIва гIахъыртIырныс ахъазла архъвыхраква шакIвдыршауа даквчважватI. Ауи йшгIалылкIгIазла, архъвыхраква хъвы-хъвы йшапI.
АйъазагIвчва апхъапхъа агIвычIвгIвыс йыпкъ (йрапхIаква, йпынцIа, йшIауацIа) йгIалырхитI йырхъвыхра атахъу апкъыгIваква (йджвджвы, йща агьиква). ЙащтагIайуата ауат апкъыгIваква Санэпидемстанция алаборатория йырщтийитIта ауаъа аъачIвагIагIвчва йдырхъвыхитI. АгIарбараква кьангьаш рылазтын апкъыгIваква атадырхъвыххитI, уадыргIвана акIвпI архъвыхра цIхъва анартуа.
Матуа Алиса йшгIалылкIгIазла, апкъыгIва гIазахвуа айъазагIв азгIва гIайыдсылуашта, дызхьпшуа агIвычIвгIвысгьи згIва гIайыйрахвуашта йгьаъам. Архъвыхра пкъыгIваква злагIарахвуа азондква цкьапI, шIыцпI, ауат агIвычIвгIвыс йбауата йгIахъыртIитI.
Апрель а 6 атшын аоперштаб апны алаборанткви амедицина ахщчви рыхъазла тренинг акIвшатI. Атренинг акIвдыршатI аоперштаб йалакву Согъвым асанитар айъазагIв хъада Беляева Алла йгьи АНА а-НИИЭПиТ апны аимуннология йгьи авирусология рлаборатория аунашвахъцIагIв Матуа Алиса. Атренинг йалаз аъачIвагIагIвчва акоронавирус ашIашIкIгIара згIва гIазахвыз ачымазагIвква уанрыдынхалуа ашварагIварадара цIасква шынкъвугуш йахадыргIвазатI йгьи азгIва здырбалуа агIвычIвгIвыс йпны йырхъвыхчIву апкъыгIваква адукIылра шатахъу цIолата йддырдыртI.
Аоперштаб ансимш нхара шакIвшауа ауысла
Амедицина уысквала аоперштаб аунашвачпагIв йтарагылыгIв, Апсны Республика азгIвадарахчара аминистр йтарагылыгIв Конджариа Алхас акъраль аунашвачпагIвчва Апсны апны акоронавирус атшауацIыхра йапшIагылуа амальква нарахвищтара ансимшы абзазагIвчва ауыс зкву йахайыргIвазитI.
«ЙагIвсыз асахIат 24 руацIа акоронавирус ашIашIкIгIара згIва ауысла гIвычIвгIвысзаджвыкI лаборатория диагностика дкIылстI. Ауи коронавирус гьйыдрымбалтI. Гвдауыта къала йтагылу арайон аквта чымазагIвтара апны коронавирус ауысла гвы рызгIвауата гIвыджь щтIапI. Архъвыхра гIарбараква ангIахIнапIыцIашвара рхабар швхIырдыруаштI. ЙцIыхъвахуз асахIат 24 руацIа аколл-квта ауагIа 200-н райхIа телефон йастI, атшазынархараква зымгIвагьи алдыргатI», – йхIватI Конджариа.
Асквш 2020 мартI а 24 йгIашIарышвта Апсны аунашвачпагIвчва акоронавирус ашIашIкIгIара згIва Covid-19 йабакIуата Апсны абзазагIвчва ргIахчара знархару амальква нарахвтI. Ауи апшта, уагIа щарда злу айззараква гьакIвдыршахуам, апхьартаква амцIырщттI, акъральыгIва нхартаква рынхаразаман ахъадрыстI, афачIвтйыртаква, йхъаду абзазага пкъыгIва тйыртаква, аптакьква ракIвымкIва анахьанат аткванква зымгIва адыркIытI, ауагIа хвитта йгьынкъвырыжьуам, ауасамцара.
Асквш 2020 мартI а 28 йгIашIарышвта ГвжважвагIва аъаща хабза щата амата йщаквдыргылтI: гIамтакIла Апсны йгьи Россия ркъральгIвына хъысырта хъыргIватI, ахъысра йахвиту арра къвырльыкъвхагIвчви адипломаткви йырхъазыпI. АкъральгIвына ахъысра дрымчтI ареспублика ахьыла йгIацапахуа Апсны акъральгIвчва рыхъазла.
Апсны ахIаракьатчпагIвчва йгIащаквдыргылхыз агвчIагIвчпара мгIвайсра «ХIара хIадгылтI» йгьи Москва апсуа диаспора ауысхагIвчва Апсны абзазагIвчва ргIахчара йгьи азгIва шIыц абакIра йырзынархата Апсны йызлацхърагIуш ахча шазыркIкIуа ахабар дыргатI. УахьчIвала ахчата йазыркIкIхьатI сом мильуан 50 раъара.
Апсны апны акоронавирус ашIашIкIгIара згIва COVID-19 атшауацIыхра абакIра йацхърагIарныс зтахъу зымгIвагьи амаль рымапI ахча аларцIарныс Апсны Республика апынгьи Россия Федерация апынгьи Москва апсуа диаспора абанк реквизитквала йа«ХIара хIадгылтI» мгIвайсраареквизитквала йгьи Трыкв Республика ахьыла Адуней апсуа-абаза конгресс ареквизитквала, йа а-Конгресс асайт апны онлайн амальла ахча аларцIарныс. Ахчата йгIаталуа зымгIва Апсны абзазагIвчва рынцIри рызгIвадари ргIахчара йазалхта акоронавирус ашIашIкIгIара згIва COVID-19 абакIра йазынадырхуштI.
швталра йа тшаншвцIара атахъыпI.