Адуней апсуа-абаза конгресс ЙхIаракIу асовет аунашвачпагIв Эгьзакь Мусса асовет йалакву дрынйан асквш 2021 агIан йшынхаз йаквчважватI.

Барганджиа Саид

Адуней апсуа-абаза конгресс ЙхIаракIу асовет декабрь а 22 йалачIван йтыцIуа асквш 2021 агIарбараква йрылапштI, асквш 2022 ахъазла ахачIвквагьи лнахтI. Асовет йалакву ащардагIв СогIвым йаъу АААК ауысхарта апны йайззатI, азджьакI, ЙхIаракIу асовет аунашвачпагIв Эгьзакь Муссагьи дрылата, ауат онлайн амальла йгIарылалтI.

ЙшцIасхаз апшта, анйара йара ауанашвачпагIв йгIахъитIытI: Эгьзакь Мусса зымгIвагьи сальам пха гIарайхын алачIвара джвыквицIатI. Ауи алачIвара апротокол а-Конгресс архъйагIв секретарь Гьыцба Инар йшйыгIвуаш гIарылайхIватI.

«Ауи ажва йыстра апхъала Махариа Мурат Апсуафед даунашвачпагIвта дъалырхыз сйайхIвахIвра стахъыпI. Сабап алата хIацынхушта сгвыгъитI», – йхIватI Эгьзакь Мусса.

АААК ЙхIаракIу асовет йалу Махариа Мурат сынчIва ноябрь агIан Трыквшта апны йынхауа апсуа культура квтаква р-Федерация даунашвачпагIвта далырхтI. Ауи акIвпI Эгьзакь Мусса ауи ззихIваз.

ЙхIаракIу асовет аунашвачпагIв айшыста алачIвара апны йызлапшуаш ауысква дрыквгIашIастI. Ауат хпа йнадзун: йапхъахауата, «Адуней апсуа-абаза конгресс» жвлара адкIылара асквш 2021 ауацIа йшынхази асквш 2022 агIан хачIвыта йдырхъйарныс йызквдырпшуи гIарархIвырныс; йгIвбахауата, а-Конгресс Аквта ревизия комиссия йагIвсыз асквш йакIвнаршаз архъвыхраква йгIадырбаз ахабар йаздзыргIвырныс; йхпахауата, йалакIу ауысква йрылапшырныс.

ЙхIаракIу асовет йалакву ауат ауысква андрыбагъьа Гьыцба Инар АААК асквш 2021 йшынхаз гIайхIватI. Гьыцба йымщтахь ажва йырттI ашIыпIа хъвшараква рынхари чкIвыныргIа рджьгарри аквзырпшуа Жьыба Дмитрий. Ауи а-Конгресс Апсны апны ашIыпIа хъвшараква йшрыцынхауа дгIаквчважватI.

УацIыхъван а-Конгресс аппарат аунашвачпагIв Таниа Кан аппарати Санкт-Петербурги Москви рпны йаъу АААК ашта хъвшаракви йагIвсыз асквш ауацIа уыста йырхаз гIарылайхIватI. ЙащтагIайуата а-Конгресс анхара аргамта йшырчпауа гIалхIватI АААК ахабарргарта портал аунашвачпагIв Лазба Амина. Асквш 2021 ауацIа АААК йакIвнаршаз агвчIагIвчпара уысква дрыквчважватI ажвлара рабадыррала аъачIвагIагIв Хагба Изольда. Адуней апсуа-абаза конгресс апхъахьыла хачIвыта йаргылуа гIайхIватI АААК аппарат аъачIвагIагIв Реквава Темур. Аквта ревизия комиссия йагIвсыз асквшла аотчет дгIапхьатI АААК ашта хъвшара аунашвачпагIв Мыхц Рамазан.

Агвып йалакву зымгIва ргIачважвараква рымщтахь ажва найахвтI Махариа Мурат. Ауи АААК ЙхIаракIу асовет аунашвачпагIв Эгьзакь Муссагьи агвып шабгугьи асквш 2021 ауацIа нхарата йакIвдыршаз ахъазла дшырзыразу йхIватI, Трыквшта йту апсуа-абаза диаспори АААКи рыцIа джьгарта йацынхарныс – агIамта йгIанаргылуа шуысугьи гIаликIгIатI. Апсуафед ахъада шIыц йгвы йасуата йхIватI йагIвсыз асквшква рагIан ауи анархарала анхара йшыртахъыз апш джьгарта йшадгаламыз.

Ауи йгIацицIахтI йгIайуа асквш Трыквшта апны а-Конгресс анхагIвчви апсуа-абаза диаспори ранйара акIвшушта дшгвыгъауа.

