Россия айъазагIвчва Апсны йауу ръачIвагIалагIвчва коронавирус згIва атшауацIыхра ашIакIра апны цхърагIара гIаддрайдзуштI
Россия Федерация азгIвадарахчара а-Министерства ауысхагIвчва ргвып ауагIа медицина цхърагIара драйдзара апны апсуа айъазагIвчва йрыцынхарныс ахъазла, рыцIа пасата йызлангIалызгьи дырхъйауата Апсны йгIайтI, хабар аргитI Апсны азгIвадарахчара а-Министерства апресс-къвырльыкъвхарта. COVID-19 атшауацIыхра ашIакIра ауыс апны Россия Апсны ъамапсымала, хъвшвыла, тшыхчагала, йгIадрысабапуа медицина пкъыгIвала йацхърагIуштI.
ХIызту амчыбыжь ацIыхъвадза аъачIвагIагIвчва компьютер томограф абыртуаштIта йаквдыргIапсуаштI, август йгIвбахауа аъарагIвшара агIан ауи йаланхауа йалагуштI.
Россия азгIвадарахчара а-Министерства агвып йрылакву Гвдауыта агоспиталь реанимации йымчу терапии рхъвшараква шынхауа йапшытI, асанитар-эпидемия ргIапсща, амаршрут лыхра йрыквчважватI, инфекция злакву ъащтIу ачымазагIвтара ахъвы йнашылтI, ашта "къапщы" рбатI, хъахчагали хъвшвыли йшадгалу дырхъвыхтI.
РФ азгIвадарахчара а-Министерства ауысхагIвчва COVID-19 зхьуа ачымазагIвква ъащтIу Гвдауыта агоспиталь анхаща ргвапхатI, Апсны йатахъу зымгIвала йацхърагIарныс йшхIазыру гIалыркIгIатI.
"АчымазагIвква ахьъаргуш амаршрутква руысла Краснодар крайла йазалху унашва гIацIцIуаштI. Ауи ззынархазлуш Апсны тшпсщара йцауа ауагIа йгьырхъазым. Швача ачымазагIвтара хIуагIа йрыуата йчмазагIвхауагьи щтIарцIуштI, ауат ауаъа йазалхта йрайъазуштI", – йхIватI Россия йауу йъачIвагIалагIвчва данрынйа амщтахь Апсны азгIвадарахчара аминистр Цахнакиа Тамаз.
РыцIа пасата Россия ахабарргагаква йгIарттI Россия Швачи Апсни тшпсщара йцауа атуристква коронавирус йачвыхчарала амальта йатахъу шнанауахвуаш. Йанатахъхара тшпсызщаквауа йатахъу медицина цхърагIара радзуштI, йхIватI ауи апхъала уыс йымата Швача данаъаз Россия азгIвадарахчара аминистр Мурашко Михаил.
"ХIара Швача апны ачымазагIвква рыхъаз чIыдата ужвыгьи корпускI хIрыхIазыритI – атуристкви тшпсызщаквауи Россия йгIагхра атахъхузтын йъащтIахIцIуш шхIымазлуш апш", – йхIватI ауи.
Россия аъачIвагIагIвчва Апсны йанаъаз РФ азгIвадарахчара а-Министерства Гвдауыта агоспиталь апны йынхарныс Апсны йырщтийуаш айъазагIвчви амедицина нхагIвчви гIадрыбергьльырныс йангIалтI.
Апсны аоперштаб ансимшы йарыхIазыруа ахабар
Аштаб ауысхагIвчва йшырхIвазла, йагIвсыз ацIхи амши руацIа коронавирус рыхьуи йрымхьуи ауысла 88-гIвы дырхъвыхтI, COVID-19 жвгIвы рпны йгIараутI.
Ужвы ари асахIат Гвдауыта Аквта район чымазагIвтара апны коронавирус шрыхьуа щаквдыргылхьата 36-гIв щтIапI.
Пандемия гIаджвыквлищтара Апсны апны зымгIва шалакIу 107-гIвы коронавирус рыхьуата йщаквдыргылтI, ауат йрыуата 37-гIв бзихахтI, хгIвы псытI.
Апсни России ркъральыгIва мажа август а 1 йхъыртIытI. Йапхъахуз агIвымшкI руацIа Россия йауата турист зыкь 30-гIв райхIа Апсны йгIайтI.
швталра йа тшаншвцIара атахъыпI.