Апсны апны COVID-1 згIва гIазахвыз гIвыджь гIадрыбергьыльтI. Ауат агIвыджьги Гагра къала йабзазагIвпI.
Апрель а 8 атшынла йгIахIахвырквын Апсны апны коронавирус шIкIгIарата гIвба гIадрыбергьыльтI, йхIватI амедицина уысквала аоперштаб аунашвачпагIв йтарагылыгIв, Апсны Республика азгIвадарахчара аминистр йтарагылыгIв Конджариа Алхас Апсны абзазагIвчва йрызцауа йансимш тшазынархара апны.
Ауи йатайхIвахтI COVID-19 гIазахвыз йапхъахуз ачымазагIв мышкIыла рыцIа паса, апрель а 7 атшын, дшгIадрыбергьльыз, ауи Гагра дауапI. УахьчIвала ауи йзгIвадара зту аъаща квтанайта йхIатлапI. ЙгIванхауата азгIва зпны йгIарауыз абзазагIв ачымазагIв дызщтаныкъвуз дрыуазаджвпI.
«ЙгIвыджьхауата азгIва зпны йгIадрыбергьыльыз абзазагIв ачымазагIв йтгIачва дрыуапI. Ауи ужвы тшйыркIьыдан дбзазитI. ЙызгIвадара аъаща уахьчIвала уарыразуата йаъапI, айъазагIвчва йхъпшылитI, цхърагIарата дыззыбжу йдрадзитI», – йхIватI аминистр йтарагылыгIв.
COVID-19 ауысла атестква ргIарбараква
Конджариа Алхас йшихIвазла, йагIвсыз атшыни ауахъи руацIа коронавирус ауысла атестква ужвыгьи хвгIвы рхъыстI. Архъвыхраква йшгIадырбазла, ахвыгIвгьи згIва рыдымкIва йгIацIцIтI.
Аоперштаб ауысхагIв йшихIвазла, йагIвсыз ауахъ 15 сквша йыртаз чкIвынкI дпсытI, ауи швабыж дхIатлата ачымазагIвтара дгIаргын ареанимация хъвшара апны айъазагIвчва сахIаткI ауацIа йрылшуз амальква зымгIвала йынцIра йазабакIтI, ауаса дгьырзгIащаквымыжьтI.
«Аэпидемия аъаща гIарпхьадзауата ауи COVID-19 ауыслагьи йхьпшытI, ауаса йшгIацIцIызла, коронавирус згIва гьйыдмызтI. Ауи йъахIыльчви йаргванкви хIрыцджьабауата ргвакъвпра рыцагIвхIшитI», – йхIватI Конджариа.
Амаль шIыцква йгьи апрезидент йхъвдаквцIараква зырхъйауа йтшазынархара
Апсны Республика апны акоронавирус COVID-19 тшауацIнамхырныс ахъазла апрезидент йхъвдаквцIараква зырхъйауа Бганба Валерий Гагра район апны комендант сахIат шщаквйыргылуала унашва гIайгтI. Акомендант гIамта асахIат а 20.00 йгIашIарышвта асахIат а 07.00 агIандза йщаквгылазлуштI.
«Акомендант сахIат ъадзащаквгылу абзазагIвчва ртыдзква йгIарджвылцIырныс, аурамква, ажвлара тыпква рпны, агваны йаъазларныс йгьахвитым. Ари ахабза гьырзынархам ахабзахчара къвырльыкъвхартаква, азгIвадарахчара нхартаква, апхаста-агIахчара, амцарычвра, акоммунал къвырльыкъвхартаква рынхагIвчва, абанкква рынхара адгалра зхъвдаквцIару аъачIвагIагIвчва йгьи гвжвайыгIвала медицина цхърагIара йахIвауа абзазагIвчва», – араса йгIанахIвитI Бганба мачвы зцIайцIаз ашвъа.
Бганба Валерий Апсны абзазагIвчва тшырзынайырхатI. Ауи йшгIаликIгIазла, акъраль аунашвачпагIвчва, аправительства йнарахвыз амальква, швгIвы, зкьгIвы йнадзауата зхъа йамайгьдзауата йынхуз ауагIа, айъазагIвчва, акъральгIвынахчагIвчва, амилиция рынхагIвчва, аволонтёрква, датшагьи щардагIвы йрылшуз рчпатI гIамта бзидздза аурала акоронавирус Апсны апны тшауацIнамхырныс ахъазла, ага агвла къральква аэпидемия алагIваласра ду гIарыланацIазтынгьи.