Репатриация ауысла акъральыгIва комитет ахъада, АААК ЙхIаракIу асовет йалу Харазиа Вадим асовет алачIвара йгIванхауата дшалу йхIватI (Харазиа Вадим а-Конгресс а-Президиум далрымхуата далашвитI, йауа ухIварыквын АААК а-Устав йшгIанахIвауала, репатриация ауысла Апсны акъральыгIва комитет аунашвачпагIв а-Президиум далазлитI).

«ЙсгвапапI анбжьагIвчва зымгIва ъазбауа. Сара уахьчIвала унашва зхъсцIауа акомитет ахьызла йчпа йауаш уысквакI гIасхIватI. Сшхъвыцуала, хIкомитетгьи АААК ЙхIаракIу асовет йалаквугьи хIыбызшви хIгвбайари хчара ауысла рмурадква аквшвитI. СгвыгъитI йгIащтIысхыз ауысква а-Конгресс йалу дзачIвызлакIгьи йгвгьи йпсгьи йырзынадзушта. ХIара, ажва аламкIва, ацынхара хIазыхIазырпI, а-Конгресс, агIвыма къральква рпны йбзазауа хIабашталагIвчва хIрыцымкIва хIа хIынхара хIыла йгьгIацIагIжьуам», – йрыбагъьатI Харазиа.

Адуней апсуа-абаза конгресс агвып рынхара хвду аквицIатI АААК ЙхIаракIу асовет йалу Чрыгба Вячеслав. КIьыдата ауи йразыра ажваква йзынайырхатI ЙхIаракIу асовет аунашвачпагIв Эгьзакь Мусса.

«Йшабгу йгIауахырквын анхара сымабзипI. АААК агвып шабгугьи ауи ахъвшараквагьи срайхIвахIвра стахъыпI. Сара хIынхара асабапра процент 100 йахънацауазшва йызбитI, йауа ухIварыквын агIаджвыквцIараква, агIаншара джьащахъваква щардан, Апсны акытква рпынгьи, анахьанат аштаква рпынгьи шIыцта йгIахъыртIыз ашIыпIа хъвшараква швабыж йщардапI. Ауи лшарата йызчпаз АААК агвып мчыта йъанхаз акIвпI, зымгIвагьи [ауи анхара] ргвгьи рпсгьи аларцIитI. Ауи джьаущадзушта йаъапI, угвгьи гIащтIнахитI», – йажва алйыргатI ауи.

АлачIвара цIхъважва айттI Эгьзакь Мусса.

«Кьангьаш гьазгIазгуам хачIвыта хIпахь йхIыргылуа зымгIва шхIзырхъйуш. ХIара, цIабыргдзата, хIуыс зкву ари акIвпI: зымгIва азкIкIра, дзачIвызлакIгьи дгIаура, зымгIва тгIачва дукIта йадкIылра – хIуагIахъа гIащаквхара, хIцри бызшва, хIгвбайара, хIцIасква хIхчара ахъазла. Культура акIвпI хIара хIымчыта, хIкъару дудздзата хIызчпауа. ХIара тшадхIкIылуазтын, азаджв азаджв дыгIгIата дгIахIгвынгIвуазтын Анчвагьи дгIахIцхърагIата хIмурадква зымгIва хIырзынадзуштI. ХIара хIызлачважвуш щардапI, йхIчпара атахъу рыцIагьи йщардахпI – хIыгIвычIвгIвысипхьадза дхIыцта. Багъьата йшвасхIвитI: йхIхIваз зымгIва амаль амамкIва йхIчпахуаштI», – йгIайыргвыгъатI ауи зымгIва.

Адуней апсуа-абаза конгресс ЙхIаракIу асовет алачIвараква йаназаману йахъымпауата йакIвшалитI. Ари апхъала алачIвара сынчIва мартI агIан АААК ЙхIаракIу асовет аунашвачпагIв Эгьзакь Мусса нхара уысла Апсны данаъаз йакIвшатI. Ужвы йакIвшаз алачIвара йалан: Эгьзакь Мусса, Гьыцба Инар, Харазиа Вадим, Чрыгба Вячеслав, Барцыц Марина, Алшундба Инвер, ХIапIатI АхIмад, Башныхв Эрджан, Дохмат МахIматальы, Макьар Ведат, Махариа Мурат, Чква Анвар, ХIаджьымба Эркан, Лазба Натали, Кобахиа Беслан, Уырчыкъва Мурадин, Пшенокъва Владимир, КIарма Руслан, Мыхц Рамазан, Дзыуа Зауыр, Чагва Армида, ШенкIауа МухIадин, Мыква Мурат.

Асквш 2021 ауацIа Адуней апсуа-абаза конгресс шынхаз ахабар рыцIа йауацIыхта АААК ахабарргарта портал йащтагIайуата йгIаталуаш агIвыраква рпны шврыпхьа.