Апсны апны асабикви чкIвыныргIи футболасра йъазырбжьауа Санкт-Петербург йауу «Зенит» футбол клуб йачIву академия ахъвшара гIахъыртIытI.
СогIвым апны «Зенит» афутбол апхьарта ахъвшара агIахътIра йазынархаз агвыргъьахъв айззара асабша, мартI а 27 атшын, Апсны акъральыгIва филармония апны йакIвшатI.
Ауаъа йгIадгылтI спорт йапщылу ауагIа, афутболасчва шIакви ауат ран-рабачви, абжьагIвчва, Санкт-Петербург ракадемия апны тшызбжьауата ужвы ахъвмарраква тшрыздрыхIазырырныс ареспублика йгIайыз ачкIвынчва. Даъан топасрала зыхьыз атурых йгIалазжьыз Сичинава Георгийгьи. Агвыргъьахъв далан Апсны а-Президент Бжаниа Аслангьи. АкъральыгIва йгьи ажвлара уысхагIвчва ргIачважвараква рбжьара ауатыкв «КIавкIаз» йгьи «Абаза» гIахIвчва гвыпква йрыртуан.
Футболгьи азъазарапI
«Зенит» футбол клуб а-Генеральна директор Медведев Александр йгIачважвара апны агвыргъьахъв айззара афилармония апны ахъазгIваца йшадрымгалыз йгватра азынайырхатI: ауи дшхъвыцуала, футболи агIахIвракви адызкIылуа щардапI.
«ЩардагIвы футбол азъазара йашIдырпшитI. ХIара араъа артистква пшдзата йшгIахъвмарыз гIбатI. Ауат пшата йрыцIу, йшаквшвауа уанапшра ауатква йрыщату шIас змам атшыбжьараква шракIву гIаугвынгIвитI. Анчва ага гIауылайцIарагьи ансимшы абалет станок уадзхъагылата унымхузтын йа атопасырта апны пхдзы гIауымщтийуазтын ууыс угьазъазахушым. ХIара академия апны аспортсмен мчква, агIвычIвгIвыс бзиква гIадзынгылуашта хIгвыгъауата ауи гIахъхIтIитI. АдахIвраква швымазтI! Санкт-Петербург апны хIшвызпшлуштI, хIара хIычкIвынчвагьи Апсны йгIайлуштI, швара йшвыцта тшырбжьалуштI, футбол йшвыцаслуштI. ЙшырхIвауа апшта, рыцIа йымчу дайгIайларгIатI», – йгвтараква ачкIвынчва йрайхIвтI Медведев.
Ауи аспортсмен шIаква ахIбачва йыршIпшырныс, апхъала йакIвшата ужвы йъагIадзазгьи апшыгIвчва йгIаргвалашвахуа ахъвмарраква йырпшларныс йаквгIазшIиттI.
«Сара сынасып йгIанакIытI зфутболасщала зыхьыз адуней апны йдзырхIваз Сичинава Георгий сйыдзхъачIвазларныс. СССР йалакIыз агвып асквш 1966 агIан йакIвшаз адуней ачемпионат апны йшхъвмаруаз швапшых. Швара ауи агIан швгьгIадымрисызтI. Ауи футболдзан, хъвмарща мчын. Ауи азын акIвпI хIкъраль акоманда джьаз медаль ангIатнага. ХIфутболасчва заджвыла рыцIа ймачIыгIвта анамыцаква йрыцасуан, йцIыхъвахуз адакъикъадза абакIра гьашIадымрыстI. Ауат акадрква швырпшрыквын щарда гIашвгвынгIвуаштI», – йхIватI «Зенит» ФК агендиректор.
Агвыргъьахъв айззара акIвзыршуз Манаргиа Алхас зымгIва йгIаргвалайыршвахтI хIчIвква Бразилия йшрыцасызгьи.
«Ауи зхабар газ ахъвмарра агIан Бразилия дрылата Пеле дасуан. Сара йырхIвахуата йызгIатI ахъвмарра апхъала Сичинава Георгий атоп Пеле йчIвыгIвбжьара йбжьирышвтуашта йынбжьагIвчва баз дшрыцасыз. ЙхIвазгьи йчпахтI! Анйара алгата рфутболкаква анамырпсахуазгьи Пеле йчIвы Сичинава Георгий йакIвпI йзыйтыз», – йхIватI Алхас.
