Адуней апсуа-абаза конгресс апсуа ашва шIыц «Аԥсны абираҟ» ауагIа йрыланагитI.
Апсны ауагIа р-Абашта айсра апны йгIатыргаз АйгIайра амш йадахIвуата Адуней апсуа-абаза конгресс ауагIахъа тшдырра гIазрыцIсуа ашва шIыц «Аԥсны абираҟ» (апсуа бызшвала – «Апсны абаракъ» – аредакция ррытаразга) ауатыкв йгIатанагуштI.
Ауи абаза уагIахъа зымгIва согIата йырзалуашта йаъапI. АААК йаланакIуа апхIвыс советква рунашвачпагIв Ардзынба Гета йшылхIвазла, апхъапхъа ауарад июль а 23 – Апсны акъральыгIва баракъ амш агIан – пычIвта йырхIварныс йаквдырпшуан, ауаса акомпозиция адынхалра йшгвыгъуз ацкIыс рыцIа заман щарда агатI.
«Ашва къральгIвына гьадырам. ХIара апсуа-абаза уагIахъа ъабзазауа йъакIвызлакIгьи йгуш уарад хIуагIа йрыхIтра хIтахъыпI. Ауи Апсны ауагIа хIнып рхъадзгылата йгIатыргаз айгIайраква гIанахIвитI, хIпсабара апшдзарагьи Псадгьыл-хIва хIызпхьауа зымгIвагьи аднакIылтI», – апроект йамагIну гIахIгвынлыргIвытI Ардзынба Гета.
АААК апхIвыс советква рунашвачпагIв йгIацылцIахтI ашва йапхъахауата АйгIайра амш йазынарху агвыргъьахъв концерт апны йгIархIвушта йшаквдырпшуа, ауаса «акъраль апны аэпидемия аъаща ъаквыргъвгъву йгIалцIла» йара аконцерт акIвдмыршарнысгьи ауаштI.
АШВА "АПСНЫ АБИРАҞ". АМАКЪЫМ: ГВЫМБА АНРИ, АЖВАКВА: ГВЫМБА АНРИ, АБЫХВБА НАРСОУ.
«Агвыргъьахъв злалазлуш ауысла йырхIвуш атамам ужвыгьи йгьхIыздырам, аршIыйагIвчва гвып акомпозиция йадынхалитI. Ужвы ари асахIат ауарад астудия апны йанырцIитI», – лхIватI Ардзынба.
«Аԥсны абираҟ» амакъым йбергьльу амакъымршIыйагIв Гвымба Анри йчIвыпI, ауи ажваквагьи апсуа уысагIв шIа Абыхвба Нарсоу йыцалайцIатI. Ауарад зхIвуш апсуа ашвахIвагIв ЦIулукIиа Анри йакIвпI.
Акомпозитор, амакъымршIыйагIв Гвымба Анри АААК апроектква йапхъахауата дгьгIарылалуам. Ауи апшта, ашвахIвагIвчва ранкъвакъвра «Орфей» апны АААК Азизова Саида согIата йылзалнахыз ашва ауи йалайцIатI. Абаза уагIа ргвбайара тынха йазынарху АААК апроект «Амазара» апкъ йтата арежиссер КIвакIваскьыр Тимур йхъихыз апсуа гIахIвра макъым азалазцIазгьи Гвымба дрылан.
«Сызлаз апроектква апсуа уагIа рыбызшва, ркультура ртшауацIыхра йазынхитI. Ари ашва ауагIахъа тшдырра гIанарыцIситI, ауи Апсны ауагIа р-Абашта айсра апны йгIатыргаз АйгIайра амш йазынархапI. Ауи гимн хIаль йтагылу йласым балладапI. Акомпозиция аклассика оркестр ъамапсымаквала йырчвыпI», – йхIватI амакъымршIыйагIв.
АшвахIвагIв шIа ЦIулукIиа Анри Согъвым амузыка училища апны дапхьитI, Апсны ашвахIвагIвчва ркъральыгIва капелла далатагьи ашва йхIвитI. Ауи «Аԥсны абираҟ» йхIварныс дгвыргъьауа дшадгылыз гIаликIгIатI.
«Ари ашва угвы гIащтIнахитI, дунейкI гIацIанакIитI ухIва ауаштI! Йара ажва азнагвалайа, ауи уаздзыргIвра атахъыпI. Йхъаду – ари йапшу ауарадква ауагIа рпсадгьыл йазрыму абзибара нкъвыргитI. ХIара ауи йара ауасагьи йгьхIхъаштылуам, уадыргIванагьи ауагIа йгIаргвалахIыршваларгьи гьчIыдам», – йпхьадзитI ашвахIвагIв.
Адуней апсуа-абаза конгресс анхара анархара хъадаква йрыуапI ауагIахъа культура йазырхIара, цри бызшва гIащаквыжьра йгьи тшауацIнарыхра. А-Конгресс апроект шIыцгьи ауахьауат йрапшта арат амурад хъадаква рырхъйара йазынхитI.
швталра йа тшаншвцIара атахъыпI.