АААК йаланакIуа апхIвысква р-Координация совет аунашвачпагIв айсра йаладзыз Апсны ахчагIвчва ранчва дрынйатI.
Апсны ауагIа р-Абашта айсра апны айгIайра сквш 29 анахъыцIуашыз гIаргванхауата АААК йаланакIуа апхIвысква р-Координация совет аунашвачпагIв Бебиа Екатерина «Апсны анчваква амамыри асоциал захвари йрызгылапI» мгIвайсра йалакву дрынйатI. Айззара АГУ афилология фаультет атдзы апны арыпхьагIвчва гвыпгьи астудентквагьи алата сентябрь а 29 атшын йакIвшатI.
АпхIвысква рымгIвайсра магIныта йаму йаквчважварныс, рпачваква рхъацIара гIаргвалашвахырныс «Апсны анчваква амамыри асоциал захвари йрызгылапI» мгIвайсра апхъагылагIв, АААК йаланакIуа апхIвысква р-Координация совет пIатIу зквыта йалу КIьычба Гульа йлыцта йгIайтI амгIвайсра йалакву ДжопIуа-Лагвилава Заира, АгIвдза-Эзугбая Тамара, Ермолова Эмма йгьи Хашба-Кучубериа Ламара.
Айззара йалаз зымгIва Апсны ахъахвитра ахъазла зхъа щтIазцIакваз чIахI рзырбауата дакъикъакI закIгьи рымхIвауата йгылтI, ауи амщтахь йгIайззаз тшырзыналырхатI АААК йаланакIуа апхIвысква р-Координация совет аунашвачпагIв Бебиа Екатерина. Ауи анчва айсра йаладзыз рпачваква рфырра ахъазла дшырзыразу лхIватI, дара апхIвысквагьи хъацIари агвы амчри шгIадырбауагьи гIалылкIгIатI.
«Анчва рхъацIари рымчи бзита дрыквчважватI Ардзынба Владислав Григорий йпа. Ауи йзнымкIва йхIвун Абашта айсра апны айгIайра ахъа гIазрыкIапыз апсуа анчваква шракIву», – лхIватI Бебиа Екатерина.
СогIвым йаъу АААК ауысхарта аунашвахъцIагIв Реквава Темур «Апсны анчваква амамыри асоциал захвари йрызгылапI» мгIвайсра йалакву йгIаргванхауа айгIайра агвыргъьахъвла драйхIвахIвтI, согIатагьи асуратчпагIв Дочиа Гарри анипхьадза йылзалхта йгIвыз асуратква риттI.
Анйара апны ауи йалакваз Апсны ахIвсса фырква йгIарыквчважвауа афильмква йгIарылху ашIчIваракви «Апсны анчваква амамыри асоциал захвари йрызгылапI» мгIвайсра йалу анчва гIазырбауа архив кадркви йырдырпшытI. Ахроника агIарбара йацгIайуан айсра агIаншараква газгвалашвахуаз, чкIвынырга йрылабжьуз апхIвысква ргIачважвараква.
«ХIара хIпачваква хIабадучвагьи ауат рабачвагьи зыздзышуаз Апсны ахъахвитра ахъазла рхъаква щтIарцIатI. ХIкъраль ахъахвитра хвду зму, йхчара атахъу байарапI», – тшырзыналырхатI астудентква АгIвдза-Эзугбая Тамара.
Дара апхьагIвчва апхIвысква ъарызгIайыз, атурых гIаншаракви ауат йрылаз афыркви рыхъазла шIыцра щарда ъардырыз ахъазла йшырзыразу рархIвтI.
«Сара йахьчIва згIагвалашвахраква хIыцагIвызшаз пхIвысипхьадзагьи сразыра ажваква лзынасырхара стахъыпI. ХIара хIыхъазла швара уызшIпшра атахъу швапхата швалитI. ШвхъацIари швгвы амчри хIдыргвышхвитI. Фырта тшгIазырбаз швпачваква квырмыш рзыхIчпитI, хIара ауат зынгьи йгьхIхъаштылуашым», – лхIватI филология хъвшара йхпахауа акурс йапхьауа Хварцкиа Хьыбла.
Филология хъвшара адекан Хагуш Батал ари йапшу анйараква арыпхьара-бжьара нхара бзира щарда шаларцIауа гIаликIгIатI.
«Арат йрапшу анйараква астудентква рыхъазлагьи, апхьагIвчва рыхъазлагьи йадгаллара атахъыпI. Ауат ртурых рдырра рборчпI – рапхъала йаъаз щатата йырзалуата, агIващагIараква тшырчвырхчауата пахьла йшымгIвайсуаш апшта. Атурых ауат апхьагаква, ашвъабыгъьгIваца йгIарнырымхуата ауи атурых зчпуз ауагIа рпынгьи йддырдырра атахъыпI», – йгIаликIгIатI ауи.
АААК йаланакIуа апхIвысква р-Координация совет аунашвачпагIв Бебиа Екатерина йадылгалыз «Апсны анчваква амамыри асоциал захвари йрызгылапI» мгIвайсра ауысхагIвчва злаз анйара ари амыз агIан зынхара джвыквызцIаз асовет йакIвнаршаз йапхъахауа уыспI.
швталра йа тшаншвцIара атахъыпI.