Ауи йгIашIипхьадзатI Апсны йауата ртшхъвара гIатызгаз, акъраль рхъа зыладухауа антахьгьыт афутболасчва ахIбачвагьи. Дзапшйпа Нийаз, Марганиа Владимир, айщчва ВардимиадиргIа, Грамматикопуло Юрий, Зарданиа Амиран, Дараселиа Виталий, Цвейба Ахрик, АджьынджьалргIа Руслани Беслани, Гублиа Беслан, Хагуш Анри; зхабар рхIвауаркIвауа СогIвым ргвып «Динамо» йалата йхъвмаруаз Хагба Роман, Логуа Юрий, Тарба Саид, Бостанджян Роберт, Кварацхелиа Джьума, Гвбаз Джьамаль, Чалигава Георгий, Ахвледиани Дауыр, Еник Тамаз датшагьи. ЙгIайхIватI футболасра Апсны апны йджвыквызцIата зыхьыз совет футбол атурых йгIалазжьыз Симонян Никита йыхьызгьи.
Агвалакви алшаракви
Спортла а-КъральыгIва комитет аунашвачпагIв Гвбаз Джьамальи Апсны ауагIахъа олимп комитет апрезидент Аршба Валерийи «Зенит» ракадемия ахъвшара Апсны апны йгIахътIра лшарата йызчпаз зымгIва рразыра ажваква рзынадырхатI. Аршба Валерий скшвщарда цIуата футбол дапшырныс бзи йшибауа йхIватI.
«Сара футбол швабыж бзи йызбитI: Апсны апны «Динамо-Сухум» срылапI, Россия апны – «Зенит-Санкт-Петербург», адуней апны – «Челси». «Зенит» анхъвмаруа зынгьи йгьагIвсщтуам, «Зенит» ршарф сымапI – ауи сыхъвдасцIитIта бзи йызбауа аклуб сгвы азыцхIауата футбол сапшлитI», – йхIватI ауи.
Аршба йайззакваз ргватра азынайырхатI апсуа футбол йщаквгылхьаз йара ацIасква шаму, ауи атурых сквшышвкI айхIа шгIацIанакIуа.
«СынчIва сквшы 113 цIитI асквш 1908 агIан СогIвым апхьагIвчва йгIарылырхта Апсны апны йапхъахауата афутболасчва ргвып ангIандыршазищтара. УацIыхъван датшагьи командаквакI азыркIкIын ауат дара-дара йацасуан, асквш 1989 агIан СогIвым ркоманда Совет Союз ачемпионат йапхъахуз алига йкIылстI, ауаса аполитика швхIаусыгIваква йгIарылцIла агвып тшагIвыршатI. Ауи амщтахь абжьагIв ахIба Долматов Олеги абжьагIвы Логуа Юри рбзирала гвып мчыкI адыркIылын, ауи СССР ачемпионат апны 12-хуз агыларта акIытI. “Анчва дшвзыразхатI” – расхIвра стахъыпI айсра амщтахь йбаргвыз асквшква рагIан футбол гIащтIызххыз, асабиква ауи тшазырбжьарныс лшара рызтыз, апсуа футбол гIащаквхара ахъазла зпсгьи здырраквагьи алазцIаз зымгIва», – йхIватI Аршба.
АААК аппарат аунашвачпагIв Таниа Кан йгIачважвара апны Алуней апсуа-абаза конгрессгьи ауи аунашвачпагIв Эгьзакь Мусса йхъаталагьи «Зенит» афутбол академия ахъвшара Апсны апны йгIахъыртIра ахъазла апхьарти ареспублики рунашвачпагIвчва рабадырра йшацхърагIаз даквгIашIастI.
Ауи акIвымкIвагьи АААК ауи агIаншара ахабар ргарала, адгалра уысквала, ашвъаква рыхIазыррала, асасыртакви атранспорт нхартакви рангIалрала, датша нхарала йацхърагIатI. Таниа йгIаликIгIатI ауат ауысква рпны йалацIара шдуу Санкт-Петербург йауу хIабашталагIв Джьаргьаниа Борис.
АААК аппарат аунашвачпагIв йшипхьадзауала, Россия рфутбол академия ахъвшара агIахътIра Апсны аспортсмен шIаква йыззычпу рыцIа йаладырхIарныс йахъвуштI.
«Йагъьу хIычкIвынчва рхъвмарща Россия апны йахъазымкIва адуней шабгу апынгьи йгIадырбарныс лшара тшырзыгIахънатIитI. Йауа ухIварыквын [аспортсменква] «Зенит» амщтахь агIвыма къральква рфутбол командаквагьи йызрылалуаштI. Араъа зымгIва зпщылазлуш дара ацIайква руыс йшадгылуа акIвпI. ХIфутболасчва тшгIадырбарныс ахъазла уызгIвымсхыз лшара раутI», – багъьата йазхъайцIитI Таниа Кан.
