XIX-нхауата йакIвшауа «Герзмава Хьыбла швылрайгвитI» фестиваль йаланакIуата СогIвым аурышв драма театр асцена апны Герзмава Хьыбла лхъатачIв концерт алттI.
XIX-нхауата йадыргалуа «Герзмава Хьыбла швылрайгвитI» фестиваль Апсны апны йакIвшауа ахъвы Апсни России рпны гIатгара зму артистка Герзмава Хьыбла лхъатачIв концертквала йджвыквырцIатI. Ауат октябрь а 8 йгьи а 9 рагIан СогIвым, Искандер Фазиль йыхьыз зхъу Аурышв драма театр апны йакIвшатI. СогIвым апны аконцертква ХIХ афестиваль йгIвбахауа йахъвыта йалитI: ауи апхъапхъа Москва апны йалагатI.
Аурышв театр адиректор Хьынтба Ираклий йшгIаликIгIазла, «Герзмава Хьыбла швылрайгвитI» фестиваль Апсны амагIны йагIарбагахатI, ауи «хIкъраль ГIвадахь КIавкIазгьи ауи уагIвстагьи рпны йалкIгIу акультура уатыквква йрыланажьитI».
«Зджьара йгIанымхауата магIын ду амапI афестиваль хIкъраль апны йъакIвшалауа, Хьыбла ауи гватра швабыж йъазалылхуа, бзидздза йылбауа апсуа пшыгIвчва рыхъазла йанакIвызлакIгьи джьащахъваракI ъагIалхъвыцуа, даргьи ауи бзибарала йъалпылуа», – йхIватI Хьынтба Ираклий аконцерт аналагушыз апхъала.
Ауи аконцерт адгалагIвчви йалази асасчви Россия Федерация культурала аминистр Любимова Ольга йгIалщтийыз асальамшвъагьи дрызгIапхьатI.
«Афестиваль рыцIа-рыцIа тшауацIнахитI, йара ацIасква арыбагъьитI, адуней йрылалитI, артист бзиква гIаланакIитI. УахьчIва адуней амакъымршIыйара йагъьу ашваква агвы йгIатыцIуа, амч злу быжь пщдзадзала йырхIвуштI. Кьангьаш гьазгIазгуам адгалагIвчва апрограмма йанакIвызлакIгьи апшта угвы йнадзауата йшагвындыргIвуаш, йаргьи абжьыргаща шIыцквала амакъым адуней шарбайуш», – йаныпI асальамшвъа.
Герзмава Хьыбла йылхIваз ароманскви аопера партиякви ракIвпI. АшвахIвагIв макъым дылзасуан аконцертмейстер, Апсны апны гIатгара зму артистка Ганелина Екатерина. Аконцерт йалан Глинка, Римский-Корсаков, Дворжак датшагьи амакъымалацIагIвчва рромансква. Герзмава Хьыбла йылхIватI Беллини йопера «Норма» йалу Норма лкаватина, Пуччини йопера «Тоска» йалу Тоска лария, Верди йопера «Трубадур» («НакъырасыгIв») йалу Леонора лария.
Аконцерт аналгуз Герзмава Хьыбла апшыгIвчва ашва лыцырхIварныс дрыхIватI. Апещ йыгIвнази лари апсуа уагIа руарадкI ацырхIватI.
Асюрпризква ауыла йгьашIамстI. Опера апны йачIвата йкIкIауа ашвахIвагIви ауи лыгIвза – абзихагIв Палант Евгенийи – зныкI лара Хьыбла дъапхьуз СогIвым амузыка училища согIата рояль арттI.
«Ари амузыка апхьарта апны ужвыгьи макъымршIыйагIв щардагIв гIадзынгылуашта Анчва йхIварагIатI. ЙанакIвызлакIгьи ауаъа амузыка гарагIатI», – дхIвахIвтI Герзмава.
ЙакIвшаз аконцерт «псып цкьакI антаугауа йагIвызата» йпхьадзатI апсуа бзихагIв Ачба Николай. Лара адуней опера априма йшылхIвазла, Ачба «Герзмава Хьыбла швылрайгвитI» фестиваль арат асквшкъом руацIа апсуа пшыгIвчва рыла ъарпшуа збзиру ауагIа дрыуазаджвыпI.
Ачба Николай дангIачважвуз къральквакI рпны COVID-19 зхькваз тшгIащаквдыргылхырныс ахъазла классика музыка аконцертква йцаларныс йшрылабжьауагьи йхIватI.
«Хысквшахауата азгIва гвымха ауагIа анхIылнахуа, зымгIвагьи хIгвы анкIахIауа ари агIамта… ари йапшу агIаншараква ачымазагIвракви абаргвыракви ракIвымкIва датша бзазарагьи шаъу гIахIгваладыршвауазшва йызбитI. Ауи ухъураштыл йгьауашым, абзазара уайгвыргъьара атахъыпI. Са сшапшызла, йахьчIва апшыгIвчва зымгIва анасып рызгIайтI», – йажва алйыргатI абзихагIв.
Апсны культурала йаминистрыз Арсалиа Эльвира йшылпхьадзауала, Герзмава Хьыбла «йанакIвызлакIгьи йалкIгIу хъвдаквцIара нкъвылгитI».
«УахьчIва аквыргъвгъвараква хIанрылу агIамта ауи лгIайра – ргвышхвагапI, ужвы йнанаркIыта абзазара ачIвы шхъахьуш йазхъаузырцIауа нашана бзипI», – ллахIвараква хIыцагIвылшатI Арсалиа.
Октябрь а 8 йгьи а 9 рагIан Аурышв театр апны йадыргалыз аконцертква XIX-нхауата йакIвшауа «Герзмава Хьыбла швылрайгвитI» фестиваль йгIвбахауа ахъвы йаланакIитI. Ауи апхъала аконцертква Москва а-Консерватория апещ ду апны йакIвшатI. Ноябрь а 24 Москва дгIайра атахъыпI Латвия йауу аопера ашвахIвагIв Гаранча Элина, Герзмава Хьыбла ауи длыцта а-Консерватория апещ ду апны ашва лхIвуштI. Ноябрь агIан афестиваль Апсны апынгьи йакIвшауаркIвуштI. Ауи амыз Герзмава Хьыбла адирижер Спиваков Владимиргьи дгIалдта «Виртуозы Москвы» оркестр лыцта концерт адылгалуаштI.
«Герзмава Хьыбла швылрайгвитI» фестиваль лара Герзмава Хьыбла асквш 2001 агIан Апсны апны йгIалалгатI. Асквш 2014 йгIашIарышвта ауи тшауацIнахын Москва а-Консерватория апещ ду, Станиславский К.С. йгьи Немирович-Данченко Вл.И. рыхьызква зхъу а-Музыка театр рпны, Вена Мюзикферайн апещ хьапщ, Карнеги-холл, Швейцария акъала Санкт-Мориц рпны йакIвшалитI. Афестиваль адыргалуищтара ауи йалан адунейла зыхьызква дута йгауа аршIыйагIвчва Спиваков Владимир, Образцова Елена, Мацуев Денис, Абдразаков Эльдар, Браун Дебора датшагьи. Сквшщарда руацIа аконцертква акIвйыршалун азъазарадырыгIв Бэлза Святослав. ЙалкIгIу магIны амапI афестиваль Апсны амакъымбзибагIвчва рыхъазла: сквшигIадза Герзмава Хьыбла йагъьу амакъымршIыйагIвчви йагъьу амузыка программакви лпсадгьыл йгIалглитI.
швталра йа тшаншвцIара атахъыпI.