«УахьчIва хIара аэпидемия абакIра ауысла гIамта шIыц хIтагылтI. Ари агIамта рыцIа йбаргвыпI, рыцIа йхьантапI – йхIылшауа зымгIва хIчпара атахъыпI азгIва хIытшгIва апны йгIашIахIкIырныс, хIкъраль ауацIала ауи тшауацIнамхырныс ахъазла, ажва аламкIва, ачымазагIвчва райъазара адагIгалра атахъыпI. Аправительства амальква нарахвтI, ахIаракьатчпагIвчвагьи гIахIцхърагIан уахьчIвала йхIымапI, йхIхвгIитI амедицина ъамапсымаква, ахъвшвква, хIкъральгIвчва хIрайъазарныс ахъазла хIыззыбжу зымгIва», – йхIватI ауи.
Апрезидент йхъвдаквцIараква зырхъйауа Бганба Валерий йтшазынархара апны Апсны абзазагIвчва атаквгIазшIитхтI атшыркIьыдара ацIасква мгIвхърымгарныс. «Аэпидемия
йапшIагылу абакIра йазынарху ахачIв хъадаква рырхъйара зборчу швара швакIвпI, анбжьагIвчва тлапIаква. Швхъагьи, швтгIачваквагьи, швынбжьагIвчвагьи гIашвхчарныс йшвыхъвдаквпI. Ауи ахъазла амальта йаъу закIыпI – швхIаусыгIвадъа агваны швгIаджвылымцIын, айъазагIвчва злагIашвыхIвауа зымгIва швчпа. Ъадаби къральгIв тшдырри гIахIмырбузтын рыцхIагIа ду хIхъа йазгIагIгырныс закIы гьазхIвам», – йхIватI Бганба ауагIа рхъа йазсакъхарныс йаквгIазшIитуата.
Асквш 2020 мартI а 24 йгIашIарышвта Апсны аунашвачпагIвчва акоронавирус ашIашIкIгIара згIва Covid-19 йабакIуата Апсны абзазагIвчва ргIахчара знархару амальква нарахвтI. Ауи апшта, уагIа щарда злу айззараква гьакIвдыршахуам, Апсны Республика йгьтарыжьхуам турист гIамдара мурад змата йгIайуа агIвымакъраль бзазагIвчва йгьи къральгIвра швъа змам агIвычIвгIвысква, афачIвтйыртакви аптакькви ракIвымкIва анахьанат аткванква зымгIва адыркIытI, ауагIа хвитта йгьынкъвырыжьуам, датшагьи.
Асквш 2020 мартI а 28 йгIашIарышвта ГвжважвагIва аъаща хабза щата амата йщаквдыргылтI: Апсны йгьи Россия ркъральгIвына хъысырта хъыргIватI, ахъысра йахвиту арра къвырльыкъвхагIвчви адипломаткви йырхъазыпI. АкъральгIвына ахъысра дрымчтI зпсадгьыл ахьыла йгIацапахуа Апсны акъральгIвчва рыхъазла.
Апсны ахIаракьатчпагIвчва йгIащаквдыргылхыз агвчIагIвчпара мгIвайсра «ХIара хIадгылтI» йгьи Москва апсуа диаспора ауысхагIвчва Апсны абзазагIвчва ргIахчара йгьи
азгIва шIыц абакIра йырзынархата Апсны йызлацхърагIуш ахча шазыркIкIуа ахабар дыргатI. УахьчIвала ахчата йазыркIкIхьатI сом мильуан 50 раъара.
Апсны апны акоронавирус ашIашIкIгIара згIва COVID-19 атшауацIыхра абакIра йацхърагIарныс зтахъу зымгIвагьи амаль рымапI ахча аларцIарныс Апсны Республика апынгьи Россия Федерация апынгьи Москва апсуа диаспора абанк реквизитквала йа«ХIара хIадгылтI» мгIвайсраареквизитквала йгьи Трыкв Республика ахьыла Адуней апсуа-абаза конгресс ареквизитквала, йа а-Конгресс асайт апны онлайн амальла ахча аларцIарныс. Ахчата йгIаталуа зымгIва Апсны абзазагIвчва рынцIри рызгIвадари ргIахчара йазалхта акоронавирус ашIашIкIгIара згIва COVID-19 абакIра йазынадырхуштI.
швталра йа тшаншвцIара атахъыпI.