«ХIынасып гIвына гьамам!»
Афутбол апхьарта ахъвшара агIахътIра асабиква йырхъазымкIва абжьагIвчва рыхъазлагьи алшара шIыцква гIахънатIитI. Футболла абжьагIвы ЦкIуа Роман ауат алшараква йрыуазакIыта йгIайырбатI ужвы абжьагIвчва «Зенит» ракадемия апны ръазара йшырзалархIауа.
«ХIара Питер ракадемия апны хIапхьитI, йапхъахауа ахъвы хIахъыстI, диплом гIапшцIыгIгатI, «Д» категория гIахIырттI, апхъахьылагьи хIъазара йалахIырхIуштI, – йхIватI ауи, асабиква рунашва гIайрахауатагьи йгIацицIахтI: – АцIайква гвыргъьитI. «Зенит» рэкипировка ангIарырт пхьынцIыгIва гIаршIалызшва йцатI. Афилиал ангIахъыртIы амщтахь ауат йыззычпу гIадырбарныс рыцIа йрылшуштI. РыцIа бзита тшгIазырбауа аныла-арыла йцалуштI, анкъвакъвраква йрылазлуштI. АджвырагIв дыргвапхузтын йара Санкт-Петербург академия днарахвырнысгьи ауаштI».
АгIсквша йырту Умар йан Амичба Щазини йаба Квсис Ревази Россия йауу афутбол академия ахъвшара агIахътIра рпагьи агIатгара дуква дырзынадзарныс мгIва гIайнатушта йгвыгъитI.
«Йара йтахъхатI футбол дасырныс, гIвысквша цIитIта атшыбжьарта дцитI. Сара ауи сайгвыргъьитI. ЙшхвыцыркIву гвыпла псып ацтаргауа йащцитI, ауи уадыргIванагьи йгIарыхъвахуаштI – ргIвычIвгIвысща анщаквгылуа, йгIакIвзыршауа ауагIа йанрабадыруа, йанрыщтаныкъвауа. Асабиква аспорт секцияква йцузтын бзирамкIва закIгьи гьалам», – лхIватI Амичба Щазина.
Рагимов Мирослав хвыц гIвысквша цIуата КацIиа Ираклий йпны топасра тшазибжьитI, ужвы йбжьагIвы «Зенит» ракадемияла дахъысхын йаргьи ауат ртшыбжьарта апны тширыхIазырлуштI.
«ХIынасып гIвына гьмам!» – лхIватI ачкIвынхвыц йан Марганиа ЛьыкIа.
Хвы ззыбачIву апшIагылачва
Афилиал ангIахъыртIуашыз йаквшвауата мартI а 19 йгIашIарышвта а 31-дза Апсны апны асабикви чкIвыныргIи тшъарбжьауа «Зенит» футбол клуб ракадемия Апсны апны тшазыркIкIын ахъвмарраква тшрыздрыхIазыритI. «Зенит» йрылу гIвышвыгIв райхIа – афутболасчвагьи, абжьагIвчвагьи, айъазагIвчвагьи – СогIвыми Афон ШIыци рпны тшандыргIалтI. Аклуб ауысхагIвча сквшыкI ауацIа йзнымкIва-йгIванымкIва ртшыбжьараква Апсны апны йакIвдыршаларныс йаквдырпшитI.
Трифонов Даниил цысквша цIуата Санкт-Петербург ракадемия апны тшибжьитI, Апсны йапхъахауата дгIайтI. Аспортсмен мшкIыла апхъала СогIвым ркоманда йшрыцасыз даквчважватI.
«Араъа йауу акоманда хIрыцасуан. Дара бзита йбжьу спортсменпI, хвы рзубушта йаъапI. ХIызпшIагылаз ачкIвынчва мачIкI йхIахIбан, ауаса хIаргьи бзита тшгIахIырбатI», – йхIватI ачкIвын.
Академия ахъвшара агIахътIра йазынархаз агвыргъьахъв угвы гIащтIнахуата йалгатI: апсуа футболасчва шIаква ауатыкв йгIаталтI, Санкт-Петербург йауу ачкIвынчвагьи ауат «Зенит» адамыгъа зну афутболкаква рырттI. Агвыргъьахъв аналга акъральыгIва йгьи ажвлара уыснкъвгагIвчва, асасчва тлапIаква зымгIва асцена йхъалын йадзхъагылата ари амш злагIаргвалашвахлуш сурат рхъырхтI.
швталра йа тшаншвцIара атахъыпI.