Апсны йауу амодель Берзениа Адица лшIахъа «Elle Russia» журнал ахъкъьа йаншвалтI. АААК ахабарргарта портал апхIвыспа ауи шгIалыдахIвызли апхъахьыла йылмурадули йлазцIгIатI.
СогIвым йауу Берзения Адица лсурат йбергьльу ажурнал «Elle Russia» октябрь йгIацIцIыз аномер ахъкъьа арыпшдзатI.
Сквшы 20 йырту амодель СогIвым апны дбзазитI, Апсны акъральыгIва университет аэкономика факультет йхпахауа акурс дапхьитI. Апхьарта даныцIаз баскетбол дхънахуан. Йара уыжвгьи бзи йылбитI, ауаса ауысква ъалщарду йгIалцIла баскетбол дасныс данахадзауа зынзамызадзапI. Датшагьи ауи бзи йылбитI музыка даздзыргIвырныс.
Йапхъахауата Берзениа Адица модельта ауатыкв дангIатал гIвысквша рапхъала – СогIвым апны ахIвссаква пшдзарала ранкъвакъвра «Апсны а-Мини Мисс йгьи а-ПаштыхI пхIвыс» анакIвшуз агIан акIвпI.
«Сара ауи анкъвакъвра салалырныс схъагьи йгьтамызтI, саба йахща Берзениа Мзия лакIвпI саквзыргвышхваз. Ауи «Ахщчва Берзениа» гвып (Берзениа зтдзахьзу гIвахщчва йгIандыршаз ашвахIварала адуэт – аредакция ррытаразга) дырпродюсерпI. Анкъвакъвра агIарбараквала сара «Апсны а-ПаштыхI» гIвыджьхауата слыщтагIайуата салырхтI», – лхIвитI апхIвыспа.
Ауи анкъвакъвра амщтахь Адица моделинг лымагIальаматхатI.
«Сара ауи схънахуа сцатI, модель щардагIв срыщтахьпшуан, тшъагIадырбуз сцалун, ажурналква срыпхьун. Ауасамцара саланахIватI. Саргьи ауат срапшхарныс сгвалахатI, мурадтагьи йскIытI», – йгIалгвалашвахитI амодель.
Апсуа пхIвыспа хьырчIвачIва йшылхIвауала, «Elle» журнал ахъкъьа дъаншвалыз збзиру Россия йауу «Авант» модель агентства акIвпI. СквшыкI цIуата ауи агентства адиректор Шавырина Юлии йара ауаъа агентта йынхауа Попова Екатерини Инстаграм социал сеть апны Адица дырбатI.
«Ауат хIанйата хIайчважварныс ртахъыта схъатаркIытI, ауаса хIара (лтгIачви лари – аредакция ррытаразга) тшытракI гвы гьхIзымчпузтI. СтгIачва моделинг тшъадскIылуаз йадгылуазтIхIва швабыж йсакъуан. Ауи апхъалагьи аныла-арыла сызшIыртквун, ауаса пандемия гIаджвыквлын йапхъахауа ачIвырхъа чпара баргвхатI. Абар ужвы сышта цри сшаъаз ауи атысптI – ажурнал ауысла йангIасыдгыл. Ахъкъьа йара араъа йдрыхIазыруашта, саргьи Апсны гIасырбушта йаныгIдыр хIштгIачваз ауи хIадгылтI», – лхIвитI апсуа модель.
Октябрь йгIацIцIуашыз «Elle» аномер ахъкъьа ачпара йадынхалуаз гвыпкI йнадзун: «Elle» мода уысла адиректор Симонян Лилия, Россия апны йбергьльу асуратхъыхыгIв Харатьян Павел, авизажист Яковлева Мария датшагьи щардагIвы. АпхIвыспа йшгIалылкIгIазла, йатахъыз атурасы тшаквыргIапсра лангьи ларгьи адгIапсалтI.
«ХIара йгIахIгвынгIвуан чгIвыча ангIалхIхуа йхътIчвата закI сшвысцIарныс шанымгIалуаш, ажурнал анхагIвчвагьи хIцIасква ъагIаргвынгIвыз ахъазла швабыж сырзыразпI. АкIартIква Гагра йапшым ашIыпIаква рпны йсхъырхуан», – лхIвитI ауи.
Адица йылрыбагъьитI йанымгIалуа кIара ъахъырхуа дшаламылуаш, ауи акIвпI мода агIарбартаква дызрылам, йбергьльу журналквакI дрыцынхарнысгьи злымуа.
Модельта ауи тшгIалырбатI СогIвым йауу Лакоба Расида йгIанлыршата мода йапщылу ауагIа рквта йбергьыльхаз Rasario бренд ръахвтан реклама аназылчпузгьи.
Ужвы апхIвыспа хачIв хъадата лпахь йлыргылуа ауниверситет апны лапхьара дахIврала йшаллыргуш акIвпI. УацIыхъван, лара йшылхIвауала, «абзазара йгIанарбахпI» апхъахьыла мурадта йлылхуаш.
швталра йа тшаншвцIара атахъыпI.